أسوأ 9 أطعمة ”مزيفة“ في السوبرماركت!
كتب: أحمد حسين
كلنا متفقين تقريبًا إن الأكل دة شيء مهم طبعًا، علشان نعيش لازم ناكل ونحصل على التغذية المطلوبة لأجسامنا. طبعًا كل ده جميل وكل حاجة بس مالوش أي علاقة عندنا بأهمية الأكل اللي تكمن أولا وأخيرًا في كونه متعة عظيمة، حاجة كده زي ما قال الجميل “فريد شوقي” في فيلم “خرج ولم يعد”: “الأكل دة نعمة من نعم ربنا، لذة من لذائذ الحياة الكُبرى، مش مهم تاكل غالي أو رخيص المهم إنك تتمتع بالأكل”.
لكن مع التطور اللي مش بالضروري دايمًا يكون للأمام، ومع دخول الصناعة في كل حاجة بما فيها الأكل، ظهرت بعض الأطعمة التي بدأت تدور الشكوك حولها بشكل مثير للاهتمام، كونهم أطعمة صناعية ومؤذية وبيتم اعتبارها أنها بديل للأكل الحقيقي زي:
– Cheese Whiz Dip
جبنة في برطمان، إيه اللي ممكن يكون ضار ومؤذي فيها؟ الحقيقة إن النوع دة تم وصفه على إنه ”سكتة قلبية“ في برطمان. والسبب في ده إن البرطمان لا يحتوى على شئ غير تلت الدهون والصوديوم تقريبًا اللي أنت محتاجهم بس في معلقتين صغيرين بس.
– Easy Cheese Spray
المشكلة في النوع ده بالذات وما شابه، إنه بالأساس صناعي 100% ومفيش فيه أي مواد طبيعية، دة غير إن مفيش فيه جبنة أساسًا، بمعنى إنها بعض المواد الصناعية اللي اتضربت مع بعض في خلاط طلّعت لنا هذا الشيء شبيه الجبنة.
– Crab sticks
عمرك أكلت كابوريا؟ حتى لو ما أكلتش كابوريا، أكيد شوفت الكابوريا المتقطعة قطع مُستطيلة دي؟ المفروض إن أي حد بياكل كابوريا يبقى عارف إنها أكيد مزيفة. أصله أكيد مستحيل نعتبر ميكس الغلوتامات أحادية الصوديوم، والملح، مع مادة حافظة وشوية مواد تانية كابوريا!
– (Fruit Drinks(Tang
انت عايز تقنعني إنه السكر والفواكه يتجمعوا مع بعض في كيس على شكل كريستالات وتقول لي طبيعي؟ يعني بغض النظر عن إنه طعمه مش حلو، فهو 100% صناعي ومفيش فيه أي قيمة غذائية تُذكر بعكس العصاير الطبيعية يعني.
– Tofurky Italian Vegan Sausage
في محاولة لصُنع شيء كده عبارة عن مزيج عجيب علشان يرضي أذواق اللي بيعملوا دايت، وبيحاولوا يبطلوا أكل اللحمة وكمان النباتيين. صنعوا بقى سوسيس نباتي، بس مليان إيه بقى؟ دهون وملح وسكر، يعني كل اللي محتاجه اللي عايز يعمل دايت فعلًا، وإضافة مني ولا السوسيس العادي ينفع يتاكل كمان!
– White Bread
العيش الأبيض (الفينو أو التوست الأبيض) دة بقى حدوتة تانية. علشان يعملوا العيش ده أبيض، لازم الأول يتم تبييض الدقيق (لون الدقيق الأصلي أصفر مائل للبياض)، ولما بيتم تبييض الدقيق مش بيتم التخلص من اللون بس لا كمان بيتم التخلص من المغذيات المفيدة اللي فيه. وبعد الخطوات دي كلها بيتحول العيش بعد عمله بالدقيق دة لمجرد سكر، وبيكون كمان غير مُشبِع من وجهة نظري.
– Fruit Snacks
لو الوجبة الخفيفة اللي بتاكلها (أو الـ Snacks يعني) ريحتها زي الفواكه، دة مش معناه خالص إنها فعلًا فواكه. غالبًا بتكون عبارة عن مزيج سام من السكر، وشراب الذرة، وشراب الذرة المُجفف، والفركتوز، يعني من الأخر دة بيكون متكون من كل شيء ماعدا الفاكهة.
– Chicken Nuggets
الناجتس اللي بتكون لذيذة وسهلة في الأكل دي بتتعمل من إيه بقى؟ بتتعمل من ”بعض“ أجزاء الفراخ اللي بتتجمع بعد ما بتتحمر شوية وتتحول لكُتل. تخيل بقى إنه بعد كل ده، بيكون مكوّن “الفراخ” نفسه نص وزن قطعة الناجتس مش أكتر، أما النص التاني بيكون عبارة عن ملح ودهون وسكر بنسب عالية.
– Pancake Syrup
الحقيقة الصادمة هي إن مفيش في الحقيقة شراب (أو بمعنى أصح شربات) Maple syrup، واللي بيتحط على الحلويات دة مجرد شربات ذرة وعصير ذرة فيه نسبة فركتوز عالية، مياه ولون الكراميل. بس المشكلة الأكبر هي إن كل الحاجات دي مفيش فيها أي قيمة غذائية.
ممكن تكون بعض المواد دي بتوفر وقت كبير جدًا في التحضير، لكنها للأسف هتأثر بشكل كبير _مباشر وغير مباشر_ على صحتك، فنحاول وإحنا بناخد جولتنا في السوبر ماركت إننا مانضعفش ونشتري أمور مالهاش أي لزمة، ونبطل كسل لو على إننا نحضر أكلنا في البيت أو استسهال إننا بنحب حاجة ومش قادرين نبطل ناكلها لإقتناعنا إنه مستحيل مش أكتر!
المصدر: amaznginfo
