2 مليون نحلة ضحايا مبيدات فيروس زيكا!
كتبت: مها طـه
صباح يوم الاتنين في ولاية ساوث كارولينا فوجئت ”خوانيتا ستانلي“ بتجمعات كبيرة من النحل ميتة. ده كان بعد حملة رش قوية للمبيدات الحشرية، والهدف منها كان قتل الناموس عامةً، وبالذات الناموس المسئول عن نقل فيروس زيكا.
”خوانيتا“ قالت إنها مكنتش محتاجة تلبس البدلة الخاصة بالمنحل، لأنه فعلًا مكنش فاضل أي نحل لدرجة إن الست فضلت تعيط لفترة طويلة، لأنه طبعًا بالنسبة لخوانيتا دي مصيبة، مش بس عشان اللي حصل تسبب في موت حوالي 2 مليون نحلة لكن كمان لأن ده شغلها وثروتها الحقيقية للأسف.
المسؤلين في المقاطعة التابع ليها المنحل ما زالوا مش متأكدين تمامًا من أعداد النحل اللي ماتت كنتيجة للرش الجوي، واللي كان المقصود بيه هو القضاء على البعوض الناقل لفيروس زيكا.
لكن يبدو من الواضح إن الإبادة حصلت بشكل خاطئ بعد ما أخطأ موظف في المقاطعة وما أخدش باله من وجود المنحل، واللي يعتبر طبعًا مخالف لقواعد معرفته باستراتيجيات الرش السليمة.
”جيسون وارد“، مدير المقاطعة، قال في مقابلة صحفية إنهم بيتعانوا مع مربيّ النحل في المنطقة واللي يُعتبروا كتير، لكن الفكرة كلها في تحقيق التوازن بين التعاون ده وبين الحفاظ على السلامة العامة في ظل التخوف والقلق من انتشار فيروس زيكا وخصوصًا من ناحية الجنوب، وده اللي حصل عن طريق رش المبيدات في محيط 24 كيلومتر مربع.
المبيدات الحشرية بيتم استخدامها في الولايات المتحدة لأكتر من 50 سنة، وبتعتبر وسيلة معروفة جدًا لمكافحة البعوض لكن المسؤولين قالوا إن المادة الكيميائية المُستخدمة في الحالة دي بتكون مُضرة لنحل العسل، ده غير إنها ممكن يبقى لها تاثير على اللافقاريات المائية والحياة البرية الأرضية.
المثير للاهتمام بقى هو إنه في العادي بيتم إبلاغ أصحاب المناحل عن مواعيد الرش دي، بحيث إنهم ياخدوا احتياطاتهم، لكن المرة دي بالتحديد وعلى حسب كلام خوانيتا، ماوصلش ليها أي حاجة تنبهها، وده طبعًا تسبب لها في خساير كبيرة جدًا لا يُمكن تعويضها كمان.
على الرغم من اعتذار الموظف المسئول واعتذار المسؤولين في المقاطعة، إلا إنه كان اعتذار غير مقبول من خوانيتا، لأنه وبغض النظر عن الفلوس كمان فالقضاء على العدد ده كله من النحل لا يكفيه أبدًا مجرد الاعتذار.
وكمان وصفت اللي حصل ده بإنه مش مجرد خطأ لكنه جهل، لأننا كبشر مش بنفكر قبل ما ناخد القرارات. حاليًا مسؤولي المقاطعة قالوا إنهم مش هيضيفوا أي رش جديد لجداولهم، لكن الخبراء المتخصصين قالوا إنه من الأساس ممكن تكون استراتيجيات الرش غلط، بدليل إنهم بيرشوا بالنهار، اللي معروف بإنه وقت نشاط النحل ووقت خمول البعوض.
دكتور ”دينيس فان إنجيلزدروب“، الباحث المتخصص في النحل في جامعة مايرلاند، قال إن موت الأعداد دي من النحل في ولاية ساوث كارولينا مكانش ليها لازمة، وكان ببساطة ممكن يتم تفاديها واللجوء لطرق تانية لمكافحة البعوض غير إننا نقتل النحل اللي بيُعتبر قيمة بيولوجية كبيرة ومهمة جدًا، حيث إن النحل بيُعتبر من أهم المُلقحات النباتية لأنه بينقل حبوب اللقاح بين النباتات في أثناء امتصاصه لرحيق الأزهار.
وأضاف ”دينيس“ إن قتل 2 مليون نحلة حالة تم فيها تجاهل كل الطرق السهلة اللي ممكن نواجه بيها مشكلة زي البعوض الناقل لفيروس زيكا، وقال إن قتل النحل مش هو أسوء حاجة، لأن النحل مش هو بس اللي تضرر من اللي حصل لكن كتير من الحشرات المُلقحة للنباتات، وبالتالي فالتعافي هيحصل على وقت طويل، واللي هيكون له بالطبع أثر كبير على الحياة النباتية وعلى البيئة عمومًا.
المصادر: abcnews4 nytimes bigstory washingtonpost
