البلازما مش ماركة تليفزيون
كتبت – يارا كمال
التليفزيونات القديمة كانت أول ما طلعت صناديق كبيرة وبعدين فضلت ترفع ترفع لحد ما طلعتلنا الشاشة البلازما. أنا كنت فاكرة البلازما دي نوع أو ماركة، بس طلع الموضوع أكبر من إنه تليفزيون.
البلازما هي الحالة الرابعة للمادة، بمعنى إن أي حاجة في الدنيا يا بتبقى يا إما صلبة يا سايلة إما غاز. لأ ده طلع في شكل رابع للحاجات اللي في الدنيا اللي هو البلازما. أنا افتكرت في الأول إنها حاجة لا هي سايلة ولا صلبة أو حاجة لزجة شوية يعني مثلاً زي العسل الأسود أو الجيلي حتى بس طلع الموضوع مش كدة خالص،
بس خلينا الأول نفتكر ايه أشكال المادة دي
أي مادة في الدنيا بتتكون من جزيئات والجزيئات دي تتكون من ذرات يعني مثلاً كوباية المية دي بتتكون من جزيئات والجزئ بيتكون من ذرة أكسجين وذرتين هيدروجين (H2O). كل ذرة من دول بيبقى فيها نواة وبيدور حواليها إلكترونات في مدارات، كل مدار بيحتاج عدد معين من الإلكترونات، لو مفيهوش العدد ده أو فيه عدد زيادة الإلكترونات بتحاول تتحرك من ذرة للتانية، والفاضي يصب في المليان، يعني الإلكترون الزيادة ده ينط للذرة اللي فيها إلكترون ناقص وبكدة الذرتين دول يتحدوا ويعملوا جزيئ واحد وممكن يبقو أكتر من ذرتين. الإلكترون ده بيبقى فيه شحنة كهربائية سالبة.
بالنسبة لأشكال المادة التلاتة الأولانيين، الجزيئات بتبقى فيه روابط قوية ما بينها في الشكل الصلب، والروابط دي بتكون أضعف في الشكل السائل، وتقريباً ما بتكونش موجودة في الحالة الغازية.
بالنسبة بقى للبلازما،
فهي غاز فيه الكترون أو أكتر ناقص أو زايد بس مرتبطش بذرة تانية، وبيتقال عليه غاز متأيّن، يعني ذراته ليها شحنة. اللي بيخلي ده يحصل إن الغاز ده يتعرض لحرارة عالية جداً، عشان يفقد الإلكترون اللي في أبعد مدار.
البلازما موجودة في أكتر من 99% في الكون اللي حوالينا، البرق مثلاً بلازما، يعني الغاز لما بيتحول لبلازما، البرق بيحصل. وفيه طبقة من الغلاف الجوي اسمها الأيونوسفير دي عبارة عن بلازما وده بسبب أشعة الشمس والأشعة الكونية.
البلازما موصلة للكهربا، وتستجيب للمجالات الكهرومغناطيسية، عشان كدة ليها استخدامات كتيرة في الفضاء وفي الإضاءة وفي تصنيع الكمبيوتر والموبايل. أحياناً كمان الناس بتتلخبط بين البلازما دي وبلازما الدم، بس بلازما الدم هي السائل اللي بتجري فيه مكونات الدم من كرات دم حمرا وبيضا وصفايح دموية، وبيكون لونها شفاف وبتكتسب اللون الأحمر بسبب صبغة الهيموجلوبين الحمراء.
المصاد: books.google-1 books.google-2
