كتر الشطة يجيب بواسير ؟!

كتبت: يارا كمال

مرة واحدة صاحبتنا قبل كده تعبت وعملت عملية، فبسأل أصحابي، البنت عملت عملية إيه، إن حد يرد، أبدًا. المهم، بعد إلحاح مني وكثير من الصمت، قالولي إنها عملت عملية البواسير، فأنا مابقتش فاهمة إيه الأزمة في كده. المهم، عرفت إن فيه فهم إن الرجالة هما اللي في الأغلب بيجيلهم بواسير، مش عارفة ليه. أنا وقتها مكنتش عارفة إيه البواسير بالظبط، بس استنتجت إنها حاجة ليها دعوة بالشرج. وعمومًا، كنت عارفة إن البواسير بتيجي من أكل الشطة الكتير، وعليه حبيت أعرف وانتوا معايا إيه هي البواسير وعلاقتها بالشطة.

إيه هي ”البواسير“ ؟!

بصوا، البواسير هي أوردة ملتهبة ومتورمة في الجزء السفلي من المستقيم(اللي هو الجزء السفلي من الأمعاء الغليظة واللي بيتخزّن فيه البراز) والشرج.  لو البواسير جوه المستقيم، تبقى بواسير داخلية، ولو تحت الجلد حوالين الشرج، تبقى بواسير خارجية.

الأوردة دي ممكن تورم وتلتهب نتيجة الضغط، ومن العوامل اللي ممكن تسبب الضغط هي: الإجهاد أثناء التبرز (محاولة التبرز بصعوبة)، القعاد فترات طويلة على الكابينيه (يعني بلاش قراية جرايد ومجلة ميكي بالنص ساعة جوة الحمام)، الإسهال المزمن أو الإمساك، البدانة، الحمل، الجنس الشرجي، والنظام الغذائي اللي فيه ألياف قليلة. وطبيعي تبقى عُرضة للبواسير كل أما تكبر، لإن الأنسجة اللي بتدعم الأوردة اللي في المستقيم والشرج ممكن تضعف مع السن.

إيه أعراضها؟

ومن أعراض البواسير: نزيف غير مؤلم أثناء التبرز، حكة وتهيّج في منطقة الشرج، إحساس بالألم أو عدم الراحة، تورم حوالين الشرج، وجود كتلة كده أو ورم قرب الشرج والكتلة دي بتكون حساسة أو بتوجع، وتسرّب البراز أو سلس البراز.

والأعراض دي بتختلف حسب مكان البواسير: لو داخلية، مش هتحس بعدم راحة، بس التهيّج أو الإجهاد أثناء التبرز ممكن يتلف السطح الحساس والرقيق للبواسير وده ممكن يسبب نزيف، كمان التبرز بصعوبة، ممكن يزق البواسير الداخلية من فتحة الشرج، وهنا بنسميه الباسور المتدلي، وده ممكن يسبب وجع وتهيّج.

أما البواسير الخارجية، فدي ممكن تسبب حكة أو نزيف في حالة كان في حاجة خليتها تتهيّج. وممكن الدم يتجمّع في البواسير الخارجية ويكون جلطة، وده ممكن يسبب ألم شديد وتورم والتهاب.

وعلى فكرة ممكن الموضوع يتطوّر. أنا مش مسئولة. هو أي نعم المضاعفات دي نادرة، بس ممكن يجيلك أنيميا نتيجة الدم اللي بتفقده، وممكن برضه تصاب بحاجة اسمها ”البواسير المختنقة“، نتيجة إن الدم اللي بيغذي البواسير الداخلية مابقاش بيروح لها، وده ممكن يسبب وجع شديد وغرغرينا.

لو هما شوية ألم وورم والتهاب معقولين، ممكن تعالج الموضوع في البيت: يا إما تستخدم كريم للبواسير أو لبوس بيحتوي على هيدروكورتيزون أو أنواع من الفوط الصحية بتساعد في الحالة دي، أو إنك تغمر منطقة الشرج بميه دافية من 10 لـ15 دقيقة مرتين أو تلاتة في اليوم. وكمان لازم تحافظ على المنطقة نضيفة بس مفيش داعي للصابون لإنه ممكن يزوّد المشكلة، ونشفها بمناديل رطبة بس مايكونش فيها كحول. كمان ممكن تستخدم كمادات تلج على الشرج عشان التورم يقل.

تروح بقى للدكتور امتى؟

النزيف أثناء التبرز ممكن يبقى عرض لأمراض كتير، وبالتالي مش أول ما تلاقي دم تفتكر إن دي بواسير على طول، وساعتها الدكتور هو اللي يحدد. فلما تلاقي أي تغيّر في عادات التبرز عندك أو تلاقي البراز لونه أسود أو لونه أحمر غامق أو البراز ممزوج بالدم أو فيه جلطات دم، روح للدكتور على طول، وخصوصًا لو فيه نزيف بكميات كبيرة أو دوار أو ضعف، لأن دي كده حالة طارئة. كمان روح للدكتور لو البواسير مسببة ألم أو بتنزف بشكل متكرر أو بتنزف جامد أو لو مابتتحسنش بالعلاجات المنزلية.

الدكتور يا إما بيدي مثلًا مراهم أو كريمات أو لبوس، ده في حالة لو الإحساس بعدم الراحة معقول، أو لو فيه جلطات اتكونت في البواسير الخارجية، الدكتور ممكن يشيل الجلطة من خلال جرح بسيط، وده ممكن يريّح المريض.

أما لو البواسير فضلت مؤلمة وبتنزف على طول، فهنا الدكتور بيتدخّل بإجراءات زي ربط الحزام المطاطي على البواسير، وده بيقطع عنها الدورة الدموية، فبتدبل وبتقع، بس الإجراء ده ممكن يكون مش مريح وممكن يسبب نزيف. ممكن كمان الدكتور يحقن نسيج البواسير بمحلول كيماوي عشان يتقلص أو ينكمش أو هيستخدم تقنيات التجلط باستخدام الليزر أو الأشعة الضوئية أو الحرارية تحت الحمراء، عشان  يخلي البواسير تتصلّب وتدبل.

الحل الجراحي

لو كل العلاجات دي مانفعتش أو البواسير كانت كبيرة، ممكن الدكتور يلجأ للحل الجراحي: وده بيكون إما باستئصال الباسور (مفرد بواسير)، وهنا بيتشال النسيج الزائد اللي بيسبب النزيف، بس المشكلة إن المريض ممكن بيعاني من شوية ألم بعد العملية وبيبقى فيه صعوبة في تفضية المثانة، يا إما بقى تدبيس الباسور، عن طريق منع وصول جريان الدم لأنسجته، وأي نعم ده التعب بعديه بيبقى أقل، بس ممكن الموضوع يتكرر وممكن كمان تحصل حاجة اسمها (هبوط أو تدلي المستقيم)، بمعنى إن فيه جزء من المستقيم يبرز من الشرج.

فعشان توفر على نفسك التعب ده كله يا ابن الحلال، حاول تاكل أكل غني بالألياف زي الخضار والفاكهة ، لإن ده بيليّن البراز وبيزوّد حجمه، واشرب سوايل كتير، وماتحاولش تتبرّز بالعافية لإن ده بيضغط على الأوردة في المنطقة دي، واعمل تمارين رياضية، وحاول ماتقعدش فترات طويلة.

الشطة بريئة حتى تثبت إدانتها

نيجي بقى للشطة. يا ترى هي فعلًا بتجيب بواسير؟

على فكرة بقى، مفيش أي دراسات بتأكّد ده: لا إنها بتسبب البواسير ولا إنها يتزوّد أعراضها. حتى فيه دراسة عملها فريق من جامعة باري في إيطاليا، على 50 مريض مصابين بالبواسير توصلت لإن مفيش أي دليل علمي بيقول إن الأكل الحرّاق زوّد عندهم أعراض البواسير.

حتى بالنسبة لباقي اضطرابات الجهاز الهضمي، ”د. كريشنابورا سيرنفاسان“، العالم بمعهد البحوث التكنولوجية الغذائية المركزي في ميسور في الهند، قال إن الأكل الحرّاق محفّز للجهاز الهضمي، وإنه بيريّح الاضطرابات الهضمية، وإن بعض الحاجات الحرّقة بتبقى مطهّرة.

و”د. أرتولد ليفي“، المتخصص في طب الجهاز الهضمي ونائب رئيس جمعية أمراض الجهاز الهضمي الأمريكية لشئون التعليم، بيقول إن المعلومات المتوفرة عن تأثير الأكل الحرّاق على الجهاز الهضمي قليلة أوي، حتى مفيش دليل بيقول إن الأكل الحرّاق بيبطأ علاج قرحة المعدة، كمان آخر التطورات في العلم توصلت لإن في بكتريا اسمها ”H. pylori“أو الملوية البوابية هي المتورطة في القرحة، وإن أعداد قليلة من المصابين بالقرحة بيصابوا بيها بدون الإصابة بالبكتريا. بس عمومًا، الناس باختلافهم بيختلفوا في حساسيتهم لأنواع الأكل المختلفة، ولو حد لقى نفسه حساس لأكل معين، المفروض يتجنبه.

من الآخر، فيه أسباب تانية مهم إننا نتفاداها عشان نتجنب البواسير أهم من الشطّة، اللي محدش متأكد هي سبب ولا لأ. وممكن يكون واحد بيعمل كل حاجة ممكن تسبب البواسير، وتجيله ويفتكر إن ده كله حصل له من أكلة مشطشطة مش أكتر.

المصادر:

mayoclinic  nlm.nih.gov  mayoclinic1  mayoclinic2

mayoclinic3  mayoclinic4  mayoclinic5  mayoclinic6

nlm.nih.gov2    bbc.co.uk    nytimes