إيه أكتر عضو في جسمك شايف إنه مالوش لزمة؟!
كتبت: مها طه
بعد ما سألنا سؤال: إيه أكتر عضو في جسمك شايف إنه مالوش لزمة؟!
لقينا إجابات كتير مختلفة، وفي منها اللي كان في شبه إجماع عليها زي شعر الجسم والزايدة الدودية، ولإن الزايدة تحديدًا من أقدم أعضاء الجسم اللي كان فيه اعتقاد شائع بإنها عضو فعلا مالوش أهمية أو وظيفة ليؤديها في الوقت الحالي، عشان كده هنتكلم عن كل إجابة من إجاباتكم واحدة واحدة، أما الزايدة الدودية فهنتطرق لها في موضوع مخصص ليها لوحدها.
أعضاء بلا وظيفة في الجسم لتؤديها .. كما يعتقد البعض!
اللوّز أو بالمصطلح الأدق “اللوزتين”
ودول طبعًا مشهورين بإنهم بيوجعوك لما ييجي لك دور برد، وإنهم ممكن يتشالوا لما يكون فيهم التهاب قوي، لكن الحقيقة إن وظيفتهم نفسها بقى ممكن تكون مش مفهومة بالنسبة لمعظم الناس.
اللوزتين هما زوج من الكتل اللي بتتكون من أنسجة لينة، بتقع على جانبي الجزء الخلفي من البلعوم. نوع الأنسجة المكوّنة للوزتين شبه المكوّنة للعُقد الليمفاوية، وبتكون مغطاة بغشاء مخاطي وردي (شبه المُبطن للفم كدة). اللوزتين بيعتبروا جزء من الجهاز الليمفاوي، بالتالي فهما ليهم دور في حماية الجسم من الالتهابات، ومع ذلك في حالة اللجوء لإزالتهم لضرورة طبية، الجسم مش بيتأثر بشكل سلبي.
فإحنا دلوقتي عرفنا ليه اللوز بتلتهب أول ما ييجي لنا دور برد مثلًا، لأن ببساطة هياللي بتستجيب للالتهاب عشان تقضي عليه.
شحمة الأذن
لأ الهدف من وجودها مش إننا نخرمها عشان نلبس حلقان 😀
شحمة الأذن في الحقيقة جزء من التركيب الخارجي للأذن. بتكون عبارة عن جزء لحمي متدلي، ووظيفته هي تجميع الموجات الصوتية من الهواء، وتوجيهها ناحية طبلة الأذن، وفي الحالة دي بتبدأ طبلة الأذن في الاهتزاز وبالتالي الموجات الصوتية بتوصل للأذن الداخلية. بيتم معالجة الموجات الصوتية دي وبعدها بيتم توصيل الإشارة العصبية للمخ، ومعالجة الموجات دي مرة تانية في المخ، بحيث يتم ترجمتها لشكل الصوت اللي بنسمعه.
العضلة الراحية الطويلة أو الـpalmaris longus
دي واحدة من خمس عضلات بتتصل بمفصل الرسغ، واللي بتساعد على مرونة معصم الإيد نفسه، بالإضافة لإنها بتساعد في الحركة وتدفق الدم، وتحديد شكل الإيد نفسها. العضلة دي بتنشأ قرب الكوع وبتمتد على طول الساعد وصولًا للرُسغ. الجدير بالذكر إن العضلة دي مش موجودة في حوالي 14% من البشر، وفعليًا هي مالهاش أي تاثير على قدرة العضلات على الانقباض والانبساط. الأشخاص اللي العضلة دي موجودة عندهم، بتكون ظاهرة من ناحية كف الإيد كده.
المرارة
كيس عضلي صغير بيقع تحت الكبد مباشرةً. المرارة عبارة عن المخزن اللي الكبد بيخزن فيه العصارة الصفراوية اللي بينتجها بعد أي وجبة. المرارة بتتحول لشكل فارغ ومُسطح، كأنها بالونة فاضية من الهواء، أما قبل الوجبة فهي بتبقى ممتلئة بالكامل بالعصارة الصفراوية، وبتكون في حجم ثمرة الكمثرى الصغيرة. لما الأكل بيوصل لها، بتبدأ المرارة تستجيب للإشارات، وتفرز العصارة المُخزنة جواها للأمعاء الدقيقة من خلال سلسلة من الأنابيب اللي بتُسمى القنوات المرارية.
وظيفة المرارة هي إنها بتساعد في هضم الدهون لأن الدهون مش بتتفكك في المياه، وبالتالي بتحتاج لعصارات زي العصارة الصفراوية لتفتيتها وبالتالي هضمها. المرارة نفسها مش مهمة أوي، وعشان كدة لو فيها حصوات أو التهاب شديد ببساطة الدكتور بياخد قرار بإزالتها، وبتبقى كل المشكلة الناتجة عن الإزالة دي، هي إن الشخص ممكن يعاني من الإسهال كنتيجة لعدم هضم الدهون أو سوء امتصاصها، غير كده مفيش أي مشاكل صحية ممكن ملاحظتها على الصحة العامة للجسم أو لعملية الهضم.
حلمات الثدي عند الرجال
سؤال غريب بس فعلًا هل فكرة حد في إيه وظيفة حلمات الثدي عند الرجل رغم إنه مش اللي بيقوم بعملية الرضاعة؟ 😀
من المعروف طبعًا إن الحلمات في العموم دورها هو المساعدة في إرضاع الصغار، ولإن الرجالة مش بترضع أكيد، وبالتالي في رجالة كتير بيشوفوا إنها مالهاش لازمة، وفي الجقيقة إن السبب الوحيد لوجودها هو عملية التطور الجنيني داخل رحم الأم.
في أثناء تطور الجنين في رحم الأم، بيكون ولحد الأسبوع الرابع مفيش أي فرق بين الذكر والأنثى، في الحالتين هو مجرد جنين بتنقسم خلاياه وتتكون بغض النظر عن نوعه، ولأن البشر من ضمن الثدييات، فهما ببساطة كائنات: بيغطي جسمها الشعر، من ذوات الدم الحار، بتلد وبترضع صغارها، ولأن الإرضاع هو وظيفة الحلمات وفي بداية التطور الجنيني مفيش نوع معين، فبالتالي بتنمو عند الجنين خلايا متخصصة لتكوين الحلمات، وبتستنى بقى لوقت ظهور الجينات المسئولة عن الذكورة أو الأنوثة، وهنا بيبدأ الجنين في إفراز الهرمونات اللي بتعطل واحد من الجنسين، وتحفز تكون الأعضاء الخاصة بالجنس الآخر. ففي الذكور بيبقى دور الحلمات هو مجرد شكل وبس، أما في الإناث فالجلمات بتتأثر بهرمونات الأنوثة في مرحلة البلوغ.
الشعر
سواء كان شعر الجسم أو شعر الوجه، فوجوده له سبب تطوري بحت، وهو إننا كبشر بيتم تصنيفنا في الرئيسيات، والرئيسيات كلها عندها شعر بيغطي الجسم كله. أما بقى سبب وجوده في حد ذاته فهو حماية الجلد بشكل عام.
الجلد بينقسم لنوعين: جلد سميك وجلد رفيع. الجلد السميك ده هو الجلد اللي لا يحتوي على غدد عرقية غالبًا، وبيكون موجود في كف الإيد وكف القدم، أما الجلد الرفيع هو اللي بيغطي معظم الجسم، وده اللي بتتواجد فيه غدد عرقية، ودي هدفها هو تخفيض درجة حرارة الجسم، وهنا بقى بيحتاج للشعر عشان يقدر يجمع قطرات العرق ويبخرها من على الجسم، وبالتالي تنخفض درجة حرارة الجسم.
كمان الشعر الموجود على الجسم بيحميه من تأثير أشعة الشمس المباشر على الجسم. كما إنه بيعمل كعازل للجلد عشان يمنع وصول الأجسام الغريبة والأتربة وغيره للجلد.
زمان من ملايين السنين كان البشر جسمهم كله تقريبًا مُغطى بالشعر بشكل كثيف كمان، وده عشان طبعًا في الوقت ده ماكنش فيه ملابس لكن مع تطور الزمن بقينا نلبس هدوم، وبكدة بدأ الشعر نفسه يقل بشكل كبير وفقدنا بالفعل معظمه.
الطحال
أحد أهم أجزاء الجهاز المناعي ويمكن ده كتير مايكونش عارفه. الطحال هو أكبر عضو ليمفاوي فى الجسم _موجود فى الجنب الشمال تحت الضلوع و فوق المعدة_ بيحتوى على كرات الدم البيضاء، و كمان له دور فى تنظيم كميات الدم فى الجسم والتخلص من خلايا الدم التالفة والقديمة.
الصباع الصغير
صباع رجلك الصغير طبعًا هتفتكروا إن لازمته في الحياة هي إنه يتخبط ويوجعنا ويكدرنا. الحقيقة إن سبب وجود الصباع الصغير يعتبر سبب تطوري، لأنه ببساطة كان موجود في الرئيسيات اللي البشر من ضمنها عشان يساعد في عملية تسلق الأشجار، وده طبعا مالوش لازمة عندنا كبشر لكن دي مش فايدته الوحيدة.
قدم الإنسان بتتكون من 26 عظمة. منهم 7 بيمثلوا عظام رسغ القدم ومنهم الكعب، وقدامهم 5 أمشاط طويلة ورفيعة. فوق كل مشط بيبقى فيه حاجة اسمها سلاميات. الصباع الكبير له سلميتين بس، وكل واحد من الأربع الصوابع التانيين له 3 سلميات صغيرة. لو تخيلنا عدم وجود الصباع الصغير نفسه، هيبقى مفيش تأثير كبير على الحركة والمشي والإتزان، لكن ببساطة لو تخيلنا عدم وجود المشط اللي تحت سلميات الصباع الصغير، فالجري والمشي والإتزان هيتأثروا جدًا ويختلوا.
أما بقى لو على صباع الإيد الصغير، فممكن نقول ببساطة إنه مع الصباع اللي جنبه بيمثلوا 50% من قدرة الإيد وقوتها على حمل الأشياء.
المصادر:
