شيرلوك هولمز.. المختل الذي نحبه!
كتب: أحمد حسين
يعتبر شيرلوك هولمز من أشهر الشخصيات الروائية في العالم، تقريبًا مفيش حد مايعرفش مين شيرلوك هولمز أو حتى سمع عنه. الشخصية اللي كتبها سير ”أرثر كونان دويل“، ظهرت في أفلام ومسلسلات وحتى كارتونات كتير جدًا، لأنها فعلًا من أكتر الشخصيات المحبوبة في عالم الروايات والسينما والتليفزيون خاصة لمحبي الإثارة والتشويق.
في واحدة من حلقات المسلسل الأحدث ”Sherlock“، كان في ظابط بيكلّم شيرلوك وبيقول له إنه مختل عقليًا (Psychopath)، فشيرلوك قال له إنه مش مختل عقليًا لكنه مختل اجتماعيًا (Sociopah). بس هي الفكرة بقى، هل في فرق بين المختل عقليًا والمختل اجتماعيًا؟ وشيرلوك هولمز بيمثل أنهي واحد فيهم؟ وهل ممكن نحب حد يكون فعلًا مختل عقليًا أو اجتماعيًا؟
الفرق بين المختل عقليًا والمختل اجتماعيًا
الخبراء النفسيين بيقولوا إنهم في الأغلب بيكونوا قريبين من بعض جدًا من ناحية الصفات الشخصية يعني. وغالبًا المصطلحين دول نفسهم مش موجودين في الكتاب الرسمي للصحة العقلية، وبيتم الاستعانة بـ”اضطراب الشخصية غير الاجتماعية – Antisocial personality disorder“.
بس بشكل عام يعني، بيكون في بعض الصفات المختلفة بينهم، زي مثلًا الضمير، الشخصية المختلة بشكل عام مابيفرقش معاها أوي مشاعر الناس على قد ما بيفرق معاه شكله هو ومشاعره الخاصة، لذلك الشخصية المختلة عقليًا مابتتعاطفش مع أي حد، حتى لو هو اللي غلطان على فكرة، يعني مثلًا لو في حد مختل عقليًا عمل أي حيلة/خدعة علشان يسرقك، فهو هيسرقك من غير ما يحس بتأنيب ضمير مثلًا.
على النقيض، المختل اجتماعيًا بيكون عنده ضمير في أحيان بسيطة، أينعم بيكون في الأغلب الضمير ده ضعيف، يعني لو أذى أي شخص بشكلٍ ما، احتمال يشعر بالذنب، لكنه مش هيقدر يبطّل اللي بيعمله. شيرلوك هولمز في أحد حلقات المسلسل في بنت معاه في الشغل، حاولت تقدم له هدية بشكل لطيف، لكنه كسفها، بس في النهاية حس إنه غلط فاعتذر لها، وده مثلًا تصرف مايخرجش من مختل عقليًا.
في نوع تاني من المختلين عقليًا، هو النوع اللي مابيخافش، بمعنى إنه مابيحسبش الخطوة كتير قبل ما يقوم بيها، والغريب إن النوعين دول _على الرغم من تصنيفهم كمختلين_، إلا إن في دراسة اتعملت السنة دي بتقول إننا بنعجب فعلًا بالشخصيات دي، حتى لو كانوا شخصيات صعب التعامل معاها، لكننا في النهاية بنعجب بيها.
كمان المختل عقليًا مش لازم خالص يكون شخص عنيف، ممكن جدًا يكون شخص لطيف، لأنه بيكون ذكي جدًا لدرجة إنه بيقدر يمثّل المشاعر بشكل كويس جدًا، يعني ممكن يمثل السعادة وهو مش حاسس بيها حتى، والنوع ده بيكون اسمه ”المختل الجذّاب – Charismatic Psychopath“، وده بيستخدم حيل تانية غير العنف علشان يوصل للي هو عايزه، حيل زي التلاعب بالشخص اللي قدامه عن طريق الكلام لأنه _زي ما قولنا_ بيكون ذكي جدًا وفي الأغلب متحدّث لبق.
يعني هما الاتنين _المختل العقلي والمختل الاجتماعي_ بيكونوا أنانيين، بس الفرق إن واحد فيهم بيكون حاسس إنه أناني أو غلطان، والتاني بيكون شايف نفسه صح طول الوقت. بس في العموم، الاتنين بيكون صعب التعامل معاهم شوية، حتى لو في حد فيهم لا يظهر منه ذلك، لأنهم هما الاتنين ببساطة مابتفرقش معاهم العواقب.
باختصار يعني، إحنا بنحب شيرلوك هولمز حتى لو كان مختل، علشان هو ذكي ولمّاح جدًا، زائد إننا بحسب الدراسات يعني، بنميل بشكل ما للشخصيات الذكية اللي بيكونوا فيهم خلل كده، سواء خلل إجتماعي، أو خلل عقلي.
المصادر:
