خدعوك فقالوا: إيفرست أعلى قمة في العالم!
كتبت: مها طـه
من زمان أيام المدرسة كنت بحب أوي مسابقات المعلومات العامة، لدرجة إني ممكن أقعد أذاكر وأحفظ في معلومات عامة، وكانت دايمًا المعلومات عن الأطول والأعمق والأكبر وغيرها هي الأساس، فمثلًا نهر النيل هو أطول نهر في العالم، وطوكيو أكبر مدينة في العالم، وجبل إيفرست هو أعلى جبل في العالم، لحد ما اكتشفت إن ده مش حقيقي!
السير ”إدموند هيلاري“ كان أول واحد تسلق قمة جبل إيفرست، اللي بيُعتبر واحد من ضمن سلسلة جبال الهيمالايا الممتدة على حدود الصين ونيبال وشمال الهند. من يومها ولحد يومنا هذا في مئات المغامرين ومحبي رياضة التسلق بيسافروا بس عشان يتسلقوا إيفرست وصولًا لقمته كل سنة، وهو ده سبب شهرته كأعلى جبل في العالم، لكن هل هو فعلًا أعلى قمة جبل في العالم؟
يعني إيه أصلًا أعلى قمة في العالم؟
خلينا نقول إنه جبل إيفرست مش الأطول في العالم ولا حاجة، لكنه الأعلى فوق مستوى سطح البحر. بمعنى أدق قمة إيفرست بتُمثل أعلى ”ارتفاع“ فوق مستوى سطح البحر، فقمة إيفرست موجودة على ارتفاع 8850 متر فوق مستوى سطح البحر. مع ذلك في جبال تانية بيتم اعتبارها الأطول قياسًا للمسافة الكلية ليها بشكل رأسي، يعني من قاعدة الجبل الأصلية الممتدة في عمق البحر ولحد قمته.
ماونا كيا: الجبل الأطول
جبل ”ماونا كيا“ في هاواي بيتم اعتباره كجزيرة من ضمن الجُزر، ونشأ كنتيجة لبركان خامد كان في وسط المحيط الهادي. قمة الجبل ده بيصل ارتفاعها لـ4205 متر فوق مستوى سطح البحر، وده طبعًا أقصر بكتير من جبل إيفرست، بس بقياس المسافة بين قاعدته اللي بتمتد في قاع المحيط الهادي وصولًا لقمته اللي فوق مستوى سطح البحر، هنلاقي إنه الأطول بطول يوصل لأكتر من 10 آلاف متر.
جبل ماونا كيا مش بس الأطول في العالم، لكنه كمان بيُعتبر موطن لأكبر مرصد فلكي في العالم. على ارتفاع 4267 متر فوق مستوى سطح البحر بيقع المرصد وبكدة بيكون أعلى من 40% من الغلاف الجوي للأرض. وبيُعتبر ده المكان المثالي للمرصد مش بس بسبب ارتفاعه ده، لكن لأن البيئة فوق الجبل جافة للغاية وتقريبًا خالية من الغيوم.
لو فاكرين إن كده خلاص عرفنا وحددنا مين الأطول، فأحب أقولكم إنه لأ ده في كمان جبل تالت، وهو جبل ”شيمبورازو“ اللي بيُعتبر واحد من سلسلة جبال الإنديز اللي بتمتد على طول الساحل الغربي لأمريكا الجنوبية، واللي بتمتد في 7 دول؛ الأرجنتين والإكوادور وبوليفيا وبيرو وتشيلي وكولومبيا وفنزويلا، لكن السؤال بقى إزاي ده كمان من أطول الجبال في العالم، أو بمعنى أصح الأطول؟!
جبل شيمبورازو: الأعلى فوق مركز الأرض
بلغ ارتفاع جبل ”شيمبورازو“ في الإكوادور 6310 متر، طبعًا كده هو مش الأطول ولا حاجة، لا من حيث الارتفاع فوق مستوى سطح البحر ولا من حيث الطول الكلي بشكل رأسي، لكنه الأعلى لو حطينا في الاعتبار مركز الأرض!
الأرض بالطبع مش مسطحة لكنها كمان مش كروية، الأرض شبه مُفلطحة من عند القطبين ومُنبعجة من عند خط الاستواء، وكأنه الأرض حد داس عليها من عند القطبين فالجناب ضربت، وعشان كده مركز الأرض مش على مسافة متساوية في كل الأماكن في العالم، وبالتأكيد هو أبعد ما يمكن عند خط الاستواء.
ولأن جبل شيمبورازو بيقع درجة واحدة جنوب خط الاستواء، ولأن الجبل ده كان عبارة عن بركان قديم، فالمسافة بين قاعدته فوق الأرض لحد قاعدته الحقيقة في مركز الأرض حوالي 2 كيلومتر، وبكدة يبقى طوله الإجمالي أكتر من 8000 متر. وعشان كدة بيُعتبر الجبل ده هو الأعلى بالنسبة لمركز الأرض.
في النهاية، لازم نقول إن تحديد الأطول أو الأعلى بيكون بالنسبة للمستوى اللي بنقيس عليه، يعني لو الأطول من حيث مستوى سطح البحر فهو ”إيفرست“، ولو الأطول من قاع المحيط فهيكون ”مونا كيا“، أما لو الأطول من مركز الأرض فهو ”شيمبورازو“.
ومع ذلك هتفضل قمة إيفرست من أهم المزارات في العالم اللي بتجذب هواة التسلق، وهتفضل الزيارات مستمر ليها كل سنة، ومش عشان جمال جبال الهيمالايا، لكن عشان هي القمة الأشهر في العالم، وغالبًا وحتى بعد ما تقرأ المقال ده، لو حد سألك إيه أطول قمة في العالم هتقوله ”إيفرست“، أو لو قلت له غير كده يبقى لازم تبعتله المقال.
المصادر: geology livescience businessinsider telegraph.co.uk sciencealert
