”الفلاكا“ بنت جميلة هتدوسك بالعجلة اللي ببدال!
كتبت: يارا كمال
مبدئيًا كده وبدون مقدمات، العيال عندنا بيحششوا ليلة العيد وغالبًا بيبقوا ضايعين طبيعي، نقوم نصحى الصبح على خبر تحرش جماعي في وسط البلد. فربنا يستر علينا والحاجات اللي بتنتشر في بلاد بره دي ماتجيلناش، عشان إحنا دماغنا خفيفة وممكن نتحوّل لآكلة لحوم بشر بحق وحقيقي. فنسمي كدهيا جماعة وندخل برجلنا اليمين.
فيه دلوقتي نوع مخدرات شديد أوي والمشكلة إنه رخيص أوي اسمه ”الفلاكا“، نحمد الله إنه لسه ماوصلش مصر والكًلة ماشية مع العيال تحت الكوبري، الشخص اللي بيتعاطاه تقريبًا بيتحوّل لزومبي في تصرفاته.
الفلاكا بنت جميلة هتدوسك بالعجلة اللي ببدال
الفلاكا مشتقة من كلمة أسباني معناها المرأة الرفيّعة الجميلة، المُزّة من الآخر يعني، تخيلوا بقى لما نوع مخدرات يبقى اسمه كده هيعمل فينا إيه. إذا كان ”الفيل الأزرق“ خلى دكتور يحيى يغتصب الست مايا ويكتشف سر مرض صاحبه إلخ إلخ، أومال المرأة النحيفة الجميلة بذات نفسها هتعمل إيه؟
الفلاكا اكتسحت فلوريدا السنة اللي فاتت، وظهرت في بعض الولايات الأمريكية برضه زي أوهايو وتكساس.
الفلاكا عبارة عن مركّب اسمه ”alpha-PVP“، ، واللي يشبه كيميائيًا الكاثنيون اللي موجود في مخدرات زي مخدر اسمه ”Bath salts“، وده نوع من المنشطات بيسموها ”upper“. النوع ده من المنشطات مرتبط بالإحساس بالنشوة واليقظة وزيادة الحركة، اللي هي أعراض تشبه الأعراض اللي بيسببها الكوكاييين والأمفيتامينات.
مخدر ”Path Salts“
كثير من الدوبامين والنورايبفرين
العلماء ماقدروش يوصلوا للطريقة اللي بتأثر بيها الفلاكا على المخ أو إزاي بتسبب الإدمان، فخمنوا كده هي ممكن تكون بتعمل إيه من اللي بتعمله المخدرات اللي تشبهها كيميائيًا. المخدرات دي بتسبب اندفاع هرمونين: الدوبامين (للي بيحسس الإنسان بإنه في حالة كويسة وهو المسئول عن حالة النشوة اللي بيسببها النوع ده من المخدرات) والنورايبنفرين (وده بيزوّد معدل ضربات القلب وضغط الدم واللي بيخلي المتعاطي يحس باليقظة).
طبعًا لما المخدر بيسيب الجسم، المتعاطي بيحس بالتعب والإحباط، وده بيخليه يرجع ياخد المخدر تاني، وممكن المخدر يغيّر كيمياء المخ، وده بيخلي المتعاطي يعوز كميات أكبر كل مادا.
أهلًا بكم في مدينة الزومبيز!
https://youtu.be/iBLS1zyEbRE?t=9
تعالوا بقى لما نشوف أمثلة للناس اللي تعاطوا الفلاكا حصل لهم إيه.
- مثلًا شوفوا الست اللي في الفيديو دي، تقريبًا بتتصرف كزومبي أو حد ملبوس مثلًا.
- فيه واحد تاني مسكوه واقف في تقاطع عريان عشان يهرب من بشر هو متخيلهم بيطاردوه.
- واحد تاني كان عايز يكسر الباب بتاع مركز الشرطة الرئيسي عشان متخيّل لإن فيه كلاب بتجري وراه.
- واحد تاني كان عايز يدخّل حديد سور في جسمه.
فكرة إن فيه ناس بتقلع هدومها تمامًا، وإن الفلاكا بتخلي درجة حرارة الجسم توصل لأربعين ونص درجة مئوية، فالمتعاطي يحس إن جسمه زي النار ومش طايق هدومه عليه. مع الجرعات العالية، ممكن الحرارة الشديدة تؤدي للفشل الكلوي وانهيار العضلات. والاستخدام الزايد للفلاكا بيرتبط بأحاسيس بالقلق الشديد والبارانويا والهلاوس.
نشوة تؤدي إلى الموت
الموضوع منيل بنيلة، ده فيه 63 متعاطي ماتوا في جنوب فلوريدا ما بين سبتمبر 2014 وديسمبر 2015، ما بين موت بجرعة زايدة وحوادث وانتحار وحوادث قتل، بس الحمد لله السنة دي مفيش أي حالات ماتت بسبب الفلاكا.
المشكلة إن المخدر القوي أوي ده تمنه رخيص جدًا، يعني الجرعة بـ3 – 5 دولار، والجرعة أصلًا 0.1 جرام، وبيشتروها من المعامل الصينية بالجملة على الإنترنت بـ 1500 دولار، الشوية دول ممكن يتعمل بيهم 10 آلاف جرعة، يعني المستوردين بيحققوا أرباح حوالي ألفين ضعف! والعة. والجرعة دي بقى ممكن تتشم أو تتدخن أو تتحقن أو تتبلع، على كيفك يعني.
مش فارق معاكم كل ده؟ ادخل بالتمساح!
طب ملحوظة في الآخر كده: فيه مخدر تاني أقوى عشر مرات من المورفين وفعال أكتر وأرخص من الهيروين. المخدر ده اسمه (Krokodil) يعني تمساح بالروسي، عشان أطراف المتعاطين بتبقى عاملة زي جلد التماسيح، لإن المخدر بينخر في الجلد واللحم لحد العضم، وممكن يؤدي لغرغرينا في الآخر. أنا جسمي قشعر والله. ومش حابين نحط صور لمراعاة مشاعر القراء بس هتلاقي الصور في المصادر في لينك الخبر لو حبيت تعرف أكتر.
مش عارفة إيه الفكرة اللي ممكن تدفع مجموعة من الناس إنها تتعاطى حاجة زي، أصل لو على اللي بيصنعها فكل همه إنه يبيع والفلوس، لكن اللي بيتشروها منه ويتعاطوها .. ليه؟ عشان تبقوا سعدا؟ فاكس مش هيحصل والمصحف ماكنش حد غلب، فبصي يا ماما وإنت يا حبيبي احتياطي عشان لو البلا الأزرق ده جه عندنا، أنصحكم تخشوا تتفرجوا على فيلم حلو وكلوا آيس كريم أو اضربوا القنبلة من السيدة زينب مثلا وانتوا هتتقلبوا علىوشكم برضه بس هتبقوا مبسوطين وهتعيشوا كمان، ومش مهم نتخن .. مش مهم خالص.
المصادر:
