كن فيلا ترى الوجود جميلا!
كتبت: يارا كمال
فيه مثل بيقول ”أجسام البغال وعقول العصافير“ على الناس اللي حجم جسمهم كبير وعقولهم صغيرة. يبان إن الفيل عقله صغيّر وخصوصًا مع شكله الطيب وزلومته، إلا إن مخ الفيل كبير زي جسمه، لإن حجم مخ الحيوان بيبقى كبير، كل ما كان حجم الجسم كبير، وبالتالي ذاكرة الفيل كبيرة ويتضرب بيها المثل وسط الحيوانات. بس الموضوع مش مجرد ذاكرة، لأ ده كمان حيوان ذكي جدًا، ذكي كمان ذكاء عاطفي يخليه من أكتر الكائنات الاجتماعية والمبتكرة والخيّرة على وجه الأرض.
خلونا نعرف بسرعة كام معلومة مهمة عن الفيل الجميل عن جدارة..
- الأفيال بتعرف كل فرد في القطيع بتاعها، لإنها بتقدر تعرف لحد 30 منهم من خلال الشكل أو الريحة، وده بيكون مفيد جدًا في الهجرة أو في مواجهة الأفيال العدوانيين.
- كمان الأفيال بتفتكر وبتتعرف على علامات الخطر اللي ممكن تقابلها. يعني لو فيه فيل وهو طفل واجه جفاف، بيبقى سهل عليه يتعرّف على علامات الجفاف لو قابلها تاني، عشان كدة القطيع اللي بيمشي مع الأمهات العواجيز من الأفيال، بتكون فرص بقاءهم أكبر عشان الخبرات اللي جمعتها الأمهات دي.
- الأفيال كمان بتتعرف على الأماكن المهمة بالنسبة لها بعد مرور فترة طويلة على زيارتها. بس ذاكرة الفيل مش مرتبطة بس بالحاجات اللي بتساعدها على البقاء. الفيل مثلًا مش بيفتكر أفراد قطيعه وخلاص، لأ ده بيفتكر كمان الكائنات التانية اللي ممكن تكون أثّرت فيه. يعني مثلًا كان فيه فيلين عملوا عرض مع بعض في السيرك، واتقابلوا بعد 23 سنة واتبسطوا جدًا لما قابلوا بعض. أه والنبي ده ولا البني آدمين ويمكن أحلى كمان.
- الأفيال كمان بتتعرّف على كائنات غيرها، يعني لو الفيل مرتبط بإنسان من عشرات السنين هيفتكره لما يشوفه تاني.
السبب في ده إن الأفيال عندها أكبر مخ ما بين الثدييات اللي بتعيش على البر، نتيجة لحجمه الكبير، لدرجة إنه نسبة ذكاؤه العاطفي تقريبًا قد نسبة الذكاء العاطفي للشمبانزي. كمان حصل تطوّر لمخ الفيل مشابه للتطور اللي حصل في مخ الإنسان، وده خلى الاتنين عندهم خلايا عصبية كتير ونقاط اشتباك عصبي كتيرة، وعنده قشرة دماغية وحُصين (Hippocampus) متطورين جدًا.
الحُصين ده مرتبط بالمشاعر اللي بتساعد على التذكّر من خلال تشفير الأحداث والتجارب المهمة وتحويلها لذكريات طويلة المدى. معنى كدة إن ذاكرة الفيل مش مجرد ذاكرة بتفتكر كل حاجة وخلاص، لأ دي معقدة وبتتكيّف حسب أهمية الأحداث اللي بتخزّنها. الذاكرة دي أحيانًا بتخلي الأفيال كائنات حساسة، الفيل من الحيوانات القليلة اللي بتعاني من اضطراب ما بعد الصدمة.
غير بقى العاطفية والرقة دي، القشرة الدماغية المتطورة دي بتساعد الفيل إنه يوجد حلول مبتكرة للمشاكل، وبيحلها بالتعاون مع أقرانه. الأفيال كمان تقدر تخدع الباحثين، وتقدر تفهم مبادئ الحساب البسيطة.
الأفيال كمان بتقدر تتواصل باستخدام كل حاجة بدءًا من الإشارات الجسدية والأصوات. فهمهم لتركيب الجمل الصوتية بيقول إن الأفيال ليهم لغتهم الخاصة. الأفيال لا ينقصها الحس الفني، لدرجة إنها بتقدر ترسم وتختار وتمزج الألوان والعناصر المختلفة بشكل جمالي.
https://www.youtube.com/watch?v=yQv5mE42Yos
كمان الأفيال بتقدر تميّز 12 نغمة موسيقية وتعيد الألحان. في الفيديو ده فرقة بتتكوّن من بشر وأفيال، وشوفوا بقى إزاي الأفيال ظابطة الإيقاع بشكل بديع!
العظيم في الأفيال إنها مش بس كائنات ذكية، الأكتر من كدة إنها كائنات بتحس. يعني مثلًا بيعمل مراسم للحداد والدفن لموتاهم، ويزوروا مدافنهم. كمان الفيل بيراعي وجود الكائنات التانية، يعني مثلًا فيه فيل رفض يثبّت جذع خشب في حفرة عشان كان فيها كلب نايم. لو فيل قابل إنسان مجروح، ممكن يقف له حارس ويطبطب عليه بالزلومة ويهوّن عليه. مع ذلك، الفيل ممكن ينتقم. الفيل ممكن يهاجم قرى فيها بشر بعد عمليات صيد غير مشروع هائلة، وده بيقول إنه في الغالب الفيل كان بينتقم.
الأفيال كمان واحدة من الحيوانات القليلة اللي قدرت تتعرّف على نفسها في المراية. كل ده معناه إن الأفيال كائنات ذكية وحساسة وواعية جدًا. بس طبعًا البشر مابيتعاملوش على هذا الأساس. البشر دمروا الأماكن اللي بيعيش فيها الأفيال في آسيا وبيصطادوهم في أفريقيا عشان ياخدوا أنيابهم، وعمومًا بيتحبسوا ويتعاملوا وحش في العالم كله. ده إحنا اللي نستاهل نتحط في جنينة الحيوانات والمصحف.
المصدر:
