عيني بترف وراسي بتلف وأشياء أخرى
كتب: أحمد حسين
أول مره عرفت موضوع عيني بترف ده كان من جدتي. كانت تبقى قاعدة في آمان الله، وفجأة تقول: ”خير اللهم أجعله خير“ وتمسك عينيها، فسألتها إيه ده وليه بتعمل كده؟ قالت لي إن عينيها بترف وده معناه إن في حاجة وحشة هتحصل. كنت ساعتها أصغر من إني أعرف معنى الكلام ده، بس لما كبرت الموضوع أثار فضولي الحقيقة، يعني إيه عيني بترف؟ وليه لما كوعي بيخبط في حاجة دراعي بينمّل؟ وأشياء من هذا القبيل.
وعرفت إن جسمنا ساعات بيتطوع يعمل حاجات زي دي بغض النظر عن تركيزنا معاها، ممكن نتكلم عن 5 منهم اللي هما… ماتيجوا نشوف؟
1- التثاؤب أو المتاوبة: حط إيدك على بُقك لا الشيطان يعمل بيبي!
إحنا بنتاوب لما نيجي ننام أو وإحنا تعبانين صح؟ لكن إيه سبب التثاؤب ده علميًا؟ لحد دلوقتي ماحدش عارف بالظبط، بس سنة 2014 مجموعة من الباحثين من أكتر من جامعة اجتمعوا وعملوا بحث عن التثاؤب، لقوا إن التثاؤب ده بيحصل لما حرارة المخ تعلى علشان يقللها، لأن مخنا بيحتاج طاقة أكبر من أي عضو تاني، فلما بيسخن جدًا بنتتاوب علشان نقلل من الحرارة دي، عن طريق صعود الأكسجين للمخ والسماح للدم بالتدفق. باختصار، أهمية الموضوع تشبه أهمية المروحة للكمبيوتر واللابتوب.
2- الزغطة: لعبة الحجاب الحاجز المفضلة
الزغطة بتيجي فجأة، وبلا سابق إنذار، فتحتاج تكتم نفسك ولا تسف لك معلقة سكر، أو حد يخضك تقريبًا حسب الموروث الشعبي عندنا. الزغطة دي بتحصل ليه؟ بتحصل لما الحجاب الحاجز يحاول ينظم التنفس، وفجأة يحصل خطأ ما، أو بمعنى أصح يحصل تشنّج في الحجاب الحاجز، فنضطر ناخد كمية أكبر من الاكسجين علشان نحل المشكلة. ممكن يكون سبب التشنج ده الأكل الكتير، أو الشرب بسرعة، أو الأكل الحار مثلًا. بنتخلص منها عن طريق سحب نفس وكتمه أو شرب مياه بكمية مناسبة.
3- التنميل: يا ساتر على ده إحساس.. تشنجات بعدها!
عارف لما تبقى قايم من على الكرسي بعد فترة جلوس طويلة وتلاقي رجلك نملت ومش قادر تمشي، ولا لما تخبط كوعك في حاجة خشب مثلًا، يا بااااي على ده إحساس، صعب فعلًا ورخم. والإحساس الرخم ده بيحصل لما نضغط على عصب في الرجل أو الدراع، والضغط ده بيقلل من وصول الدم للمكان ده، فلما الضغط ده يتشال، الجزء اللي كان عليه ضغط بيحاول ياخد نصيبه من الدم علشان يقدر يشتغل تاني بشكل طبيعي، فبيحصل اللي بتحس بيه ده، وكل اللي عليك ساعتها إنك تقف ثابت وماتعملش حاجة والإحساس ده هيروح لوحده.
4- عيني بترف: ربنا يستر!
الموضوع علميًا طلع مالوش أي علاقة بالفال الوحش، ولا حاسس بمصيبة جاية لي يا لطيف يا لطيف والكلام ده، عينينا بترف لما نبقى حاسين بتوتر، أو إرهاق، أو مش نايمين كويس، أو زودنا جرعة الكافيين شوية زيادة. العين ممكن ترف لمدة ثواني أو دقايق، أو حتى لشهور، بس هي عمومًا مش مؤذية، يمكن مزعجة شوية، بس لو حسيت إن الموضوع مطوّل أوي ممكن تروح للطبيب تطمئن.
5- اهتزازات بداية النوم: الوقوع في الحلم خير!
ساعات كده، لما بنبدأ ندخل في النوم خلاص وهنبدأ نحلم، تلاقي نفسك فجأة روحت واقف في الحلم، واتهزيت في الحقيقة وصحيت. اللحظة دي بتسمى اهتزازات بداية النوم، واللي بتحصل نتيجة تسليم المخ الواعي مهامه للعقل الباطن أو اللاوعي علشان يشوف شغله بقى. اللي بيحصل ساعتها إنه ممكن المخ يتأخر في تسليم مهامه للاوعي، فيتردد، فيحصل موضوع الوقوع في الحلم ده وتقوم تصحى وبعده بثواني بترجع تنام تاني عادي جدًا.
المصادر:
