زوبة التي في أعماق البحار.. كيف تعمل الغواصة؟
كتبت – يارا كمال
ممكن تكون دلوقتي راجع من برة وزنقة الزحمة، أو تكون نازل وأنت حامل هم الساعة اللي هتقضيها في وسط العوادم والدوشة. كل الناس لما تحب تهرب من الجو ده، يقولولك ”يا ريت فيه عربيات بتطير“. طب والبحر؟ البحر عالم براح فيه مخلوقات جميلة وغريبة، عالم براح عن السما. الفضاء آه ممكن يكون فيه نجوم وكواكب، بس الكائنات الحية شكل تاني. لو قررت إنك تهجر المدينة بدوشتها وتنزل البحر، هتحتاج غواصة.
بس مش تعرف الغواصة بتشتغل إزاي الأول؟
إيه اللي بيخلي الغواصة تعوم في الميه من غير ما تطفو ولا تغرق؟ الغواصة بتعوم عشان وزنها بيزيح وزن المية وبالتالي بتفضل متعلقة في المية. التحكم في الغواصة بيعتمد على التحكم في قابلية الطفو. إزاي؟ من خلال خلايا الغطس ودي بتتملي بالميه بنسبة معينة وحسب النسبة دي بيبقى غطس الغواصة، يعني كأننا بنخلي الغواصة دي تغرق بس إحنا متحكمين هي بتغرق لحد فين في البحر وإلا هتصطدم بالقاع. يعني لو حبينا نخلي الغواصة تطفو تاني نعمل ايه؟ بنخفف وزن الغواصة بإننا بنفرّغ خلايا الغطس بالهوا المضغوط عشان تطفو.
الغواصة بيحميها جسم الضغط اللي بيغطيها عشان تستحمل ضغط الميه. كل ما ننزل 10 متر عمق الضغط يزيد 1 بار يعني 10 طن/ متر مربع، يعني لو نزلنا 100 متر الضغط هيبقى 10 بار يعني 100 طن/ متر مربع، تخيّل بقى غواصة زي ”تريستا“ ودي غواصة أبحاث بتغوص لحد عمق 11000 م بتتحمّل ضغط قد إيه وجسمها قوي قد إيه.
طب الغواصة بتمشي إزاي؟
الغواصة بتمشي بمحرك ديزل يا إما بيدوّر مروحة دفع هي اللي بتحرك الغواصة، أو بتشغّل مولد كهربائي بيشغّل محرك الدفع، أو بتستخدم مفاعل نووي بينتج بخار بيحرك التوربين. ممكن كمان تبقى بتعتمد على بطاريات بتتشحن بمحرك ديزل أو مفاعل نووي.
ميزة المفاعل النووي إنه بيسمح للغواصة إنها تفضل غطسانة وشغالة مدد طويلة، لكن الغواصات اللي بتشتغل بمحركات الديزل بتحتاج تطلع على السطح عشان تشحن بطارياتها. الخوف من المفاعل النووي إنه ممكن يسبب تلوث إشعاعي في مساحات واسعة من مية المحيطات.
طب إزاي الغواصة بتحدد مسارها؟
الغواصة بتستخدم الـ GPS (وده نظام لتحديد المواقع) بس الكلام ده على السطح بس، لكن لو الغواصة نزلت تحت الميه، بتمشي من خلال أنظمة توجيه بتعتمد على القصور الذاتي (إن أي جسم بيقاوم أي تغيير يحصل في حركته، يعني لو إنت نازل من الأوتوبيس، بتنزل في نفس اتجاهه عشان لو نزلت عكس اتجاهه هتقع، لإن جسمك لسه واخد الطاقة اللي بتزقه في اتجاه الأوتوبيس وإنت غيرت اتجاهه فجأة).
الأنظمة دي بتخلي الغواصة تحافظ على مسارها من نقطة انطلاق محددة من خلال جهاز اسمه الجيروسكوب (جهاز بيقيس ويحافظ على مسار الغواصة). الأنظمة دي دقيقة جداً ومعقدة جداً، وبتفضل محافظة على مسار الغواصة بدقة لحد 150 ساعة في المرة الواحدة.
عشان الغواصة تحدد أهدافها (يعني مثلاً لو غواصة عسكرية ورايحة تضرب أهداف)، بترسل موجات صوتية في الميه واللي بتنعكس على الأهداف وترجعلها تاني، زي الخفافيش والدلافين والحيتان ما بتعمل.
طيب، الناس اللي قاعدة جوة الغواصة دي عايشة ازاي؟
الأوكسجين بيحصلوا عليه من خلال أسطوانات مركزة أو من خلال التحليل الكهربائي لمية البحر. وثاني أوكسيد الكربون بيتخلصوا منه من خلال عمليات كيميائية. وبيجيبوا الميه عن طريق تقطير(تنقية عن طريق التسخين والتبريد) ميه البحر، ويقدروا يطلعوا بالطريقة دي من 10 لـ40 ألف جالون ميه في اليوم.
يعني على الأقل، هنشرب ميه نضيفة ونشم هوا نضيف، ده غير الجمال اللي في البحر. الله، أنا عايزة انزل هناك.
المصادر: books.google ffden-2.phys
