”النعناع“ يروق الدم يعطر الفم وكله بجنيه!

كتبت: مها طه

أكيد صادفت ولو لمرة واحدة بيّاع البونبوني النعناع في المترو أو في الأتوبيس مش فارقة بقى المهم إنك أكيد قابلته. تلاقيه داخل عليك كده وبيحاول يقنعك بجملة موسيقية على شاكلة ”نعناع .. يروق الدم.. يعطر الفم.. يجلي السنان ويمنع الدوخان“.

لو فكرتك عن النعناع إنه بس عبارة عن الشاي المظبوط بالنعناع بعد أكلة تقيلة، أو سلطة الزبادى بالخيار والنعناع، أو حتي اللبان بالنعناع، تبقى حقيقي ظلمت النعناع. البيّاع في المترو ماكنش بيكدب عليك على فكرة، النعناع فوايده أكبر بكتير من مجرد إنه من مُكسبات الطعم والريحة الطبيعية وعشان نعرف الوجه الأخر له، تعالوا ندخل هذا العالم الأخضراني الجميل ونتعرف على فوايد صحية مُدهشة ليه.

نبدأ بأمراض الجهاز الهضمي: ”راحتك في الورقة دي“ 

• متلازمة القولون العصبي:

طبعًا بمجرد ما يتم ذكر القولون العصبي، فحدث ولا حرج، كتير من المصريين مصابين بالمتلازمة دي وغالبًا ما بيكون الحل اللي بيقدروا يتعايشوا بيه مع هذا الواقع المؤلم _جدًا الحقيقة_ هو النعناع، واللي بيدخل في أدوية كتير لعلاج القولون العصبي وأثبت نجاحه في تخفيف الأعراض وتحسن الحالات بشكل عام. أظهرت الأبحاث اللي أُجريت على عينة من المرضى إن استعمال النعناع آمن للأطفال والكبار بالإضافة لإن نسبة 50% من المرضى اللي أُجري عليهم البحث ظهر عليهم تحسُن ملحوظ كنتيجة لاستعماله.

• التقلصات والغازات:

بما إننا كمصريين معظمنا بيعك في الأكل، ده طبعًا غير طريقة أكلنا البعيدة تمامًا عن الأكل الصحي وأقراص الكربون اللي بنضربها في محاولة لتقليل مخاطر اضطرابات القولون، والتقلصات وأحيانًا الغازات والانتفاخ ومش عاوزين ندخل في تفاصيل أكتر من كده. هنا الحل برضه جايلك مع النعناع أو تحديدًا زيت النعناع اللي بيدخل في تصنيع أدوية فعّالة زى ”بيسكوبان“ لأن له تأثير فعّال بيعمل ارتخاء في عضلات الأمعاء، وبالتالي تقدر الغازات تخرج بسهولة، وطبعًا تخفف من ألم البطن، فلو بتعاني من إنتفاخ أو غازات، ورقتين نعناع على كوباية الشاي، كفيلة تخليك زي الفل.

• عسر الهضم واضطرابات المعدة:

لو حاسس بعسر هضم أو أي اضطرابات في المعدة فالنعناع هو اللي هيريحك. طبقًا للأبحاث، فخلط 90 جم من زيت النعناع مع زيت الكراوية بتحسن بشكل كبير من الشعور العام بعسر الهضم واضطراب المعدة عند 67% من المرضى. فلو حاسس بأي حاجة من دي، اشرب كوباية مياه، وحط عليها نقطتين من زيت النعناع، والدنيا هتبقى تمام.

• النعناع للأم وللطفل:

كلنا تقريبًا عارفين النصيحة العظيمة اللي غالبًا بتوجهها السيدات الكبار للأمهات الجدد، إن لو الطفل بيعيط كتير وخصوصًا في أول 3 شهور من عمره يبقى ممكن يكون حاسس بمغص وغازات، فساعتها ببرونة فيها كراوية ونعناع دافي هتريحه من المغص، وفي الحقيقة ده كلام علمي جدًا، ده غير كمان إن النعناع مفيد للأم في أثناء مرحلة الرضاعة عشان يخفف آلام وتشققات الحلمة الناتجة عن الرضاعة.

 

أمراض الجهاز التنفسي ”وأدي الربيع عاد من تاني“ للأسف!

• السُل:

كلنا عارفين مرض السُل اللي بيصيب الجهاز التنفسي وتحديدًا الرئتين، بيسبب كُحة عادةً مصحوبة بنزيف، بتتم الإصابة بيه عن طريق عدوى بكتيرية، ويُعتبر مرض خطير وأحيانًا ممكن يسبب الوفاة. النعناع بقى بيقلل الالتهاب الناتج عن الإصابة بالسُل وكمان بيعتقد بعض الباحثين إنه له قدرة على منع تفاقم العدوى.

• حساسية الانف

حساسية الأنف والمعروفة باسم (حمى القش)، ممكن التخفيف من أعراضها زي الصداع والعطس والإحساس بحكة (هرش) في الانف والفم والحلق وأحيانًا الكُحة عن طريق استخدام مُستخرجات أوراق النعناع.

• الربو

بيصيب الرئة وهو عبارة عن التهاب في الحويصلات الهوائية ويُعتبر مرض مُزمن، النعناع بيحتوي على حمض الروزمارنيك (الموجود في الروزماري كمان)، واللي بيساعد على تقليل الالتهابات دي.

• فوايد عامة للجهاز التنفسي:

زيت النعناع بيُعتبر طارد للبلغم ومضاد للاحتقان، وبيساعد على تطهير الجهاز التنفسي، فاكرين ”الفيكس“ اللي كنا بندهنه لما نحس بتعب وبرد، أهو زيت النعناع بيحسن من حالة الجهاز التنفسي في الوقت ده، وممكن كمان يتم استنشاقه من رذاذ للأنف بسبب أثره في تخفيف احتقان الأنف والكُحة كمان وأعراض البرد.

أنواع السرطانات المختلفة ”العدو اللدود“

• الغثيان الناتج عن العلاج الكيميائي

إضافة زيت النعناع على مية الشرب له تأثير قوي جدًا على تقليل الغثيان الناتج عن العلاج الكيميائي للأنواع المختلفة من السرطانات، وبيُعتبر زيت النعناع على قد ما هو علاج فعّال للحالات دي، هو كمان علاج غير مُكلف على الإطلاق مقارنةً بأنواع تانية من الأدوية.

• سرطان البروستاتا

النعناع بيحتوي على مادة المنثول، واللي ليها أثر فعّال على تثبيط نمو خلايا سرطان البروستاتا.

• تقليل أثر الإشعاع

النعناع ممكن يحمي الخلايا اللي بتتعرض للعلاج بالإشعاع من أخطار تلف الـDNA بتاعها، وده لأن دايمًا العلاج الإشعاعي بيبقى من أبرز آثاره السلبية، هو موت الخلايا المحيطة بالخلايا السرطانية كمان بسبب تأثيره على الـDNA فيها.

أمراض أخري مختلفة:

• تحسين الذاكرة

ريحة النعناع النفاذة بتُعتبر مُنشط للذاكرة وبتحسن جدًا من الوعي خصوصًا إنها حلوة جدًا، ويمكن للسبب ده المخ بيربط بينه والإحساس بالإنتعاش وكأنه بيعمل ”ريفريش“ لمخك.

• يعطر الفم ويجلي السنان

أهو ده من ضمن الحاجات المشهورة جدًا عن النعناع، والدليل إنه غالبًا وقبل ظهور اللبان بالبطيخ والشمام والفراولة، كان اللبان بالنعناع هو المسيطر عشان تعطر بقك وتقضي على ريحة الفم الكريهه، وكمان دخوله في معظم أنواع معجون الأسنان، كل ده مش من فراغ، زيت النعناع بيحتوي على ”الكلوروهكسين“ واللي بتقلل من البكتريا اللي بتعيش على الأسنان وفي تجويف الفم وبتسبب مشاكل الأسنان وريحة الفم الكريهه.

• الصداع

زيت النعناع بيساعد في تخفيف آلام الصداع، وده عن طريق رش كام نقطة على قطعة قماش أو حتى على معصمك، وبعدها تبدأ تستنشقه، وده هيقلل من إحساسك بالصداع، وممكن كمان يتم تدليك الجبين والوجنتين بيه عشان يكون مفعوله أسرع.

• الإجهاد والتوتر

حاول تضيف نقطتين من زيت النعناع في مياه الاستحمام، أو حتى تحطهم على الجسم مباشرةً قبل الاستحمام، ده هيساعد جدًا في التخفيف من التوتر والإرهاق، ولو عندك فوّاحة (شبه المبخرة بس بيستخدم فيها زيت مش بخور) حط عليها كمان نقطتين في الحمام وإنت بتاخد دش لأن ده هيزود من الشعور بالراحة.

• الجلد والشعر

استخدام زيت النعناع في عمل المساج أو إضافته للشامبو و ”الشاورجيل – Shower gel“ بيفيد الجلد والشعر لأن له خصائص مُطهرة ومضادة للجراثيم واللي بتساعد في تهدئة البشرة والتخلص من القشرة أو القمل.

• ألم العضلات

كلنا ممكن نحس بالشد العضلي أو الإجهاد بعد ممارسة رياضة عنيفة أو حتى أي مجهود بدني مش متعودين عليه، زيت النعناع بيُستخدم لعمل المساج عشان يساعد في تخفيف آلام العضلات، وعشان كدة بيُستخدم في مراهم الشد العضلي والمراهم المُستخدمة للمساج.

بعد كل اللي عرفناه ده أكيد مكسوفين من نفسنا إننا حصرنا النعناع في الدورالثانوي أوي ده، وأكيد عرفنا برضه ليه محمد منير غنى مخصوص لنعناع الجنينة المسقي في حيضانه يا جماعة. ازرعوا نعناع في البلكونة بتاعتكم وطبعًا إنتوا المُستفيدين لأنه تقريبًا بيعمل كل حاجة، كل حاجة فيه ليها فايدة، تستخدم زيته، تستخدم ورقه، صدقني إنت المُستفيد، وكفاية نقول إن العلماء اكتشفوا داخل الأهرامات ورق نعناع مُجفف ومحفوظ، وده معناه إن أجدادنا قدماء المصريين كانوا عارفين وفاهمين قيمته في الحياة،  ودول مافيش أشطر منهم يعني ولا إيه؟!

 

 

 

• http://www.webmd.com/a-to-z-guides/peppermint-oil-uses-benefits-effects
• http://articles.mercola.com/sites/articles/archive/2013/10/14/peppermint-health-benefits.aspx
• http://www.ncbi.nlm.nih.gov/pubmed/17653649
• http://www.ncbi.nlm.nih.gov/pubmed/22844342
• http://www.ncbi.nlm.nih.gov/pubmed/17442122
• http://www.greenmedinfo.com/blog/power-peppermint-15-health-benefits-revealed