![أكسل الحيوانات في العالم](https://neonsciences.com/wp-content/uploads/2016/03/الأكسل-في-العالم.png)
”بصحى من النوم تعبان، فبنام تاني طب أموّت نفسي؟!“ عن الحيوانات الأكسل في العالم!
كتبت: يارا كمال
قبل أي حاجة اتفرجوا على الفيديو ده:
https://www.youtube.com/watch?v=Ro7sfOQQa_U
علاقتك إيه بالكسل؟
بتشغّل عشر منبهات في الموبايل، وتقفلهم كلهم برضه وتكمل نومك، وتنزل الشغل متأخر؟ بتقعد على الكنبة وتلزق فيها يوم الأجازة؟ بتضرب أي حد يحاول يصحيك بالبوكس أيًا كان مين؟ من رابع المستحيلات إن ماما تطلب منك حاجة وتنزل تجيبها؟ ابشر، مش إنت أكسل واحد في الكون!
في كائنات بتنام ساعات أكتر منك بكتير، وفي طيور بتنام بنص مخها وهي طايرة. بعض الحيوانات بتنام حسب طبيعة أكلها، يعني الحيوانات اللي أكلها سعراته الحرارية قليلة بتنام قليل، عشان كدة آكلات العشب بتنام أقل من آكلات اللحوم، لإنها بتاخد وقت طويل في مضغ الأكل على بال ما تاخد منه الطاقة الكافية.
حيوان زي الزرافة، لاحظ العلماء عليها في السبعينات إنها مابتوصلش لمرحلة النوم العميق إلا من 5 لـ30 دقيقة في اليوم. غير أصلًا إنها بتنام نومة تبدو لنا متعبة، إنها بتريّح راسها على أردافها، زي ما باين في الصورة. النوم القليل ده نتيجة إنها عُرضة للحيوانات المفترسة . أهي يا عيني الزرافة هي اللي ينطبق عليها جملة بتنام وعينها في وسط راسها، زي ما بيقولوا.
أكسل الحيوانات في العالم
الحيوانات المفترسة زي الأسود طبعًا بهاوات، وخصوصًا إنهم بيعيشوا في جماعات. لما الأسود بتتحبس بتنام من 10 لـ 15 ساعة في اليوم. بس في العادي بتاعهم، مابيناموش فترة طويلة على بعضها، عشان يقدروا يلحقوا لو فيه فريسة في نطاقهم يصطادوها. من الآخر، الحيوان لما يكون جعان المفروض ينام قليل، لو فيه حواليه أكل، وينام كتير، لومفيش أكل، وهو ده اللي بيساعده على الحياة.
![p036gsp4](http://neonsciences.com/wp-content/uploads/2016/02/p036gsp4-300x169.jpg)
المشكلة إنه صعب تعرف هي الكائنات دي بتكون نايمة ولا مريّحة بس كده، يعني حيوان زي المدرّع العملاق، بيقعد في الجحر بتاعه لمدة 18 ساعة، بس مفيش دليل يقول إن طول الفترة دي بيغفّل، وخصوصًا إن جحره بيبقى قريّب من تل نمل أبيض، والجزء الخاص بالنوم من الجُحر، بيكون قاعدة تل النمل ده.
المفروض إن العلماء بيعرفوا إذا كان الحيوان ده نايم ولا لأ من وضعه، زي وضع الزرافة كده. بس مثلًا الكوالا بيتقال إنه بيصحى ساعتين بس في اليوم، لكن حسب دراسة اتعملت في فيكتوريا في أستراليا، الكوالا بيصحى حوالي 14 ساعة ونص وبيقضي كمان 5 ساعات راحة. فكرني بسمير غانم في مسرحية ”المتزوجون“ لما كان بيقول ”بصحى من النوم تعبان، فبنام تاني.
طب أموّت نفسي؟“.
![koala-bear-sleeping-wallpaper-2](http://neonsciences.com/wp-content/uploads/2016/02/koala-bear-sleeping-wallpaper-2-300x300.jpg)
ليه بقى بينام وبيريح كل الساعات دي لإن ورق الكافور أو الأوكالبتوس اللي بياكله بيحتاج وقت عشان يتهضم وهو أصلًا بيديله طاقة قليلة. في 2013، حاولوا يقيسوا النشاط اليومي للكوالا البري من خلال قياس التسارع، لكن الأجهزة دي مكانتش بتفرّق بشكل كافي بين النوم والراحة.
عمومًا، القاعدة الذهبية لمعرفة إذا كان الحيوان نايم ولا لأ، هو قياس النبضات الكهربية اللي بيرسلها المخ. بس عشان نوصل لمعلومات دقيقة، ده هيحتاج إن الحيوانات دي تكون محبوسة. وفقًا للمعلومات دي، لقوا إن اللي كسر الرقم القياسي هما المدرّع الأشعر الضخم اللي بينام 20.4 سنة، والفأر الجيبي طويل الأطراف بينام 20.1 ساعة.
بس المشكلة لما تحبس الحيوان، إنت بتغيّر البيئة اللي عايش فيها الحيوان، فالنتايج دي مانقدرش ناخد بيها أوي. يعني مثلًا الخفاش البني الصغير حسب دراسات اتعملت سنة 1969، اتقال إنه بينام 19.9 ساعة في الـ24 ساعة! بس ده وهو متوصّل بكمبيوتر، مش وهو في الكهف بتاعه!
ممكن ده يكون مش نوم أصلًا ويبقى حالة اسمها السبات. الحالة دي طريقة لحفظ الطاقة، وبتحصل لحيوانات زي الخفاش في أوقات البرد ويبقى اسمه سبات شتوي، ولما يبقى في أوقات الحر بيبقى اسمه بيات صيفي. أنا شخصيًا كان نفسي أبقى بعمل سبات شتوي، بس مفيش نصيب. السبات مختلف عن النوم، هو عبارة عن حالة سكون، حرارة الجسم ونسبة التمثيل الغذائي والنشاط العقلي في وقته بيقلوا، وده للحفاظ على الطاقة. في حيوانات أصلًا عايشة في البيات ده كل يوم يعني حيوان البادجر الأمريكي ونوع من أنواع الأبوسوم بيكونوا في حالة السبات دي في المتوسط 14 ساعة كل يوم.
من الحيوانات اللي بتختلف مدة نومها حسب بيئتها، يعني لو أخدتها من بيئتها وحبستها مدة نومها هتختلف حيوان الكسلان، اللي بيتضرب بيه المثل في الكسل. أثناء حبسه ودراسته، قالوا إنه بينام أكتر من 15 ساعة. بس في 2008، العلماء درسوا حيوان الكسلان البري، وباستخدام الرسم الكهربائي للدماغ، عرفوا إن الحيوان ده بينام أقل من 10 ساعات، يعني قد الأسود وأقل بكتير من الكوالا. بس ده لا يمنع إن كون كائن يرّيح 40% من اليوم نسبة غير عادية، وخصوصًا بالنسبة لحيوان مابياكلش غير فاكهة وورق، وممكن يبقى فريسة للقطط والنسور. بس فيه تفسير وارد إن يكون حيوان الكسلان بيعمل تمويه وبيحاول يندمج مع الطبيعة من خلال كبت حركته بالنوم. يعني مش سبهللة هي، إن حيوان الكسلان كيفه ينام.
بس بصوا في الآخر عشان مابقاش بضللكم، دول حيوانات، إنت إنسان. هما معندهمش مدير هيخصم لهم ولا عيال هيفوتهم أوتوبيس المدرسة، فاظبط المنبّه وصحصح كدة واسمع الغنوة دي:
المصدر