أنا عندي بغبغان .. غلباوي بنص لسان
كتبت: يارا كمال
في فيلم ”لصوص لكن ظرفاء“، البغبغان بتاع ماري منيب هو الوحيد اللي عرف إن أحمد مظهر وعادل إمام حرامية من الأول، وفي الآخر ماري منيب عملت نفسها إنها هي اللي عرفتهم!
عمومًا البشر من باب الكوميديا بيحبوا يطلعوا البغبغان بيتكلم زي الإنسان بالظبط، بمعنى إنه زي ما الإنسان بيعبر عن نفسه بالكلام وبيقدر يجمّع من الكلمات جمل تعبر عنّه ويوجه كلام وفقًا للكلام اللي بيتقال له، البغبغان كمان بيقدر يعمل كده، بس ده لا يمنع إن البغبغان كائن ذكي جدًا.
لو سألنا نفسنا إزاي البغبغان بيتكلّم، هنلاقي نفسنا بنسأل عن حاجتين: إزاي مخه بيتحكّم في إنه يطلّع أصوات شبه كلام الإنسان؟ وإزاي بيطلّع الكلام أو بمعنى تاني: يا ترى هو عنده جهاز نطق زي عندنا؟
أولًا عملية النطق دي عملية بتعتمد على تحكّم دقيق في حركة بعض أعضاء الجسم زي الأحبال الصوتية عندنا، وده محتاج مخ متطوّر زي مخنا عشان نقدر نتحكم بالطريقة دي. العلماء لقوا إن الأجزاء اللي مسئولة عن تعلّم الغناء في مخ البغبغان بتبقى ضمن الأجزاء المسئولة عن التحكّم في الحركة.
كمان البغبغانات عندها دوائر عصبية معينة في مخها بتتحكّم في العضلات المسئولة عن النطق، والدوائر دي بتكون موجودة في مقدمة المخ اللي بيبقى فيه توصيلات ما بينه وما بين عضلات الصوت مباشرة عند الإنسان كمان. في مجموعة من 50 جين ليهم دور في مراكز التحكّم في النطق، الخمسين جين دول مفعّلين عند الإنسان والبغبغانات، ومابيبقوش مفعّلين عند باقي الحيوانات اللي بتقلّد كلام الإنسان.
السؤال الأهم بقى: هي البغبغانات بتقلّدنا ولا بتتكلّم؟
البغبغانات أحيانًا بتقلّد الكلام من غير ما تفهمه، بعض البغبغانات بتبقى عندها قدرات كافية إنها تربط الكلمات بمعاني زي البغبغان الرمادي الأفريقي ”أليكس“ اللي صاحبته د. إيرين بيبربيرج، قدرت تعلّمه يربط اللفظ بالمعنى، ويعد لحد 6، ويحل شوية مسائل حسابية بسيطة، وينفذ بعض الأوامر. بس في الآخر البغبغان مش زي الإنسان، يقدر يكوّن من الكلمات والحروف اللي بيسمعها جمل جديدة ماتدرّبش عليها يقدر يعبّر بيها عن رغباته مثلًا.
أومال إيه حكاية إن البغبغانات بتقول كلام في مكانه المظبوط؟ الفكرة في إنها بتعمل ده عن طريق ”الإشراط التقليدي أو الكلاسيكي“ بمعنى إنك ممكن تربط له الكلمة بموقف معيّن، يعني لو ربطت له إنه كلمة ”ميه“ مرتبطة بوقت الاستحمام، لما يعوز إنك تحميه و تنضفه يقول ”ميه“، بس أنت ماتقدرش تقول له ”عايز تاخد دُش؟“ مثلا ويفهمك لإنه ماسمعهاش قبل كده، وماربطهاش بمعنى الاستحمام.
كمان البغبغان ذكي لدرجة إنه ممكن تلاقيه بيقول لك ”ماتزعلش“، لما يلاقيك زعلان، وده بيكون اتعلمه لو قدر يلاحظ حد في البيت اللي هو فيه بيقول لحد تاني كدة لما لقاه زعلان. ده مش معناه إن البغبغان مايقدرش يعبر عن نفسه إلا عن طريق التقليد، لإنه بيقدر يعبر عن نفسه بلغة الجسد عادي. فلو بعد كده حد قال لك إنت عامل زي البغبغان، أعرف إنه قصده إنك ذكي.
إزاي بقى البغبغان بيتكلم؟ وهل عنده جهاز نطق زينا؟
لأ، البغبغانات ماعندهاش أحبال صوتية، بس عندها جزء مسئول عن إخراج الصوت اسمه ”المصفار- Syrinx“، وده زي الحنجرة عندنا كده. البغبغان بيقدر يتحكّم في عضلات رقبته وبالتالي يتحكّم في الهوا اللي بيعدّي من زوره أو من المصفار، زائد إن عضلات لسانه قوية ويقدر يتحكم فيها بحيث يطلّع اختلافات دقيقة في الصوت، وفي الآخر يطلّع كلام.
السؤال فعلًا اللي غريب هو ليه البغبغان بيقلّدنا أصلًا؟
إذا كان احنا يا بني آدمين اللي لما نمدح صوت حد، نشبّهه بصوت العصافير، يقوم هو ييجي يقلدنا؟ طيب، البغبغان بيقلّدنا لإنه اجتماعي جدًا وبيحب يتواصل مع الكائنات اللي حواليه، فلما بيعيش مع الإنسان بيقلّده من باب التواصل معاه. لو البغبغانات عايشة مع طيور تانية، هتقلدهم هما.
كمان البغبغانات بتستخدم صوتها في التواصل مع أقرانها، والاختلافات البسيطة في الصوت دي بتفرق في التواصل بين الطيور. فاكرين في فيلم ”فول الصين العظيم“ لما البنت الصينية قالت لمحمد هنيدي يقول لمامتها ”مه“، فغلط وقال ”ما“، فالست اعتبرته بيشتمها؟ هي نفس الفكرة كده. كمان البغبغانات الذكور والإناث بيتواصلوا طول الوقت.
البغبغانات ذكية لدرجة إنها قدرت تخلّي صاحبها يرجع يتكلّم. فيه واحد اسمه ”بريان ويلسون“ من ولاية ميريلاند في أمريكا، اتعرض لحادثة أفقدته النطق. هو قال إن كلام البغبغانين اللي مربيهم هو اللي خلاه يتعلم يرجع يتكلم تاني. وعشان يرد الجميل للبغبغانات، كرّس حياته لإنه يربي البغبغانات اللي أصحابها عايزين يتخلوا عنها. على سنة 2009 كان عايش معاه حوالي 80 بغبغان، وعمل مؤسسة اسمها ”Wilson Parrot Foundation“. والله كتّر خيره وخير البغبغانات اللي عملت معاه كده مع إننا بنقطّع أشجار الغابة اللي بيعيشوا فيها، يعني ينطبق علينا مثل ”لا منه ولا كفاية شره“!.
المصادر
