إزاي الصيام بيؤثر على مخنا؟!
كتبت: مها طـه
تقعد على سفرة الفطار وكل اللي نفسك فيه شوية مية تبل الريق وشوية قمر الدين يطري على قلبك في الحر ده، فجأة تلاقي ورك فرخة بيناديك كدة على شوية سمبوسك يجننوا وحبة شوربة لسان عصفور وطبقين محشي من بتاع العزومة اللي فاتت، وفجأة تلاقي نفسك مش قادر تقوم من على السفرة من كتر الأكل ده غير صينية الكنافة اللي ريحتها مالية البيت دي.
طبعًا بعد المعركة دي بتاخد حوالي ساعتين على ما تفوق وترجع إنسان طبيعي كدة قادر على التواصل، ومهما وعدت نفسك مش هتعمل كدة تاني، يجي بكرة، ويادوبك تاكل من هنا وتتقل من هنا، غالبًا إنت بتتقل كدة لإنك بتبقى على الفطار كبست معدتك أكل، وبالتالي الدم بيقل من المخ ويروح على المعدة عشان يساعد في هضم كميات الأكل العظيمة دي. الربط الوحيد في دماغنا بين الصيام والمخ هو إن رمضان شهر للأنتخة وفصلان الدماغ، لكن في الحقيقة الصيام له تأثير تاني خالص على المخ.
الصيام بيحمي من أمراض المخ
”مارك ماتسون“، رئيس مختبر العلوم العصبية في المعهد الوطني للشيخوخة، وأستاذ علم الأعصاب في جامعة جونز هوبكنز، وأحد الباحثين في مجال الآليات الخلوية والجزيئية المُسببة للعديد من الأمراض العصبية زي الشلل الرعاش والألزهايمر، نشر هو وفريقه عدد من الأبحاث العلمية اللي بتناقش إزاي الصيام لمرتين في الأسبوع ممكن يقلل بشكل كبير من خطر الإصابة بالشلل الرعاش والألزهايمر.
بالإضافة إلى الدراسات التانية اللي بتتكلم عن تقليل استهلاك السعرات الحرارية اللي بيحصل بشكل طبيعي في حالة الصيام، واللي أثبتت إنه كل ما طالت الفترة اللي بنمارس فيها الصيام، كل ما زادت القدرة على محاربة الأمراض المُزمنة. وطبعًا مفيش صيام أطول من 16 ساعة.
الدراسات أثبتت إن الصيام وتقليل السعرات الحرارية بتساعد في تنمية خلايا جذعية جديدة، وبيجدد الـDNA، وده طبعًا مرتبط بتمديد العمر، وتأخير الأمراض المُزمنة المرتبطة بالشيخوخة، عشان كده فالصيام ممكن استخدامه كطريقة لعلاج السرطان بجانب العلاج الكيميائي، لأنه من المعروف طبعًا إن السرطان بيكون خلل في الـDNA.
لكن برضة وجب التنويه إن الصيام مش أكتر من علاج جانبي،وإن الصيام لوحده بالتأكيد مش ممكن يكون علاج للسرطان لكنه علاج مساعد للعلاج الكيميائي، عشان يحقق النتايج المطلوبة منه، وعشان كدة اوعى تصدق حد يقولك إن الصيام أو أعشاب معينة أو أي حاجة غير العلاج الطبي، هيكون سبب للتخلص من السرطان ولا القضاء عليه.
الصيام فوايده كتيرة بس نصوم صح
الصيام في العموم بيحفز الجسم عشان يقوم بوظايف كتير بشكل أفضل، الصيام بيقلل من الالتهابات في الجسم بشكل عام، الصيام بيقلل من هرمونات التوتر، وبالتالي بيحمي الجسم من كل المخاطر اللي ممكن تحصل كنتيجة للتوتر، الصيام كمان بيحفز من حرق الجسم للدهون وبالتالي بيساعد الكبد على القيام بوظايفه.
اعرف أكتر| 10 أطعمة مثالية لتخفيف التوتر والشعور بالقلق
الأعصاب في المخ بتتجدد عن طريق الخلايا الجذعية واللي الصيام بيساعد في تجددها، وبيساعد على التواصل بين الأعصاب وبعضها، ولإن الصيام بيُعتبر تحدي كبير للمخ، فالمخ بيحاول يتغلب على التحدي ده عن طريق تخفيف التوتر، وتقليل الاستجابة العصبية، وده اللي بيساعد المخ في مقاومة الأمراض. وكل صيام وأنتوا بخير بقى.
طبعًا شرط كل الفوايد دي للصيام بترتبط بإن الأكل في الفترة دي يكون أكل صحي، لأنك لو أكلت أكل غير صحي، فده بيكون سبب كفيل لتدمير كل فوايد الصيام، وزيادة الوزن ومشاكل كتير في الهضم وغيره. والدليل هدومك اللي بتقفل بالعافية على العيد ومخك اللي بيبقى مش مستوعب كمية الأكل والسعرات الحرارية اللي بتدخل له دفعة واحدة بعد صيام طويل.
جسمك بيحس وقتها إنها داخل على معركة لازم فيها يستفيد من كل لقمة أكلتها ويخزنها كمان عشان يحمي نفسه من حالة “المجاعة” اللي بيحس إنه دخل فيها بسبب عدد ساعات الصيام الطويلة، جسمنا في الأغلب ذكي ولو عودته على نمط معين بيبدأ بعد فترة يستجيب ليك وينفذه، ولذلك لو حاولت تقلل من الأكل غير الصحي، وتدخل مكانه بدائل صحية جسمك هيستفيد وهيبقى عارف إنه مش المفروض يخزن من السعرات الحرارية الرهيبة اللي بتدخل له.
المصادر: cosmicscientist collective-evolution youtube
