التقدم في العمر: محاولاتكم للخلود ستبوء بالفشل!
كتبت: مها طه
حاليًا متوسط أعمار البشر فى العالم هو 71 سنة للرجالة و73.5 سنة للستات وفى بعض الدول أكتر من كده زى أسبانيا، اليابان، أستراليا، طب طالما بنقدر نعيش لفترات طويلة كده ليه الإنسان لا يمكن يمنع التقدم في العمر، أو بمعنى أصح لماذا لا يمكن للإنسان له أن يكون خالدًا؟
قبل حوالى 10 آلاف سنة البشر مكانش عندهم الأمل إنهم يعيشوا أكتر من 30 سنة، ومن حوالى 100 سنة بقى متوسط العمر حوالى 50 سنة، وبكده يُعتبر إن البشر حققوا ارتفاع كبير فى متوسط العمر خلال القرن الماضى، وبكده فغالبًا هنفضل نحقق ارتفاع ملحوظ وده نتيجة التقدم العلمى بقى كأمر طبيعي!
الأبحاث اللى اتعملت فى المجال ده كلها أثبتت إن فى مجموعة من العوامل بتدخل مع بعضها للتحكم فى العمر اللى ممكن يوصله الشخص؛ جيناتك والمكان اللى بتعيش فيه ونظام أكلك حتى كمية الأشعة الفوق بنفسجية اللى بتتعرض لها، كمان ساعتك البيولوجية اللي بتظبط إيقاعك الداخلى واللي بتفضل تشتغل لفترة معينة، بمعنى تانى إحنا أصلًا مبرمجين عشان نموت فى الأخر.
فى دراسات اتعملت عشان تعرف إزاى إحنا بنتقدم فى العمر لحد ما نوصل لمرحلة الوفاة، الدراسة ركزت على دراسة عملية انقسام الخلايا فى الجسم، واللى كنتيجة ليها بيبتدى الـDNA يتآكل تدريجيًا!
فى كل مرة بتنقسم الخلايا _دى عملية طبيعية بتحصل طول اللوقت عشان تجدد الخلايا_، بتنسخ الـDNA عشان كل نسخة من الخلية تبقى فيها نسخة من نفس الـDNA الأصلى، الـDNA بيبقى موجود فى الخلايا فى شكل كروموسومات. نهاية الكروموسومات دى بتبقى عبارة عن أجزاء من الـDNA بتُسمى ”تيلومير“ وظيفتها هى حماية أطراف الكروموسوم من البيئة المحيطه بيه عشان ما يتفاعلش معاها ويتغير تركيبه ما قد يؤدى لظهور طفرات خطيرة، المشكلة إنه فى كل انقسام بيبدأ جزء من التيلوميرات دى يتآكل، التيلوميرات دى لما بنفقدها تمامًا الخلية بتفقد قدرتها على الانقسام.
الخلود البيولوجى موجود فعلًا عند بعض الأنواع من الديدان المفلطحة اللي بتقدر تجدد التيلوميرات دي بشكل لا نهائي، وبالتالى مهما انقسمت هتفضل خلاياها محافظة على قدرتها على الانقسام، طب وليه العلم مايطورش طريقة نقدر بيها نحمى أو نجدد التيلوميرات عندنا، وبالتالى نوصل للخلود أو حتى نقدر نطول أعمارنا على الأقل لمدد أطول؟
السبب الرئيسى اللى يخلينا مانقدرش نعمل ده هو السرطان! لما الخلايا تنقسم كده بشكل لا نهائى فهى فعليًا هتتحول لخلايا سرطانية مش ممكن السيطرة عليها وعشان كده عملية التقدم فى العمر هى عملية طبيعية وحقيقة كونية ثابتة تقريبًا.
المصدر
