14 نصيحة بسيطة تساعدك على التخلص من الأكل غير الصحي
كتب: أحمد حسين
ساعات بنفكر يعني _وده مابيحصلش كتير_ إننا ناكل الأكل صحي، ونحاول نبعد عن الأكل اللي في أغلب الوقت بيضر صحتنا، وبيخلينا عُرضة أكتر للإصابة بأمراض كتير. كل ده غير طبعًا عاداتنا الغذائية السيئة اللي لوحدها كفيلة تجيب لنا أمراض للقلب والجهاز الهضمي كده من غير ما نبذل مجهود إضافي!
بعد ما بنفكر ونحاول ناكل أكل صحي غالبًا بنتوقف عن المحاولة لأن الأكل اللي عملنا ماعجبناش أو لأن تحضيره بيحتاج مجهود مننا، وعليه بترجع تاني تطلب بيتزا شرقي من شيخ العرب وأنتِ تطلبي الكومبو من ماكدونالدز! بس خلونا نجرب تاني من خلال 14 نصيحة بسيطة ممكن تبدأ بيهم تاكل أكل صحي.
خلينتا نتفق بس إن كلمة الدايت معناها نظام غذائي، مش بالضرورة ريجيم لتخسيس الوزن بيستمر لمدة شهر أو اتنين وخلصنا، تمام؟ يلا بينا.
1- ابدأ بتوقعات واقعية
كلنا تقريبًا عارفين إن الأكل الصحي مفيد في إنقاص الوزن لكن برضه لازم تبدأ فيه بتوقعات واقعية، يعني بلاش تتوقع إنك بعد 3 شهور هتوصل لوزنك المثالي لأن ده هيحط عليك ضغط ممكن يخليك ترجع تاني تاكل أكل غير صحي أكتر من الأول أصلًا!
2- خليك دايمًا فاكر الدافع لقرارك إنك تاكل أكل صحي
خليك دايمًا فاكر إيه اللي دفعك لإنك تاكل أكل صحي؟ خليك فاكر إنك عملت اختيار في النهاية علشان صحتك. ممكن برضه تعمل قائمة كدة تفكرك بالأسباب اللي خلتك تفكر تختار الأكل الصحي، أو مجرد إيه الفرق اللي هيحصل في حياتك لما تاكل أكل صحي يساعدك إنك تعيش مرتاح حياة أفضل.
3- ماتخليش في البيت غير أكل صحي
حاول ماتخليش في البيت غير أكل صحي لأنه صعب جدًا تفضل تاكل أكل صحي والأكل غير الصحي موجود والليعادة بيكون مشبع بنكهات وزيوت وحاجات مش عارفة ليه بتبقى مثيرة للسعادة والاستمتاع بالنسبة لنا. يعني خلونا نتكلم بصراحة، إحنا غالبًا بنميل للأكل الغير صحي وبنحبه أكتر لأسباب كتير يعني لا داعي لذكرها لأن بعضها بالتأكيد مش مقنع، علشان كده من الأفضل إنك تبعد عنك الأكل الغير صحي ده على قد ما تقدر، الإنسان دعيف يا إخوانّا!
4- ماتاكلش بنظرية ”كل شيء أو لا شيء“
من أكتر الحاجات اللي بتخلي الواحد يزهق من الدايت إنه يعتبره موضوع يا أبيض يا أسود، بمعنى إنه يا إما ياكل كل الأكل الضار غير الصحي يا إما ماياكلش أي أكل خالص، وده شيء مُتعب وبيخليك دايمًا تحت ضغط وحاسس إنه ناقصك حاجة. علشان كده من الأفضل لك يعني لو لخبطت شوية في الدايت إنك تكمّل فيه عادي جدًا ولا كأن حصل حاجة، واعتبر يعني اللي حصل ده ماضي وانقضى يا سيدي.
5- خلّي معاك أكل صحي وأنت بره
حاول على قد ما تقدر تخلي معاك أكل خفيف كده وصحي علشان لو جوعت في أي مكان تقدر تلاقي حاجة تاكلها وماتضركش. يعني مثلًا ممكن تخلي معاك فاكهة زي التفاح أو الموز، أو خضروات زي الطماطم والفلفل والخيار والجزر والخس، لو أنت شغال في مكتب يبقى ممكن تخلي معاك زبادي، يعني حاول عمومًا تخلي معاك أكل صحي لوقت عوزة، وده حل عملي لمشكلة عظيمة للي بيقضوا وقت كبير بره بيتهم وعن تجربة.
6- من بكره دايت ورياضة، ورياضة ودايت
أكيد سمعت في مره عن نظرية الدايت لوحده والرياضة لوحدها، ودي نظرية بالنسبة لي قد تكون جيدة في حالات معينة لكن بالفعل جسمك محتاج تكون معدلاته الصحية كويسة عن طريق الأكل وكمان بيتمتع بلياقة بدنية عن طريق الرياضة. أنا مدرك تمامًا إن في البعض بيعملوا الحاجتين مع بعض لأنهم بيميلوا للوصول للوزن المثالي في وقت أسرع من اللي بيلتزموا برياضة بس أو دايت بس، وجه أحيانا بيكون السبب الأقوى عند كتير من الناس لكن في الحقيقة ده اللي بيحقق المعادلة الأفضل لأجسامنا.
7- حط خطة قبل الأكل من بره!
حاول تحافظ على الأكل الصحي حتى لو روحت مطعم تاكل فيه. حدد خطة لنفسك علشان ماتسرفش في الأكل، بمعنى إنك تحاول يا إما تاكل برضه أكل صحي، يا إما تاكل أكل غير صحي بس بكميات قليلة جدًا.
8- ماتخليش السفر يأثر عليك
لو إنت مسافر في رحلة عمل أو حتى طالع مصيف عشان تتبسط لك يومين ورتوق كده، حاول على قد ما تقدر تقلل من خطر الإفراط في الأكل غير الصحي. دوّر على المطاعم اللي فيها أكل صحي واتعشى فيها، أو خد معاك أكل صحي تكون متأكد إنه مابيفسدش بسرعة، راهن نفسك على إنك هتقدر تبعد عن الأكل الغير صحي وتكمل اللي إنت بدأته.
9- درب عقلك على الأكل!
ده حقيقي، حاول تدرب نفسك على إنك تاكل بعقلك، يعني تخيل إنك شبعان ومش عايز تاكل، وإنك مكتفي تمامًا بالأكل الصحي اللي إنت أكلته، بعد فترة هتلاقي نفسك لوحدك بتحس بالشبع وإنت مكمّل في الأكل الصحي. في اعتقادي الشخصي كتير من الأكل اللي بناكله مش بيكون الدافع وراه جوع إطلاقًا!
10- راقب نفسك
اعمل لنفسك أچندة واكتب فيها يومياتك مع الأكل، أو نزّل أبليكشن على موبايلك لمتابعة الأكل علشان تشجع نفسك على إنك تفضل محافظ على الدايت وتوصل للوزن المثالي اللي إنت بتتمناه، المهم إن الموضوع يكون فيه تشجيع مش ضغط عليك يخليك تهرب على أول باب تلاجة يقابلك!
11- اللمة الحلوة، جروب ثيرابي عشان ناكل أكل صحي
إنك تحاول تعمل دايت في مجموعة أو يكون معاك حد بيعمل دايت، وبيساعدك وبيشجعك على إنك تكمّل. ده بيخليك عندك إستعداد أكبر إنك توصل فعلًا للوزن المثالي. أه قررنا نعمل جروب ثيرابي بس عشان نشجع بعض ناكال أكل صحي، وماله؟
12- ابدأ يومك بفطار فيه بروتين عالي
أول وجبة في اليوم بتكون هي أهم وجبة، فحاول تبدأ يومك بأكل مُتّزن وفيه كمية بروتين مناسبة للجسم (على الأقل 30 جرام)، ده هيساعدك تحرق الدهون وتخسر الوزن أسرع مع التمارين.
13- خليك فاكر إنها مابتحصلش بين يوم وليلة
ممكن ييجي عليك وقت وتكسّل وتحس إنك مش قادر تكمل، ساعتها خليك فاكر إنك بتغير عادات متعود عليها من فترة كبيرة، وفكرة تغيير أي شيء أمر مش سهل، فحاول تفتكر إن الموضوع مش هيحصل بين يوم وليلة، وإنك لازم تكمل علشان توصل للي انت عايزه.
14- اكتشف إيه أفضل حاجة ليك
تقريبًا مفيش طريقة بعينها للأكل هنلاقيها في كتالوج وتكون مناسبة لينا كلنا، فحاول تكتشف بنفسك الطريقة المناسبة ليك والتمارين اللي جسمك محتاجها، لأن هي دي اللي هتساعدك فعلًا توصل لوزنك المثالي. مش معنى إنك بتاكل أكل صحي إنك تاكل أكل طعمه وحش أو أصناف مفروضة عليك، الأكلات حواليك أشكال وألوان والإبداع مالوش أخر!
المصدر
