6 حاجات مخك بيعملها من غير ما تاخد بالك!
كتب: أحمد حسين
المخ أهم عضو في جسم الإنسان. جملة كاملة مبتدأ وخبر وحقيقية وكل حاجة يعني، وهو ده مربط الفرس، إن المخ أهم عضو في جسم الإنسان، وبالضرورة هيكون عضو مش سهل التعامل معاه، لذلك ساعات مخك بيتصرف بمزاجه، لأنك في النهاية آخرك تقول له إنت نفسك تعمل إيه، وهو يا إما يوافق، يا إما يرفض، على حسب مزاجه بقى.
وهو ده اللي بيعتمد عليه مخرجين السينما في أفلام الرعب بالذات، فكرة خِداع الإدراك، لأنهم بيبقوا عارفين إن المخ هيصور لك اللي فهمه مش اللي إنت عايز تشوفه، زي الساحر اللي بيطلع قدام الجمهور، ويعمل خدعة كلها معتمدة على خِفة اليد وسرعة الحركة، بس مخك مابيترجمش الموضوع ده، وبينبهر برضه عادي لحد ما يعرف الخدعة بتتعمل إزاي.
في بقى بعض الحاجات، مخك بيعملها فعلًا، وإنت مابتكونش واخد بالك منها.. زي:
1. الإدراك الحسي للحقيقة بيحصل في مخك بشكل كامل
بنسمع الأغاني والأصوات من ضغط موجات الهواء وانتقال موجات الصوت من خلالها. وبنشوف الألوان والأشياء والأشخاص، وبندرك وجود كل ده، واللي بيحصل في الحقيقة، إن المخ بيستقبل بس إشارات عن فوتونات جايه له عن طريق النظر. يعني الشيء اللي بنشوفه ده، بيتكون بشكل كامل في المخ، من شوية فوتونات ضوئية، وده شيء في حد ذاته عظيم.
2. بنشوف العالم من خُرم إبرة
إحنا بنبقى فاكرين إننا شايفين الصورة كاملة، لكن اللي بيحصل، إننا بنبص على كل حاجة من خُرم إبرة فعلًا، يعني الحيّز اللي بنقدر نشوفه بعينينا ضيق جدًا، لذلك حاول تمسك ورقة أو كتاب وتبدأ تقرأ، هتلاقي نفسك بتحرك عينيك كتير، ده لأنك صعب تشوف الصفحة كلها ويكون كل الكلام فيها واضح، إنت بتشوف اللي إنت بتركز عليه بس، والباقي بيكون مش واضح أو Out of focus. ومهما تبعد برضه مش هتشوف الصورة كاملة، هو مخنا كده، مابيقدرش يشوف غير الحاجة اللي العين بتركز عليه بس، وبيعدّل الباقي إنه يكون مش واضح.
3. المخ بيشتغل نفسه عادي جدًا
من الحاجات الغريبة اللي بيتميز بيها المخ برضه، إنه ممكن يخدع نفسه عادي، يعني ممكن يصدق إن دراع مطاطي أو دراع مش حقيقي هو دراعك، وبيتأثر فعلًا لو حاجة جات جنبه. الأغرب بقى إنه ممكن ساعات يفتكر دراعك ده مش دراعك، ويتعامل على أساس كده ومايتأثرش لو حاجة جات فيه، بمزاجه يعني برضه زي ما اتفقنا، وساعات ده بيكون مرض نفسي أو عقلي على حسب ما الطبيب يشخّص.
مش بس كده، لا ده ساعات كمان بيتخيل الأشياء المعتادة على إنها مش معتادة. في ست قصتها انتشرت جدًا في وقت ما، الست دي كانت معتقدة إنها مش نفسها، يعني لما كانت بتبص في المراية، كانت بتشوف إن في ست غريبة واقفة في المراية، بس لابسة نفس لبسها، لكن هي مش هي!
4. عقلنا شغّال أوتوماتيك مش مانيوال
يعني، حقيقية إننا بنقدر نسوق عربية على سرعة 120 كيلو في الساعة على طريق دي لوحدها لو فكرنا فيها مش هنعملها، لا ومش بنسوقها بالسرعة دي وبس، ده إحنا كمان ممكن ساعتها نكون بنفكر في أحداث اليوم وبنتكلم وبنسمع أغاني ونغني معاها كمان، كل ده بيحصل وبشكل تلقائي من غير تفكير. يعني ببساطة، لو بتمشي في شارع كل يوم فأنت أكيد حافظ كل حاجة فيه، فممكن تبقى ماشي وبتتكلم في التليفون، ومركّز في الكلام وفي نفس الوقت بتتمشى وتعدي وكل حاجة من غير ما تفكر حتى.
5. الأعصاب بطيئة جدًا
إحنا بنفكر بسرعة وبنحس بسرعة وبنعمل كل حاجة _غالبًا_ بسرعة صح؟ يعني ده معناه إن أعصابنا أو علشان أكون دقيق إشاراتنا العصبية أسرع من الكمبيوتر صح؟ الحقيقة الكلام ده مش حقيقي، على الرغم من سرعتنا في التفكير، إلا إن الإشارات العصبية دي بتتواصل مرات قليلة كل ثانية وموجات المخ بتلف بسرعة 14 إلى 30 مرة كل ثانية. في المقابل بقى، الموجات دي _أو ما يعادلها_ في الكمبيوتر بتلف بسرعة مليون مرة في الثانية، والإشارات اللي بتعادل الإشارات العصبية بتتواصل تقريبًا 10 مليون مرة في الثانية، ومع ذلك إحنا أذكيا جدًا تخيّل؟
6. الوعي ممكن يتقسّم، إنت نص وهو نص
في بعض المرضى مصابين بمرض اسمه ”المخ المقسوم/المنقسم – Split brain“، المرض ده بيخلي المريض المصاب بيه يبقى بيتعامل مع كل نص من مخه على إنه نص منفصل تمامًا ومستقل بذاته، لذلك وعيه وإدراكه بيكون منقسم هو كمان، مش معنى كده إنه بيشوف الحاجة اتنين، بس ممكن يشوف نفس الحاجة بوجهتين نظر مختلفتين، وده زي اللي بيحصل مع مرضى الانفصام أو الـSchizophrenia.
المصادر:
