ياقوت البحر أجمل مخلوقات الأض اللي عمرك ما شوفته
كتبت: مها طه
”ياقوت البحر“ هذا الكائن الجميل اللي حلاوته من حلاوة اسمه بيجمع بين تألق وجمال الفراشات من ناحية وقدرة عظيمة على التخفى من أعدائه من ناحية تانية. أُطلِقَ عليه اسم ”ياقوت البحر“ لأنه بيلمع بألوان كتيرة وجميلة جدًا ولكن فجأة بيختفى عن الأنظار!
”ياقوت البحر“ نوع من القشريات البسيطة اللي بتعيش متطفلة على كائنات أخرى، بيكون موجود فى أى مكان بتتواجد فيه المياه، بيعيش فى المحيطات المفتوحة على السطح ولحد عمق 1000 قدم. ياقوت البحر له أنواع كتيرة جدًا، وكلها بتتميز بألوانها الزاهية اللى بتتراوح من الأزرق للأحمر والبنفسجى، كل نوع من الأنواع دى بيعيش على عمق معين على حسب لونه.
ياقوت البحر الأصفر والبرتقالى والأحمر بيعيش قريب من السطح، فى حين إن الأخضر والأزرق والبنفسجى بيعيش على أعماق أكبر، وده لأن الضوء الخاص بالألوان دى بيتم امتصاصه فى الأعماق فقط. مع ذلك العلماء بيعتقدوا إن النوع الواحد من ياقوت البحر ممكن يُظهر تنوع فى ألوانه عشان يقدر من خلالها يجذب شريك للتزاوج معاه.
وعشان نكون أكثر دقة فلازم نعرف إن ذكور في النوع ده فقط اللي بيتمتعوا بخاصية الألوان، لكن الإناث شفافة. فى موسم التزاوج، يسبح الذكور من ”ياقوت البحر“ بشكل حلزونى للفت نظر الإناث، وكأنهم بيستعرضوا قدامهم. يبدأ الجسم فى إصدار أضواء بشكل متقطع، وكأنه بيبعت إشارات للإناث، المذهل كمان فى الكائن ده هو إن جسمه بيتكون من كريستالات عاكسة للضوء، وبالتالى بتزيد من جمال وتلألؤ ألوانه.
جسم عم ”ياقوت“ بيتكون من سيتوبلازم شفاف بالإضافة للكريستالات العاكسة للضوء، واللى بيتراوح عددهم من 10 لـ 14 طبقة. وللتوضيح، السيتوبلازم هوالمادة الحية الموجودة فى كل خلايا الكائنات الحية، وبتسبح فيها كل مكونات الخلية.
تختلف ألوان “ياقوت البحر” حسب عدد الطبقات اللى بيتكون منها جسمه، وبالتالى قدرته على عكس الألوان اللى بيمتصها. بدأ العلماء فى عمل أبحاث لفصل السيتوبلازم الموجود فى الطبقات دى عن الكريستالات، وأكتشفوا إن سُمك طبقات السيتوبلازم بيختلف ما بين أنواع الكائن ده، ومن هنا استنتجوا إن كل ما كانت طبقة السيتوبلازم سميكة كل ما زادت قدرتها على امتصاص الأشعه الحمراء والبرتقاليه وعكسها.
”ياقوت البحر“ بيعكس الضوء الساقط عليه أيًا كانت زاوية سقوطه لكن الحقيقة إن الزاوية اللى بيسقط بيها الضوء على جسم الكائن ده بتحدد اللون اللى بيعكسه، يعني لما بيسقط الضوء بشكل مباشر على سطح جسمه بزاوية 90 درجة بيبتدى يعكسه كله، وعليه اللون بيكون واضح جدًا، وكل ما قلت الزاوية دى بيبدأ اللون يختفى لحد ما يوصل لمرحلة إن الكائن نفسه يبقى كأنه شفاف.
المصادر: scientificamerican American Chemical Society
