.
ليه وإزاي؟

العملات المعدنية طريقك لتقليل حرارة الكمبيوتر!

كتبت: مها طـه

معظمنا بيعاني الأيام دي مع الكمبيوتر وإنه بيسخن بسرعة. تبقى قاعد بتشتغل أو بتذاكر أو حتى بتتفرج على فيلم، وفجأة تلاقي الكمبيوتر هنج وفصل، والسبب طبعًا درجة الحرارة العالية، إذا كان إحنا مش مستحملين. المهم بقى إنك غالبًا يا إما هتفصله وتريحه وبعدين تبقى تجرب تاني وربنا يعوض عليك بقى في وقف الحال ده أو إنك هتلاقيه مش راضي يفتح تاني أصلًا وفي الحالة دي عليك وعلى مهندس الصيانة.

إن فاتك الياباني مش هيرجع تاني

واحد ياباني بقى من مُستخدمي تويتر كان بيواجه نفس المشكلة دي مع جهازه، فقرر إنه يحلها ويقولنا على الحل النهائي (الأسهل)، واللي هو ببساطة عبارة عن شوية عملات معدنية تحطهم على الجهاز لتبريده، وده كله باستخدام الديناميكا الحرارية، الموضوع محتاج شرح أكتر، صح؟

أجهزة اللاب توب بيبقى جواها مروحة، واللي دورها هو تخفيض درجة حرارة الجهاز. في حالة العمل لمدة طويلة على الجهاز مع ارتفاع درجة حرارة الجو أصلًا، ممكن المروحة دي ماتقدرش تستحمل درجة الحرارة وتفصل. في الحالة دي الجهاز بيقفل، الصورة دي بتوضح توزيع درجات الحرارة المئوية في الجهاز، عن طريق المسح الحراري باستخدام الديناميكا الحرارية.

Screen_Shot_2016-06-07_at_4.30.03_pm

النحاس هو حل حرارة الكمبيوتر العالية

بناءًا على المعلومات دي، بدأ الياباني ”أكينوري سوزوكي“ يرص 10 ين مصنوعين من النحاس على سطح اللاب توب، وده لأن النحاس موصل جيد للحرارة أكتر من الألومنيوم أو البلاستيك، واللي بتتصنع منهم أجسام معظم أجهزة اللاب توب.

طبقًا لقوانين الديناميكا الحرارية، ده معناه إن طول ما العملات المعدنية درجة حرارتها أقل من درجة حرارة الجهاز، فهي هتمتص الحرارة منه، وبالتالي تحافظ على درجة حرارة طبيعية للجهاز. ده نص التويتة الأصلية لسوزوكي (مكتوبة باللغة اليابانية طبعًا)

واللي ترجمتها تقريبًا هي ”إذا كان لدى أي شخص مشكلة مع جهاز اللاب توب لأنه يسخن بشدة، ولا تنخفض درجة حرارته، فحاول استخدام 10 عملات من الين، وهذا لأن النحاس المصنوعة منه هذه العملات موصل أفضل للحرارة من الألومنيوم أو البلاستيك المصنوعة منه أجهزة اللاب توب، وبالتالي فهو جيد في طرد الحرارة من الجهاز“.

وطبعًا زي ما بيحصل على طول على الإنترنت وفي وسائل التواصل الإجتماعي، حد يكتب حاجة وتنتشر بسرعة كبيرة. بدأت ناس كتير تعمل (retweet) أو مشاركة للتويتة دي، وبدأوا بالفعل ينفذوها، وينزلوا صور لأجهزة اللاب توب بتاعتهم وهي عليها العملات النحاسية، ومش بس أجهزة اللاب توب الموضوع امتد مع بعض الناس لأجهزة الديسك توب أو الكومبيوتر المنزلي يعني.

مدى نجاح الفكرة

عشان نكون واضحين برضة، فالفكرة لسه مش مُثبتة علميًا يعني، ومحتاجة للبحث وفقًا للأساليب العلمية عشان يتم إقرارها، وده بعد الاختبار وتجميع النتائج وتكرار التجربة في ظروف مختلفة، ومقارنة كل النتايج ببعضها، لكن وفي نفس الوقت كمان التجربة اللي عملها ”سوزوكي“ وانتشارها بين ناس كتير بدأو في تنفيد الفكرة قالوا إنها نجحت معاهم، بيؤيد إن الفكرة تكون ناجحة، أو على الأقل بيدي أمل في إننا نلاقي حل سريع وعملي ومش مُكلف للمشكلة.

تبقى المشكلة الأخيرة بقى وهي إنك مش ياباني، وبالتالي العملة عندنا مش الين، لكن يسعدني أقولك إن الجنيه المصري بيدخل فيه النحاس بنسبة كبيرة وبالتالي ممكن تستعمله وانت متطمن، جربوا الطريقة دي وخصوصًا في الأيام الحر دي، بس طبعًا لازم يكون الجنية بارد، أقولكم حطوا الـ10 جنيه عملات معدنية دول في الفريزر ومنهم على اللاب توب وإن شاء الله تنجح وندعي لعم سوزوكي.

المصادر:    interestingengineering  g9toengineering sciencealert1

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى