افرد ضهرك .. انفخ صدرك!
كتبت: يارا كمال
مامتك وباباك لما بيخشوا عليك وأنت بتذاكر ومكبوب على الورق يقولوا لك: يا بني ضهرك كده هيبوظ، افرد ضهرك كده، هيطلع لك أتب! وبعد ما كل حاجة بقت على الكمبيوتر وناس كتير بقى شغلهم مرتبط بيه إن لم يكن أغلبهم، ده غير بقى اللابتوب، فالوضع بقى أسوأ الحقيقة.
فالفكرة بقى: نعمل إيه عشان رقبتنا وضهرنا مايتضرروش؟ وهل فعلًا ممكن نفضل محافظين على فردة ضهرنا طول ما إحنا قاعدين؟
الخبراء بيسموا الوضع اللي بيبقى ضهرنا فيه محني وأكتافنا لقدام ورقابينا متنية (وضع السلحفة)، والوضع ده بياخده ناس كتير خاصةً اللي بيفضلوا قاعدين طول اليوم على الكمبيوتر في شغلهم أو قاعدين ماسكين الموبايل. عشان نبقى متفقين حتى لو أنت بادئ شغلك وأنت فارد ضهرك مش هتقدر تفضل على وضعك كده لمدة ساعات عمال ترد فيها على إيميلات وتكتب.
الوضع اللي بيحني الضهر والأكتاف مضر لأسباب كتير، منها إنه بيضغط على رقبتك وعمودك الفقري وآخر ضهرك، وده ممكن يسبب لك ألم. الوضع ده بيضغط على أعصاب الرقبة وبالتالي بيسرح على الدراعات والإيدين، وده بيزوّد خطر الإصابة بمتلازمة النفق الرسغي (حالة بتصيب الإيد والدراع بتسبب تنميل وألم)، وحالات تانية مؤلمة.
الفكرة إن راسك وزنها حوالي من أربعة كيلو ونص لخمسة كيلو ونص. عشان تفضل شايل راسك على جسمك وتبقى قاعد مفرود ده بيحتاج عضلات كتير في رقبتك وأكتافك. وإنك تبقى قاعد طول اليوم على مكتب وباصص براسك لقدام كده ده بيضعف عضلات رقبتك وأكتافك اللي شايلة راسك.
النتيجة السلبية دي مش هتحصل في يوم وليلة، بس في الآخر هتحس إنه صعب ترفع راسك وترجعها ورا كتفك عشان كده iتلاقي ناس ماشيين في الشارع راسهم متنية لأدام وباصين في الأرض وأكتافهم مش مفرودة.
المشكلة الحقيقية إننا بنحاول نكيّف أجسامنا على الأجهزة اللي بنشتغل عليها، مش نكيّف وضع الأجهزة بحيث تريّح جسمنا لإن فكرة إنك تقعد بالساعات فارد ضهرك دي صعبة أوي. أصلًا جسم الإنسان مش متصمم عشان يفضل على نفس الوضع لمدة طويلة عشان كده لو حد مقضّي يومه كله قدام الكمبيوتر بيشتغل، وفيه شوية مشاكل بسيطة في تهيئة القعدة، هتؤثّر عليه سلبًا.
عشان مانمدّش راسنا لقدام وإحنا قاعدين، هنحتاج إن الشاشة تبقى على الارتفاع مظبوط، بحيث لما أنت تبقى قاعد فارد ضهرك ووراسك مش ممدودة لقدام، يبقى ارتفاع أعلى الشاشة أعلى من مستوى عينك ببوصة أو اتنين. وفي نفس الوقت تبقى حاطط دراعك من أول كوعك لحد إيديك على المكتب اللي أنت قاعد عليه، من غير ما تتني الجزء ده وأنت بتكتب.
يبقى إحنا هنظبّط بيئة العمل بحيث ماتتضغطش على أجسامنا، وأهم حاجة إنك تحاول تغيّر وضعك كل شوية، وإنك تحاول تاخد راحة وتفك جسمك كده: تلف أكتافك وتمد رقبتك عشان تخلي الدم يجري في العضلات دي.
المصدر
مصدر الصور
