حين تتقيأ الذبابة على طعامك
كتبت: مها طه
ذبابة واحدة بس كفيلة إنها تخلي بعض الناس ترمى اللي بتاكله عشان طبعًا بتقلق من الجراثيم اللى ممكن تبقى شايلاها وتنقلها للأكل، لكن هل فعلًا لازم نقلق من وقوف ذبابة على أكلنا؟
الحشرات عمومًا مئات من الفصائل المختلفة، وجودها مهم للبيئة لأنها بتساعد على عملية تحلل المواد العضوية، وبالتالى رجوع المواد المهمة للبيئة تانى.كمان الحشرات بتساهم فى عملية تلقيح النباتات عن طريق نقل حبوب اللقاح من نبات لآخر من نفس النوع؛ زى حبوب اللقاح اللى بتلتصق بجسم النحل وتنقلها.
والغريب إن بعض الحشرات تلعب دور فى علاج الجروح الملوثة. لكن، الذباب بالذات يُعتبر من أكتر الحشرات اللى بتهدد صحة الإنسان، و ممكن ينقل الأمراض وطبعًا مفيش أكتر من الذباب المنزلى حوالينا فى كل مكان تقريبًا خاصًة فى شهور الصيف، اللي بيزيد فيها بشكل كبير ومزعج جدًا.
الذبابة المنزلية اسمها العلمى هو ”Muscadomestica“، و هى من أكتر الحشرات انتشارًا فى العالم كله، دايمًا موجودة قريب من البيوت، وعشان كده أطلقوا عليها اسم الذبابة المنزلية، وأحيانا بيطلق عليها اسم ”ذبابة القذارة“ لربطها الدائم فى ذهننا بالتعفُن، الحيوانات الميتة، والبراز.
طيب خلينا نتكلم عن دورة حياة الذبابة المنزلية؛ الذبابة بتضع البيض، اليرقات تفقس وتخرج منها، تبدأ تتغذى على المواد العضوية اللى غالبًا بتكون موجودة فى القمامة أو أى بقايا حيوانية ثم بتتحول لشكل ”العذراء“ _حشرة غير بالغة جنسيًا وغالبًا غير قادرة على الطيران_، بعد كام يوم بتتحول لحشرة بالغة بتعيش تقريبًا لمدة شهر، وخلال الشهر ده تقدر تضع المئات من البيض، وهكذا.
أما عن انتقال الأمراض فالذبابة نفسها مش بتكون حاملة للأمراض دى لكن ناقلة لها من الأماكن اللي تواجدت فيها. لو فاكر إن الذبابة دى بتكون بس واقفة عند أكلك فانت غلطان لأنها غالبًا كانت واقفة فى مقلب قمامة أو على جثة حيوان ما قبل ما تجيلك، وطبعًا القمامة دى بتكون مليانة أنواع مختلفة من الطفيليات والأمراض.
الناموس عنده القدرة على نقل الأمراض لأنه بيمص الدم، وفى نفس الوقت بينقل أنواع مختلفة من الأمراض خلاله، لكن الذبابة معندهاش أسنان، فبالتالى هى ماتقدرش تعضك، لكنها بتسيب آثارها من الطفيليات ومسببات الأمراض الملتصقة بجسمها وأقدامها، زوّد على كل ده إن الذبابة _ لامؤاخذة يعني_ بـ ”ترجَع“ أو تتقيأ على أكلك كمان، طب إزاي؟!
الذبابة ماتقدرش تقطم من أكلنا لأنها من غير أسنان، فعشان تقدر تاكل من أكلنا بتقوم بإفراز لعاب على الأكل، اللعاب ده بتكون فيه إنزيمات هاضمة بتذيب جزء من الأكل عشان تقدر الذبابة تمتصه فى شكل سهل الهضم على معدتها. تخيل بقى لو قدرت الذبابة تقضي وقت طويل متجولة على أكلك، أكيد هتبدأ تزيد احتمالات نقل الأمراض اللى ممكن تكون شايلاها على جسمها وبالتالى تهدد صحتنا.
فى معظم الحالات اكتشاف ذبابة على الأكل مش معناه إننا مضطرين نرمى الأكل كله، ومع ذلك يبقى احتمال إنها فعلًا تكون نقلت بكتريا أو فيروس معين فى أثناء وقوفها على الأكل، فى نفس الوقت حتى لو الذبابة وقفت على الأكل فخطوة واحدة منها مش ممكن تؤدى لإصابة شخص سليم عادى بالمرض.
الذبابة بمجرد ما بتنزل على الأكل بتبدأ تقوم بعملية فرز اللعاب بالشكل اللى شرحناه عشان يسهل عليها امتصاص أكبر قدر ممكن من الأكل وهضمه، وزي ما قلنا كل ما زاد وقت وقوف الذبابة على الأكل، كل ما زاد احتمال إنها تسيب وراها أى طفيليات أو غيرها. الطفيليات دى ممكن تتضاعف على الأكل فى خلال دقائق.
طبعًا المناطق اللى بيكتر فيها وجود الذباب بتبقى احتمالات نقل الأمراض فيها أعلى. الحل بيكون فى الاهتمام بالنظافة العامة، واستخدام المبيدات الحشرية _وإن كنت لا أفضلها_ لتقليل الذباب قدر الإمكان.
المصادر: theconversation iflscience
