8 أوراق علمية مرفوضة فازت بنوبل!
كتب: أحمد حسين
مفيش حاجة تضايق عالم أكتر من إنه يقدم ورقته البحثية للنشر في دورات علمية مهمة وتترفض بعد شغل لشهور وسنين طويلة. لحظة تدمير وإحباط عظيمة. تخيل بقى لو مشروعك العلمي اللي اترفض، فجأة كسب جايزة عظيمة، هتحس بإيه؟!
ده اللي حصل مع 8 أوراق علمية أو بحثية اتقدمت لدوريات علمية مهمة واترفضت، وبعد كده فازت بجايزة نوبل. والسبب في ده إن الرفض كان سبب لمراجعتها، والمراجعة أدت بالأوراق دي إنها ماتبقاش مجرد ورقة بحثية في دورية علمية، وإنما بحث علمي فائز بجايزة نوبل.. خلونا نعرف أكتر عنهم:
1. ورقة إنريكو فيرمي المؤثرة عن التفاعل الضعيف
يعتبر التفاعل الضعيف واحد من الأربع قوى المؤثرة في الطبيعة. أول من كتب عن هذا التفاعل هو إنريكو فيرمي سنة 1933، في ورقة بحثية بعنوان ”محاولة لنظرية إشعاع بيتا“ ونُشرت في أحد الجرائد في ألمانيا. لكنها في البداية اترفضت من النشر في دورية (Nature) العلمية لأنهم شافوا إنها نظرية بعيدة عن الواقع تمامًا ومنفصلة عنه.
الورقة البحثية دي كانت السبب في إن إنريكو يفوز بجايزة نوبل سنة 1938 في الفيزياء وهو بعمر الـ37.
2. ورقة هانز كريبس عن دورة حمض الستريك “دورة كريبس”
أيوه، حتى العلماء اللي عندهم نظريات وأبحاث مكتوبة باسمهم اترفض لهم أوراق علمية. كريبس قدّم البحث ده سنة 1937 لدورية (Nature) العلمية، وقالوا إنهم بيعانوا من تراكم في الأوراق العلمية، وإنهم ماكانش عندهم وقت ينظروا في ورقته. كريبس كتب في مذكراته إن دي أول كانت أول مره يترفض له بحث يعمله بعد ما كان نشر حوالي 50 بحث في دوريات علمية مختلفة.
الورقة البحثية كانت باسم ”دور حمض الستريك في التمثيل الغذائي المتوسط في الأنسجة الحيوانية“، واتنشرت في دورية علمية في هولندا. سنة 1953، كريبس أخد جايزة نوبل في الطب بسبب الورقة العلمية دي.
3. ورقة موري جيلمان عن تصنيف الجسيمات الأولية
سبب رفض الورقة دي ماكنش المتن نفسه، كان العنوان. موري جيلمان كتب الورقة العلمية بعنوان ”محور/دوران النظائر والجسيمات الغريبة“ سنة 1953، ولما أرسلها لدورية (Physical Review) اترفضت، فبعتها بعنوان ”الجسيمات الفضولية“ واترفضت برضه، فهما اقترحوا عنوان ”الجسيمات غير المستقرة الجديدة“ فهو رفض.
بعدها، كره موري جيلمان التعامل مع الدورية العلمية دي. في النهاية، جيلمان فاز بجايزة نوبل سنة 1969 في الفيزياء عن نفس البحث ده.
4. ورقة روزالين يالو عن اختراع المقايسة المناعية الشعاعية
سنة 1955، روزالين يالو كتبت ورقة علمية عن طريقة تخلي الأطباء يقدروا يحددوا مستويات الأجسام المضادة في الجسم، وأرسلت الورقة لدورية علمية اسمها (The Journal of Clinical Investigation)، لكن الجريدة رفضتها بسبب إنهم شككوا في صحة البحث نفسه، وقالوا إن البشر مش هيقدروا يعملوا الكلام ده.
الحقيقة إن روزالين يالو أثبتت إن وجهة نظرهم كانت غلط تمامًا، لما فازت بنوبل في الطب سنة 1977، وأصبحت التقنية دي من أكتر التنقيات المستخدمة في الطب علشان يقيسوا بيها الأجسام المضادة في الجسم.
5. ورقة بيتر هيجز عن الموديل الأول لهيجز
سنة 1964، الفيزيائي بيتر هيجز كتب ورقة علمية عن ما عُرف فيما بعد بـ”موديل هيجز“، وأرسل الورقة دي لدورية (Physics Letters) العلمية. الدورية رفضت البحث لأنه مالوش صلاحية في الواقع، يعني ماينفعش يتنفّذ. الحقيقة إن بيتر هيجز اتنشر له بحث تاني سنة 1966 في نفس الدورية، بس الأهم من ده، إنه فاز بجايزة نوبل في الفيزياء سنة 2013، اتأخرت شوية مفيش مشكلة بس المهم إنها جات.
6. ورقة ريتشارد إرنست عن تحديد الرنين المغناطيسي النووي الطيفي (NMR)
ممكن تكون سمعت عن الرنين المغناطيسي النووي أو الرنين المغناطيسي، وهو المسئول عن كشف تفاصيل ديناميكية الجزيئات، شيء مهم جدًا جدًا للكيميائيين وعلماء الكيمياء الحيوية. ريتشارد إرنست أرسل البحث لدورية (The Journal of Chemical Physics) سنة 1966، واترفض مرتين، لحد ما اتنشر في دورية تانية اسمها (Review of scientific instruments).
سنة 1991، ريتشارد إرنست حصل على نوبل في الكيمياء بسبب البحث ده.
7. ورقة دان شيختمان عن اكتشاف شبه البلورات
سنة 1984، دان شيختمان فيزيائي إسرائيلي كتب ورقة علمية عن شبه البلورات، وهي مجسمات وجزيئات صغيرة الحجم متراصة جنب بعضها، وأرسل البحث ده لدورية (Physical Letters)، بس هما رفضوه وقالوا إنه تبع علم ”الميتالورجي“ اللي هو علم استخراج المعادن. سنة 2011، شيختمان فاز بجايزة نوبل في الفيزياء عن نفس البحث.
8. ورقة كاري موليس عن تفاعل البوليمر المتسلسل (PCR)
التفاعل ده يعتبر تفاعل مهم جدًا ويُستخدم في معظم المختبرات يوميًا تقريبًا لتكبير وتحديد شكل جدائل الحمض النووي (DNA strands). أرسل كاري موليس سنة 1993 الورقة العلمية لدورية (Science)، لكنهم رفضوها دون إبداء أي سبب. في نفس السنة دي، حصل كاري موليس على جايزة نوبل بسبب البحث ده.
المصدر: sciencealert
