المشي أثناء النوم؛ حلم ولّا عِلم يا وحيد؟
كتب: أحمد حسين
في فيلم ”اعترافات زوج“ وحيد (فؤاد المهندس) بيحلم إنه راح عند بثينة (هند رستم) البيت، وبعد ما يصحى بيخبي الحلم ده عن مراته لطيفة (شويكار). لكنه بيضطر يعترف بيه لما بتحصل حادثة في الطيارة اللي مسافرين عليها ويفتكروا إنهم هيقعوا بيها. يشاء القدر إنهم يرجعوا بيتهم سالمين، وتحصل بعض الأحداث بعد كده اللي بتؤدي لإن عزيز بيه (يوسف وهبي) يقنعه بإنه الموضوع كان عِلم مش حلم، وإنه بيمشي وهو نايم!
طيب هو إيه المشي أثناء النوم ده (Sleepwalking)؟
المشي أثناء النوم هو اضطراب سلوكي بيظهر بشكل كبير بين الأطفال من سن 3 إلى 7 سنوات، وفي بعض الأحيان بيظهر برضه عند البالغين. النوع ده من الاضطراب بيشمل غالبًا أفعال أكتر من مجرد المشي، فممكن تلاقي الشخص بيتكلم بكلام مش مفهوم، أو بيعمل حاجة غريبة، أو بيتلفّت حواليه وكأنه بيهرب من حاجة.
الشخص اللي بيمشي وهو نايم ممكن يرجع ينام تاني في مكانه بعد وقت قصير عادي جدًا، ولما بصحى تاني يوم بيكون ناسي كل اللي هو عمله لأنه بيكون نايم فعليًا. في اعتقاد خاطئ بيقول إنك ماينفعش تصحي الشخص اللي بيمشي وهو نايم، لأنه ممكن يموت أو تيجي له لا قدّر الله سكتة قلبية، والحقيقة الكلام ده مش صحيح بالمرة.
بعض الأبحاث اللي تناولت الموضوع ده قالت إنه من الأفضل إنك تصحّي الشخص اللي بيمشي وهو نايم لأن بعض الناس اللي بتمشي وهي نايمة ممكن ترتكب أشياء خطيرة تجاه الناس اللي حواليهم، يعني ممكن يضربوا الشخص اللي بيحاول يقرب منهم بعنف، وممكن يجروا ناحيته بقوة، وممكن يهربوا منه ويخبطوا نفسهم في أي حاجة موجودة قدامهم، وده هيكون خطر عليهم وعلى الناس القريبين منهم في الموقف ده.
ليه البعض مننا بيمشي وهو نايم؟
في أغلب الأحيان بيكون نتيجة عادات النوم السيئة والضغط والتوتر والمخدرات والكحوليات، وممكن يكون لعوامل وراثية. في بعض الأحيان بيحصل نتيجة للفزع الشديد من شيء ما، وده بيظهر بصورة كبيرة في الأطفال اللي بيكون عندهم مشاكل أو واقعين تحت ضغط ما بيخليهم إما بيتبوّلوا أو بيمشوا وهما نايمين. نتيجة للفزع الشديد ده بيصيبهم حاجة اسمها فزع النوم (Sleep terror)، وده اضطراب له نفس أعراض المشي أثناء النوم لكنه مختلف في إن الشخص المصاب بيه ممكن يقوم يصرّخ من غير سبب.
المشي أثناء النوم مالوش علاج مُحدد، في بعض الحالات بيكون محتاج بس إنك تعدّل نومك، بحيث تنام في ميعاد محدد وتاخد كفايتك من النوم. ممكن كمان تكون محتاج تراجع الأدوية اللي بتتناولها لأن بعضها ممكن يكون ليها أعراض جانبية تحفز المشي أثناء النوم، ساعتها استشير الدكتور بتاعك. لو في أي أمر مزعج في حياتك بيأثر عليك أو على طفلك فالأفضل إنك تحاول تتخلص منه علشان يساعدك تتخلص من المشي أثناء النوم.
طبعًا الكلام ده لازم يتم باشراف من طبيب متخصص، علشان يقدر يتوصل للسبب اللي بيخليك تمشي أثناء النوم، فيقدر يعالجه بطريقة سليمة. وعمومًا مهما كنت بتمشي وإنت نايم فإنت مش هيكون موقفك أسوء من موقف وحيد في إعترافات زوج أو هيكون أسوأ الصراحة لإنه في النهاية يوم ما اتهموه في حد اتهموه في هند رستم ياجماعة ، وده شيء لا يمكن حد يعلّي عليه.
المصادر
