«أنا عايز أبقى باتمان يا عاطف!».. إزاي تبقى باتمان في 5 خطوات؟!
كتب: أحمد حسين
ليه باتمان؟! لأنه بطل حقيقي مش شبه الأبطال الخارقين اللي كل اللي بيميزهم إنهم اتولدوا بقوة خارقة أو بقت عندهم بفعل الصدفة، باتمان اشتغل على نفسه كتير 😀 يعني هو لا بيطير ولا بيطلع شعاع من عينيه ولا بيجري بسرعة تقترب من سرعة الضوء، ولا عنده خاتم أخضر بيحقق له أمانيه، ولا بيشفي نفسه بسرعة، إنسان طبيعي بس.. عنده فلوس كتير! أه الصراحة كان واقع على ثروة بس برضه هيفضل السؤال هل الفلوس لوحدها ممكن تخليك باتمان؟
لأ طبعًا.. الموضوع أكبر من كده ومن الخمس خطوات اللي إنت مستنيهم زيي قبل ما أكتب المقال ده بس خد لك فكرة برضه.
إزاي أبقى باتمان لو سمحت؟
في مقال على موقع «Gizmodo» عالم أعصاب وحركية (Kinesiology) اسمه “بول زيهر” شرح فكرة إمكانية تحوّل شخص عادي لباتمان، وقال إنه حاول يعمل حاجة زي اختبار واقعية للأبطال الخارقين، وأقربهم للواقع كان باتمان وقام بتأليف كتاب كامل عنه اسمه (Becoming Batman: The possibility of a superhero)، وبدأ في الاختبار ده بالقدرات الجسدية لباتمان أو بروس واين.
مبدئيًا، القدرات والمهارات اللي عند “بروس واين” أو باتمان يعني توازي مهارات مُعلّم فنون قتالية وكمان بطل أوليمبي. هنا زيهر بيتكلم في القدرات الجسدية اللي تقدر تتحمّل كل ده، وبيقول ببساطة إن في ناس تقدر وناس ماتقدرش، ناس جسمهم عنده القدرة على الاستجابة للتمرينات الرياضية، وناس قدرة جسمها أقل، يعني بيحتاجوا وقت أطول علشان يقدروا يوصلوا للمهارات المطلوبة علشان يبقوا باتمان.
باتمان بحسب الكوميكس والأفلام مُعلّم فنون قتالية، يعني يعرف كونج فو وجينجيتسو وجودو وملاكمة وغيرهم، ده غير إن سرعته هي سرعة عدّاء أوليمبي ولياقته لياقة بطل جمباز صيني، وبيتحرك بخفة شديدة وجسمه مرن، كل ده علشان توصل له مش هتاخد أقل من 28 سنة، ده علشان تبقى “Master” أو متمكن يعني. طيب إيه كمان غير القوة الجسدية مطلوب؟
باتمان مش بس شخص عضلاته قوية وبيعرف يضرب ويجري وينط من فوق عمارات طويلة، ده كمان أستاذ في العلوم والكيمياء والتاريخ والجغرافيا، وعالم مُتبحّر في علم النفس الإجرامي وعلم وظائف الأعضاء، وراجل على درجة عالية من فهم ودراسة التكنولوجيا، ومبتكر ومخترع وخبير بالأسلحة، ده غير صفات ومهارات تانية كتير بتحتاج وقت كبير علشان تُصقل وتبقى راكزة كجزء من شخصيته، فهل يعقل إن شخص عنده 28 سنة يقدر يدرس كل ده؟ ومش بس كده، ده باتمان كمان مُحقق، يعني المفروض يكون عارف كتير عن تاريخ العصابات والمجرمين وعنده معلومات عن الطب الشرعي وغيره.
طبعًا الإلمام بكل ده صعب جدًا خصوصًا لو حاولت تعمل كل ده قبل ما توصل 30 سنة، علشان يبقى لسه فيك صحة تبقى فارس الظلام وتهزم الأشرار وتحمي مدينة جوثام وكده، عشان كده الإجابة على سؤال: هل في حد يقدر يكون باتمان؟ هي طبعًا لأ، باتمان أه بيديك الانطباع -بحسب زيهر- إنه حقيقي وواقعي، لكن ده مش حقيقي _إحنا اتضحك علينا أيوه_.
طيب سيبك من القدرات والمهارات وخلينا نرجع للفلوس.. هل لو الواحد معاه كل الثروة دي يقدر يتجاوز العقبات دي ويبقى باتمان بفلوسه؟
ليه بيل جيتس مش باتمان؟
ليه ماحدش من المليارديرات اللي في العالم مابقاش باتمان؟ بيل جيتس مثلا ليه مابقاش باتمان؟ أي حد من عيلة ساويرس ليه مابقاش باتمان؟ 😀 الحقيقة إنه الموضوع مش بالسهولة دي، الموضوع مش محتاج مبالغ خرافية بس، لا إنت محتاج تبقى عارف تستخدمها إزاي بالظبط، يعني تشتري كهف وأجهزة كتير تركبها فيه، تشتري عربية خاصة بيك أو تصنّع واحدة، تصنع بدلة كاملة بعبايتها وتكون مضادة للرصاص والنار، تبتكر أسلحة كتير، كل ده محتاج تعمله بالفلوس والمهارات اللي عندك علشان تبقى باتمان.
يعني مثلًا، البدلة على بعضها كده ممكن تقف عليك بمليون دولار وشوية، العباية لوحدها مصنوعة من البوليمر فهتكلّفك حوالي 40 ألف دولار، العربية مثلًا بالأسلحة اللي فيها والدهان الأسود هتكلفك حوالي 18 مليون دولار، ولو هتشتري معاها الموتسكيل الخاص اللي ظهر بيه باتمان في سلسلة أفلام فارس الظلام فهيقف عليك بحوالي مليون ونص دولار، ولو هتزوّد عليهم الطيّارة اللي ظهرت في آخر أفلام السلسلة دي هتكلّفك حوالي 60 مليون دولار على الأقل.
نيجي بقى للأسلحة، مسدس الكلّاب اللي بيطير بيه باتمان ممكن يتكلّف حوالي 50 ألف دولار، الكاميرا الحرارية حوالي 15 ألف، النضّارة بتاعة الرؤية الليلية رخيصة بحوالي 5 آلاف دولار بس، طبعًا ده كله غير الأسلحة اللي بيرميها باتمان على المجرمين اللي بيقابلهم، ودول مش هيتكلفوا مبلغ كبير يعني حوالي 10 آلاف دولار بس مش قصّة.
لو هتضيف عليهم بقى القصر بالكهف قول هتخش لك في حسبة من 600 لـ700 مليون دولار، فالموضوع مش بسيط خالص ولا حتى لساويرس نفسه، مين هيصرف كل المبالغ دي علشان في الآخر يقعد يجري ورا مجرمين ويحارب الجريمة بليل وفي الأخر يتهموه إنه بيهد الدولة مثلا وبيعرض أمن البلاد للخطر. فالفكرة لا في خمس خطوات لا عشرة، وبعدين بذمتك إنت لو معاك الفلوس دي _فرضا طبعا مش أكتر خلينا واقعيين يا رجالة_ هتقرر تبقى باتمان ولا بالزيريان؟ البرنس اللي مقضيها على يخته ومعاه مزيكته وحور عينه، محافظ على صحته وعايش حياته وطموح أي شاب مننا يكون مكانه و و و نقول إيه بس 😀
قصر عائلة واين
