الساكسفون .. مارلين مونرو الآلات

كتبت: يارا كمال

أيوه هو ده شعوري تجاه الساكسفون. لما تسمعه كده، تبقى مش على بعضك وحاسس بالإثارة، كما لو كانت مارلين مونرو بتتمشى قدامك، زي ما الأوكرديون المسيّك بيفكرني بهند رستم بالملاية اللف كده.

الساكسفون من الآلات اللي عجبت الناس بعزفها لوحدها كده. تفتكروا لما كنا بنتفرّج على التليفزيون المصري الأرضي، وكنّا بنسمع في فواصل البرامج عازف الساكسفون المصري المشهور سمير سرور، وهو بيعزف غنوة لعبد الحليم؟

بس يا ترى الصوت الناعم الخِطِر ده جاي منين؟ أنا عمومًا موضوع إنه إزاي الإنسان استخدم فيزياء الصوت في إنه يعمل مزيكا بكل تعقيدها وجمالها واكل دماغي، فبمناسبة إن النهاردة اليوم العالمي للجاز، وإن الساكسفون من الآلات مرتبطة في أذهاننا بالنوع ده من الموسيقى، خلونا نشوف هي بتطلع صوتها ده ازاي.

الصوت بيحصل نتيجة اهتزاز ما. اللي بيحصل إن جزيئات الهوا اللي قُرب مصدر الصوت، بتتحرّك قدام وورا، وضغط الهوا بيزيد ويقل بنسبة بسيطة خالص،أو بمعنى أصح إن جزيئات الهوا بتنقل الصوت للجزيئات اللي بعدها بإنهم بيضغطوا، ويبعدوا وينقلوا الصوت للجزيئات اللي بعدهم وهكذا. (عن الصوت)  

عدد الاهتزازات في الثانية بنسميه التردد. الفكرة بقى في الموسيقى إن كل نغمة بيبقى ليها تردد، ومهمة العازف إنه يطلّع من الآلة النغمة المظبوطة، والآلة بتبقى مصممة إنها تطلّع تردد النغمة، لو العازف عمل كذا.

طب بالنسبة بقى لآلات النفخ؟ النغمات هنا مرتبطة بطول عمود الهوا جوا الآلة، يعني كل ما تطول الأنبوبة اللي بيمشي فيها الهوا، كل ما الوقت اللي بتاخده الموجة الصوتية في إنها تتعكس من جانب للتاني جواها ما يطول، كل ما التردد بيقل، وبالتالي النغمات بتتغيّر على هذا الأساس. اللي بيفرق في طول الأنبوبة أو طول عمود الهوا جواها بمعنى أصح هو المفاتيح أو الفتحات، وهل هي مفتوحة أو مقفولة.

طيب دلوقتي هل إحنا بننفخ في قربة مخرومة؟ فين الاهتزاز اللي هينتج عنه الصوت؟ الفكرة إن المكان اللي بينفخ فيه العازف يكاد يكون مسدود، ما عدا فتحة صغيرة خالص، بس اللي بيعمل التذبذب اللي في الهوا ده قطعة رفيعة عاملة زي الشريحة اسمها ”reed“.

ده ببساطة إزاي الساكسفون بيشتغل، بس سيبك أنت روّق بالك واسمع التراك ده وأنت هتنبسط، وابقى ادعي لأستاذ أدولف ساكس اللي اخترع الآلة دي سنة 1840:

المصادر:

https://courses.physics.illinois.edu/phys193/Student_Reports/Fall15/Kristin_Miller_Physics193POM_Final_Project_Report_Fa15.pdf

http://newt.phys.unsw.edu.au/jw/woodwind.html

http://newt.phys.unsw.edu.au/jw/saxacoustics.html