عملات البيتكوين المشفرة والثراء الإلكتروني!
كتب: أحمد حسين
قبل رمضان على طول كان اتنشر خبر القبض على شخص ما معاه 13 ألف دولار وبيتاجر في العُملة باستخدام عملة إلكترونية اسمها ”البيتكوين – Bitcoin“. الخبر كان غريب شوية للبعض، يعني أخبار الاتجار بالعملة بيكون فيها عادةً كلام زي إن الشخص كان معاه دولارات ويورو وإسترليني أو ين ياباني حاجات في هذا السياق يعني، لكن يقبضوا على شخص علشان معاه دولارات وعملات من البيتكوين على النت! هو يعني إيه بيتكوين أساسًا؟
عملة البيتكوين .. أبسطهالك
البيتكوين هي شكل من أشكال العملة الإلكترونية، يعني اتوجدت وبيتم تداولها إلكترونيًا بشكل كامل من غير ما يكون لها عملات معدنية أو ورقية. العملات دي انتشرت بشكل كبير في السنوات الماضية، وخلقت سوق مال خاص بيها أصبح يعرف حاليًا باسم ”العملات المشفرة – Cryptocurrency“. اللي اخترع البيتكوين مبرمج ياباني اسمه ”ساتوشي ناكاموتو – Satoshi Nakamoto“، واخترعها علشان تسهل على الناس مصالح البيع والشراء بينهم على النت.
طيب إحنا بنستخدم البيتكوين دي ليه؟ البيتكوين ممكن تُستخدم لشراء أي شيء إلكترونيًا أو من على النت يعني، وفي الوقت ده، بتكون البيتكوين أشبه بالدولارات واليورو والين والعملات دي، لأنك بتشتري عن طريقها أشياء قانونية، لكن الفرق بيكون في نسبة الضرائب اللي على الفلوس اللي بتدفعها، يعني لو اشتريت بالدولار مثلًا، فنسبة الضرائب اللي هياخدها البنك، أعلى من بكتير مقارنةً بإنك مش هتدفع أي ضرائب وإنت بتستعمل البيتكوين.
في استخدام تاني للبيتكوين، أكثر جدلًا بكتير من الاستخدام العادي واللي بيخلي الشكوك والتساؤلات تدور حوالين جدوى استخدامها وضرره، وهو استخدامها على الـDeep web أو الويب العميق، وده اللي بيمثل حوالي 96% من مساحة المواد اللي على الإنترنت. الويب العميق ده ببساطة هو المكان اللي جوجل وبينج وكل مواقع البحث مابتقدرش تروح له. الثقب الأسود للشبكة العنكبوتية، نقدر نعبّر عنه بجملة ”الداخل مفقود والخارج مولود“ فعلًا، لأن أي حد بيدخل جوه ومابيكونش مأمّن نفسه، قول عليه يا رحمن يا رحيم.
ليه كل الخطورة والأفورة وجو السسبنس ده؟ ببساطة علشان المكان ده موجود عليه هاكرز محترفين ومفيش فيه أي حماية للبيانات، يعني حتى لو دخلت عليه بشكل مش ظاهر ومختفي (Anonymous)، هيتعرف عنك كل حاجة (عنوانك، أرقام تليفوناتك، أرقام كروت البنك، أي معلومات مهمة عنك) باختصار هتكون مكشوف تمامًا ليهم، وساعتها ممكن يستخدموا البيانات دي في إن هما يسرقوك أو يبتزّوك مثلًا.
ده غير إن المكان ده عليه كل متبعي الفساد في العالم تقريبًا، من تجار مخدرات، لتجار مواد إباحية للأطفال، لتجار جنس وعملة وسلاح، يعني مكان مش لطيف خالص إنك تروحه، وإذا قررت تروحه مثلًا، فهو مش مكان لطيف برضه تقول هدخل أبص بصة وأطلع، لأنك لو دخلت فعلًا ممكن ماتطلعش وحياتك تتشقلب بشكل إنت مش هتحبه.
المهم إن البيتكوين في المكان ده، ممكن يتم استعمالها في شراء أي صفقة مشبوهة، لأنها مالهاش أرقام في البنوك فصعب جدًا تتبعها، والتعامل بيها بيكون بين شخصين بس من غير وسيط _اللي هو البنك_، وقيمتها متغيرة بشكل مستمر (يعني ممكن في يوم تبقى بـ500 دولار وفي يوم تبقى بـ300 كده يعني). كل ده غير إنها بيتم تداولها من خلال برامج حسابية/رياضية، يعني هي حرفيًا بتكون عبارة عن شوية أرقام مش أكتر من كده.
طيب وشوية الأرقام دي، إزاي بتتحول لفلوس؟ بتتحدد قيمتها في الوقت ده، والشخص اللي بيوصل له البيتكوين، بيحسب حسبته ويحولها فلوس كاش، من خلال حسابه في البنك، أو من خلال شخص زي تاجر العملة اللي اتقبض عليه واتكتب عنه الخبر اللي اتكلمنا عنه فوق ده.
في بعض خبراء الاقتصاد، بيقولوا إن البيتكوين كمان كام سنة هتبقى هي العملة المستخدمة في كل التعاملات الحياتية لينا تقريبًا، لكن ده برضه مش شيء أكيد. باختصار، هنشوف في السنين القادمة مستقبل البيتكوين ومدى تأثير العملة دي على الاقتصاد العالمي هيكون إيه.
المصادر:
