تحويل الفضلات لطاقة.. انسف حمامك القديم!
كتبت: مها طه
من فترة كده انتشر على الفيسبوك كلام عن أتوبيسات بتشتغل بطاقة الفضلات، طبعًا الموضوع كله كان عبارة عن هزار من نوع ”تبرع بفضلاتك“ وحاجات كده. لكن الحقيقة إن العلم في سبيل الحصول على حلول للمشكلات، بيحاول دايما يخرج بره الصندوق!
أزمة الطاقة اللي محتمل يتعرض لها العالم بسبب نقص الموارد غير المتجددة للطاقة، دفعت العلماء يبحثوا عن طُرق رخيصة آمنة بيئيًا وفي نفس الوقت متجددة، عشان تكون الحل المثالي للمشكلة دي. وطبعًا مفيش يعني أكتر من الفضلات متهيألي، البشر عمرهم ما هيبطلوا ياكلوا وبالتالي مستحيل مش هيكون ليهم فضلات.
تقدر تتخيل إن حوالى 2.3 مليار شخص فى العالم عايشين من غير تواليتات مطابقة لمواصفات النظافة والآمان وده اللى دفع بعض العلماء فى المملكة المتحدة لتصميم تواليت جديد، هيخضع للتجربة فى أفريقيا خلال السنة دى، رخيص والأهم إنه كمان مُنتج للطاقة!
تحويل الفضلات لطاقة
التواليت ده صديق للبيئة ومُعتمد على تقنية النانو فى تصنيعه، وبتدعمه مؤسسة بيل وماليندا جيتس، استغرق صنع التواليت 3 سنين. لو نجحت التجارب الأولية للتواليت ده، فتطبيق التقنية دي هيبقى سهل جدًا، وهيبقى من الممكن استخدامها فى كل الأماكن تقريبًا.
بعد استخدام التواليت بتنزل الفضلات فى القاع، القاع ده بيلف بزاوية 270 درجة فبينزل الفضلات للمكان اللى بيتم فيه ترسيبها وتبخير جزيئات الماء منها، بعدها بيتم فصل جزيئات الماء وتنقيتها من أى عوالق من الفضلات أو أى مسببات للأمراض عن طريق الغشاء المصنوع بتقنية النانو، جزيئات الماء الناتجة عن العملية دى ممكن يتم تكثيفها واستخدامها فى الأغراض المنزلية فى التنظيف أو فى رى النباتات.
أما عن جزيئات الفضلات اللى تم فصلها، فدي بيتم حرقها وتحويلها لرماد بينتُج عنها حرارة. الطاقة اللى هتنتج عن عملية الحرق دى هتبقى كفيلة بتشغيل عملية الفصل كلها بالإضافة لجزء هيفيض عنها ممكن استخدامه فى شحن بعض الأجهزة الصغيرة زي الموبايلات، أما عن الرماد الناتج فممكن استخدامه كسماد للتربة.
وفي حالة كنت قلقان بقى من الريحة اللى ممكن تنتج من العملية دى كلها فمتقلقش الغطاء بتاع التواليت محكم جدًا وبالتالى هيمنع خروج أى روائح منه.
صناع التواليت ده بيخططوا لتوزيعه بشكل تجارى بتكلفة بسيطة، واختاروا غانا عشان تبقى أول دولة يتم فيها التجارب الأولية للتواليت ده. التواليت ده صممه مجموعة من الباحثين فى جامعة كارنفيلد. استخدام التكنولوجيا فى مجال الحفاظ على النظافة يعتبر خطوة مهمة فى المجال ده، فريق البحث سعيد جدًا بالوصول للنتايج دى واللى هتتيح إستخدام مراحيض عامة نظيفة وغير ناقلة للأمراض وفى نفس الوقت يتم من خلالها الاستفادة من الفضلات.
المصادر: nanomembranetoilet cranfield.ac.uk gizmag theguardian
