بدائل مزيل العرق : 5 بدائل طبيعية تفرفشك، وتنقذ الآخرين!
كتبت: مها طه
وإحنا داخلين على الصيف وحر بقى وفرهدة، حرام مع الجو وظروفه تبقى كمان ريحة العرق علينا لتقضي على ما تبقى من أنفاس جوانا لزوم إننا نعيش، أنا أحيانًا بحس يا جماعة بالذات في محطة المترو إن الريحة بتأثر على مجالات الرؤية عندي _مش عارفة دي تهيؤات ولا إيه_.
فقبل ما ندخل في تفاصيل هقولكم النصيحة الواجبة في كلمة واحدة: الاستحمام ثم الاستحمام ومعلش كمان مرة الاستحمام! صحيح إحنا داخلين على أزمة مياه بس معلش لازم نعمل كدة حفاظًا علينا وعلى الأخرين، ثانيًا بقى أوصيكم بمزيلات العرق كوسيلة مساعدة، ولو عند أي حد أي قلق بخصوص استعمال أى نوع من أنواع مزيلات العرق فممكن تقرا المقال ده عشان تتطمن: عن ”مزيل العرق“: عباس متأخر على الجامعة وواخدها جري!
أما لو تبقى عند أي من حضراتكم هاجس ما أو قلق ناحية الموضوع أو مريض كلى مثلًا ومينفعش تستخدم مزيلات العرق، أو حتى كنتِ بنت أو ست بتهتم بجمالها وبتخاف من أثر استخدام مواد كيميائية على الجلد، ففعلًا مفيش أى مشكلة، مش عاجباك كل أنواع مزيلات العرق، يبقى نرجع للطبيعة ، ونستخدمها عشان نفرفش نفسنا وننقذ البشرية كلها.
1. الشبّة
أكيد معظمنا فاكرين فيلم ”30 يوم في السجن“، لما ثلاثي أضواء المسرح حبوا يعملوا مقلب في ”محمد رضا“، فقاموا حطوا شبّة على العدس، فلما أكل هو وباقي المساجين العدس، بقهم لزق في بعضه، ومعرفوش يتكلموا، أيوه هي الشبّة دي، وطبعًا نقصد الشبّة المطحونة اللي عاملة زي البودرة.
الشبة عبارة عن بللورات كبيرة وناعمة من كبريتات الألومنيوم والبوتاسيوم، والحقيقة إن الفرق بينها وبين كلوروهيدرات الألومنيوم اللي بتدخل في صناعة مزيلات العرق واللي بيميزها عنها وبيخليها أصح، إن بللورات كبريتات الألومنيوم والبوتاسيوم حجمها كبير لدرجة إنها بتؤدي وظيفتها في منع العرق، وفي نفس الوقت الجلد مش هيقدر يمتصها زي ما بيحصل مع مزيلات العرق فتسد المسام وتسبب ضرر على المدى الطويل.
الشبّة بيتم استعمالها عن طريق خلطها بأي سائل مع دهن منطقة الإبطين بعدها، بس نصيحة يعني مية الورد أو المسك أنسب حاجة عشان كمان تديك ريحة حلوة.
2. البيكنج صودا مع نشا الذرة
البيكنج صودا برضه ممكن نجيبها من عند العطار، وبتُعتبر طريقة سهلة جدًا للتخلص من رائحة العرق عن طريق خلط 1/8 معلقة شاي من البيكنج صودا مع شوية مياه، بس مش لحد الذوبان يعني، ويتحطوا عادي تحت الإبط، كمان ممكن يضاف نشا الذرة للخليط ده والفايدة هنا عظيمة لأن في الحالة دي مش بس هنمنع ريحة العرق لكن كمان هيمنع الرطوبة وظهور العرق على الهدوم، الخليط بيتكون من 6 معالق من نشا الذرة لكل معلقة بيكنج صودا.
3. عصير الليمون
الحقيقة إنه بالنسبة لي الليمون من أحلى الفواكه الموجودة في العالم، واستخدماته لا تُعد ولا تُحصى، نحطه على السلطة ماشي، تعمله عصير مع نعناع يبقى قمة الانتعاش، وتخيلي بقى كمان إنه ممكن يُستخدم كمزيل عرق لأن حمض الستريك الموجود في الليمون بيقتل البكتريا المُسببة لريحة العرق، والحقيقة إن الناس اللي بتستعمل الليمون بتشكر جدًا فى نتايجه في إزالة ريحة العرق، وده اللي صرحت بيه ”جينيفر بالمر “، الرئيس التنفيذي لخط إنتاج المنتجات العضوية للعناية بالبشرة للنيويورك تايمز، وقالت إنها بتستعمل شرائح الليمون كل يوم كمزيل عرق تحت الإبط، المهم بس التأكد من إن الإبط مش مجروح أو بعد إزالة الشعر مباشرةً، حيث إنه في الأخر يعني ده حمض.
4. الكحول
أكيد كلنا عارفين الكحول اللي بنشتريه من الصيدلية عشان تطهير الجروح وغيره، الكحول ده بيكون مُخفف لكنه قوي جدًا في قتل البكتريا المُسببة لريحة العرق، كل اللي عليك، إنك تجيب بخاخة وتملاها بالكحول وترش تحت الإبطين مع دعك أو فرك خفيف، طبعًا ممكن نضيف للكحول أي زيت عطري عشان يديه ريحة حلوة ويعطر الجسم، ويا سلام لو زيت شجرة الشاي لأنه مش بس هيديك الريحة الحلوة لكنه كمان له مفعول في التخفيف من رائحة الجسم أصلًا.
5. زبدة الشيا وفيتامين E
وده عبارة عن خليط منزلي من مكونات طبيعية، عبارة عن 6 معالق كبيرة من زبدة الشيا، و6 معالق كبيرة من البيكنج صودا، و4 معالق كبيرة من نشا الذرة، و4 معالق كبيرة من زبدة الكاكاو، وكبسولتين فيتامين E، بالإضافة لزيت عطري.
ندوب كل المكونات دي مع بعضها ماعدا الزيت، ويتم تقليبهم مع بعض ثم إضافة الزيت عليهم، وبعدها نصب الخليط ده في أي علبة مثلًا _تكون نضيفة طبعًا_، ونحطه في التلاجة لحد ما يتماسك، المقادير دي ممكن تملى ربع علبة الكريم العادية بتاعة حضرتك، والحقيقة هي سهلة جدًا.
أنا متوقعة إن زبدة الشيا ممكن تدوخ البعض منكم أو تكون غالية حبتين على البعض الآخر، كما إن الوصفة دي بتحضيرها للمهتمات أكتر بالوصفات والخلطات وعندها روح التجريب عالية وقادرة على تكوين علاقات صداقة مع العطارين وتجار الجملة بتوع مستحضرات التجميل، فلو حستيها صعبة عليكِ وعلى الأربعة التانيين اللي فوق.
زبدة الشيا
كبسولات فيتامين E
أخيرًا لازم نقول إن الاستحمام والاهتمام بالنظافة الشخصية مش بس مفيدين لحضرتك وللمحافظة على جسمك، لكنها كمان مفيدة جدًا للي حواليك، لأن الناس اللي بتركب المترو والمواصلات العامة، ملهاش أي ذنب، إنها تستحمل الحر وقرف المواصلات والزحمة، وكمان ريحة العرق الرهيبة، واللي كلها عوامل بتخليك وإنت نازل من المواصلة عاوز تنتحر، ده إن أصلًا مغبتش عن الوعي جواها.
