الإيدز: المرض المفهوم غلط
كتبت: زهراء بدر
معيدة في كلية اعلام جامعة القاهرة، شعبة اللغة الانجليزية
الإيدز/فيروس نقص المناعة AIDS/HIV مش حكم بالإعدام بس الناس مصرة إنها تلبس مريض الايدز البدلة الحمراء من أول يوم إصابته. الإيدز AIDS من الأمراض اللي حواليها كلام وجدل كتير من بداية ظهوره في السبعينات عشان هو مرض بينتقل عن طريق العلاقة الجنسية (STD-Sexually Transmitted Disease) وبالتالي بيتوصف إنه من التابوهات أو المحرمات و دايما مرتبط بالعار زي الجنس بالتبعية.
المرض ده أول ما ظهر كان بين الشواذ في أميركا و في البداية كان متسمي مرض الشواذ (Gay Disease) أو مرض نقص المناعة المرتبط بالشواذ (GRID– Gay-Related Immune Deficiency). عشان واحد يعترف إن عنده إيدز كأنه بيعترف إنه يا إما إنه شاذ جنسيًا أو إن عنده علاقات جنسية غير شرعية، و عادةً الناس بتخاف من مريض الإيدز بدل ما تتعاطف معاه؛ بتحكم عليه بالموت الاجتماعي و بتعتبر ان مرضه عقاب الهي على أسلوب الحياه اللي المريض كان عايش بيه.
قلة الوعي وعدم المعرفة غالبا بتكون السبب في الحكم الخاطئ أو المتسرع تجاه شخص أو موضوع، والإيدز للأسف من الأمراض اللي مستوى الوعي حواليها موصلتش للدرجة المطلوبة. في خلط كبير بين الإيدز و الفيروس اللي بيسببه. مش كل مصاب بفيروس نقص المناعة HIV مريض إيدز لكن كل مريض إيدز هو بالضرورة حامل للفيروس. يعني مرض الإيدز يبدأ بانتقال فيروس نقص المناعة HIV من شخص للتاني إما عن طريق نقل الدم او حتي التعرض للدم المصاب أو العلاقة الجنسية أو من الأم المصابة للجنين أثناء الحمل أو الرضاعة. الفيروس بيهاجم الغدد اللمفاوية المسئولة عن المناعة و بالتالي بيضعف المناعة عند المريض لحد مايوصل لدرجة الإيدز (نقص المناعة المكتسبة) و في أحيان كثيرة الفيروس مش بيتطور لمرحلة الإيدز.
زمان كان مريض HIV/AIDS كان ميت ماشي على الأرض؛ موته مجرد مسألة وقت. دلوقتي بقى في أدوية تقريبا في كل مراحل الإصابة بالفيروس أو المرض. أدوية الوقاية قبل التعرض للعدوى (PrEP-Pre-Exposure Prophylaxis) هي أدوية ممكن تحمي من الإصابة بالفيروس للأشخاص المعرضين للاصابة بالمرض بدرجه أكبر من غيرهم زي اللي مرتبط بشخص مصاب بالإيدز أو فيروس نقص المناعة HIV أو الشخص اللي بيتعاطى مخدرات عن طريق الحقن. فرصة الأدوية دي في الحماية من الإصابة بتكون أكثر لو أخذ الشخص منها قرص كل يوم بانتظام بس للأسف مفيش ضمان إنها تحمي بنسبة 100% و لازم تتاخد مع إجراءات الوقاية التانية زي الواقيات الذكرية و عدم مشاركة الإبر مع شخص تاني.
كمان لو حصل و شكيت إنك اتعرضت للفيروس بشكل أو آخر ممكن تاخد أدوية الوقاية بعد التعرض (PEP-Post Exposure Prophylaxis) عشان تحميك من إنك تصاب بالفيروس أو إنك تكون HIV Positive. الأدوية دي بتكون كذا نوع وبتتاخد أكثر من مرة في اليوم بعد التعرض مباشرة و لمدة 28 يوم على الأقل، بس للأسف برضه مفيش ضمان إنها تمنع من انتشار الفيروس في الدم. بس حتى بعد الإصابة فمضادات الفيروسات و أدوية الأيدز أو ((الكوكتيل)) زي ما في ناس بتسميها بياخدها مريض الـHIV عشان تقوي المناعة و تمنع تطور المرض أو عشان تسيطر على أعراض الإيدز و تخلي المريض يعيش بعد التشخيص لسنين وسنين.
مريض الإيدز بيحارب زي أي مريض، بس للأسف بيحارب على كذا جبهه منهم جبهة الناس اللي حواليه اللي يا إما بيحاصروه بنظرات الإدانة والتشفي أو نظرات الشفقة على مصيره المحتوم. لكن إحنا لازم نساعده عشان يخوض معركته في الجبهة الوحيدة اللي المفروض يركز فيها، معركته ضد مرضه.
المصادر: mayoclinic.org arabic.cnnS plannedparenthoods
