15 معلومة ممكن تكون مش عارفها عن آينشتاين ”الإنسان“!
كتب: أحمد حسين
يعتبر ”ألبرت آينشتاين“ أشهر عالم في التاريخ، ماحدش عايش على كوكب الأرض إلا وعارف مين آينشتاين أو سمع عنه. هو العالم اللي بيتضرب بيه المثل في الذكاء، يعني لما واحد صاحبك يحاول يبان إنه فاهم عنك مثلًا بتقول له: ”يا عم إنت هتعمل لنا فيها آينشتاين؟“. مجموعة كبيرة من الناس تعرف المعلومات الأكثر تداولًا عن آينشتاين عن حياته وإنجازاته كعالِم فيزياء، وإنه أخد جايزة نوبل، لكن كتير برضه مايعرفوش معلومات تانية عن الجانب الآخر من حياة آينشتاين، عشان كده وبمناسبة عيد ميلاده قررنا نقول لكم عن 15 حاجة عن آينشتاين الإنسان، يلا بينا:
1- كان بيلعب على الكمانجة
آينشتاين كان بيحب الموسيقى، وكان بيقول إنه لو ماكانش فيزيائي كان هيبقى موسيقي. الموضوع بدأ من وهو عنده 5 سنين، والدته كانت عازفة كمان مبتدئة وشافت إن عزفه للكمان هيخليه ذو مكانة في المجتمع. آينشتاين ماكانش حابب موضوع الكمان ده لحد ما وصل لسن 13 سنة، واكتشف سمفونيات موتسارت، ساعتها بدأ حبه لعزف الكمان اللي كمل معاه طول حياته.
2- ماكانش بيعرف يسوق عربيات
آينشتاين عمره ما اتعلم يسوق عربية، وكانت وسيلة انتقاله الوحيدة هي العجلة. وفي جواب بعته لابنه إدوارد، كتب له آينشتاين إن الحياة زي ركوب العجل، علشان تكون متوازن لازم تفضل تتحرّك.
3- آينشتاين ماسابش المدرسة
في اعتقاد سائد عند بعض الناس بيقول إن آينشتاين ساب المدرسة وماتعلمش، والحقيقة إن الكلام ده خاطيء تمامًا. آينشتاين وهو عنده 15 سنة ساب المدرسة بتاعته في ألمانيا، وانتقل مع عيلته لإيطاليا ثم إلى سويسرا، وهناك مانجحش في دخول المعهد الفيدرالي السويسري، لكنه دخل مدرسة تانية في سويسرا. آينشتاين رجع بعد فترة وقدّم تاني في المعهد الفيدرالي السويسري وتم قبوله وفضل لحد ما اتخرج سنة 1900.
4- اينشتاين مضى على جواب بيحث على تطوير الأسلحة النووية
بعت آينشتاين جواب للرئيس الأمريكي روزفلت بيشجعه فيه على إعطاء زميله الفيزيائي ”ليو سزيلارد“ الفرصة لعمل أبحاث تخص الأسلحة النووية. يُقال إن آينشتاين وقّع الجواب ده وبعته علشان كان خايف من إن النازيين يطوّروا قنابل ذريّة. بعد ما تم قبول الاقتراح، وتم البدء في المشروع اللي أُطلِقَ عليه ”مشروع مانهاتن“، لم يتم السماح لآينشتاين بإنه يشتغل فيه بسبب ميوله اليسارية. آينشتاين قال إنه مالوش علاقة باللي حصل في المشروع، وكل اللي عمله كان خدمة لزميله الفيزيائي علشان يبدأ مشروعه مش أكتر، زائد طبعًا الخوف من هتلر وجيشه.
5- آينشتاين وبيرتراند راسل والبيان الرسمي ضد استخدام الأسلحة النووية
كتب بيرتراند راسل (عالم الرياضيات والفيلسوف المعروف) هو وآينشتاين و9 آخرين بيان رسمي وضحوا فيه أخطار استخدام الأسلحة النووية وأدانوا استخدامها سنة 1955.
6- اتعرض عليه منصب رئاسي في إسرائيل ورفض
سنة 1952 رئيس وزراء إسرائيل ”ديفيد بن جوريون“ عرض على آينشتاين منصب رئاسة وزراء إسرائيل، واللي قابله آينشتاين بالرفض لأنه كان شايف إنه طول حياته كان بيتعامل مع الأشياء، ومابيعرفش يتعامل مع الناس، وماعندوش الخبرة الكافية اللي تؤهله لمنصب زي ده.
7- آينشتاين ماكسبش جائزة نوبل على النظرية النسبية
تقريبًا كل الناس اللي يعرفوا آينشتاين عارفين إنه أخد جائزة نوبل، لكن كتير منهم مايعرفش إن آينشتاين أخد جائزة نوبل في الفيزياء عن نظرية التأثير الكهروضوئي اللي اتكلم فيها عن حركة الفوتونات، مش النظرية النسبية خالص.
8- آينشتاين كان طفل بطيء التعلّم
آينشتاين لما كان طفل كان بطيء التعلم وبطيء الكلام، لدرجة إن والده ووالدته افتكروا إنه مصاب بالتوحد أو أي مرض نفسي يمنعه من الكلام ومن التعلّم، علشان كدة قرروا يعرضوه على طبيب لما بقى عنده 3 سنين تقريبًا. بعدها آينشتاين بدأ يتكلم لكنه في العموم فضل طول حياته غير محب للكلام.
9- توماس هارفي سرق عقله!
لما توفى آينشتاين وصى بإن جثته تتحرق، فدكتور توماس هارفي اللي كان بيعمل تشريح لجثته شاف إن مخ اينشتاين ده ثمين جدًا وخسارة يتحرق فسرقه وخباه عنده لمدة 20 سنة تقريبًا.
10- آينشتاين مر بزواج كارثي
مرّ زواجه الأول من ”ميليفا ماريك“ بصعوبات كتير، وعلشان كان عندهم أبناء، قرروا _لفترة من الزمن_ إنهم يحافظوا على زواجهم. قرر آينشتاين إنه يحط بعض القواعد اللي هتخليهم يحافظوا على الزواج، منها إن ميليفا تنضّف أوضته كل يوم وتجيب له الأكل 3 مرات وتسيبه لوحده لما يطلب ده. باختصار كانت كأنها بتخدمه بس بعيدًا عن الزواج، طبعًا الكلام ده لم يستمر وانفصلوا الاتنين عن بعض.
11- آينشتاين اتجوز بنت عمه
زوجة آينشتاين التانية كانت بنت عمه ”إلسا آينشتاين“، اتجوزها وهو عنده 40 سنة وما خلفوش أي أولاد.
12- آينشتاين ”سرق“ قانون E=mc2
معادلة تكافؤ الكتلة هي أكتر معادلة فيزيائية معروفة في العالم كله تقريبًا. في دراسة جديدة أجريت سنة 2013 بتقول إن آينشتاين سرق أو ممكن نقول اقتبس المعادلة دي من عالم نمساوي مش معروف اسمه ”فريدرش هاسينول“، واللي بحسب الدراسة دي كتب المعادلة قبل آينشتاين بسنة. يُقال أيضًا إن معادلة فريدرش كان فيها شيء خاطيء، وإن آينشتاين هو اللي توصّل للمعادلة الصحيحة بشكلها المعروف.
13- نظرية آينشتاين الخاطئة
عادي، معروف إن العلماء بشر عاديين وبيغلطوا، ومن ضمنهم طبعًا آينشتاين. قبل ما العلماء يتبنوا فكرة إن الكون نشأ نتيجة للانفجار الكبير، كان المعتقد السائد هو إن حجم الكون ثابت مفيهوش تغير، بمعنى إن الحجم الكلي للكون ثابت تمامًا، وإنه بيُعتبر نظام مغلق على نفسه. النظرية دى كان أكبر أنصارها آينشتاين نفسه، وكتب نظرية معروفة باسم ”كون آينشتاين“ أو الكون الثابت بتتكلم عن نفس النقطة وكان بيحاول يدافع عنها بشراسة، لحد ما اكتشف “إدوين هابل“ العلاقة ما بين ”التحول للأحمر“ والمسافة (قانون هابل)، واللي وضحت بشكل قاطع إن الكون بيتمدد. آينشتاين تخلى بعد كده عن فكرته دي تمامًا، وأشار ليها بإنها ”أكبر خطأ“ فى مسيرته كلها.
14- ذاكرة آينشتاين كانت ضعيفة
يُقال إن العلماء غالبًا بتكون ذاكرتهم ضعيفة، لكن دة شيء مش أكيد، بس الأكيد إن آينشتاين كانت ذاكرته ضعيفة جدًا، فكان بينسى الأسماء والمواعيد وأرقام التليفونات بصورة مستمرة.
15- جاليليو العالِم المُفضل لآينشتاين
آينشتاين كان شايف إن جاليليو هو أبو العلوم وإنه _بالنسبة له_ أهم عالِم في التاريخ.
المصادر
