9 معلومات لازم كل ست تعرفهم عن الأورام الليفية

كتبت: مها طــه

مؤخرًا مع ظهور السوشيال ميديا وانتشار الفضائيات بدأ كتير من الأطباء والأخصائيين في الظهور والانتشار وتصوير عملياتهم، لدرجة إن في منهم بقوا فعليًا من مشاهير السوشيال ميديا وبياخدوا سيلفي في أوض العمليات. أكثر الدكاترة دول انتشارًا هما أطباء النساء والتوليد ومن بعدهم أطباء الأسنان والتجميل. المهم لقيت في مرة من المرات بوست ظهر قدامي لأحد أطباء النساء المشهورين ومرفق معاه مجموعة من الصور من داخل غرفة العمليات وخارجها، البوست مكتوب فيه إنه بفضل الله تم إزالة عدد من الأورام الليفية من داخل رحم بنت في التلاتينات تقريبًا، والحقيقة إن الصور كانت فعليًا أقل ما يقال عنها إنها مرعبة!

اللي لفت نظري أكتر من الصور، هي كمية الكومنتات اللي فيها بنات خايفين من إنهن يكونوا مصابات بالنوع ده من الأورام أو اللي فعليًا مصابات بيه. من ردود الدكتور عليهم ومن متابعة صفحته وصفحات وبرامج تانية، اكتشفت إن الموضوع كبير فعلًا، لدرجة إن حوالي 70% من السيدات والبنات معرضات للإصابة بيها في فترة من فترات حياتها.

الأورام الليفية.. خطر محدق أم عرض عابر؟!

مبدئيًا وقبل الكلام عن أي حاجة لازم نقول إيه هي الأورام دي؟ الأورام الليفية هي عبارة عن نمو غير طبيعي للأنسجة داخل الرحم. بينتج عن تكتل خلايا عضلية غير سليمة. وعلى الرغم من إن كل الأورام الليفية الرحمية زي بعضها إلا إنها بتتصنف على حسب موقعها.

• Submucosal: الأورام  اللي بتقع تحت بطانة الرحم.
• Intramural: الأورام  اللي بتقع بين عضلات جدار الرحم.
• Subserol: الأورام اللي بتمتد من جدار الرحم إلى تجويف الحوض.

دلوقتي ونظرًا لانتشار مصطلح الأورام الليفية ده كتير، وزي ما قولنا بقى يصيب حتى بنات صغيرين في التلاتينات وأحيانًا قبل كدة كمان، كان لازم نتكلم عنه شوية ونقول لكل ست وبنت عن 9 حقائق علمية لازم تكوني عارفاهم وإنتِ بتقرأي أو بتسمعي عن الأورام الليفية.

• الأورام الليفية منتشرة جدًا

الأورام الليفية هي أكثر أنواع أورام الرحم انتشارًا، لدرجة إن إحدى الدراسات قالت إن ما بين 70 – 80% من السيدات بتصاب به بحلول سن الخمسين ويمكن كمان في أواخر الأربعينات، بالتزامن مع الاضطراب الهرموني اللي بيحصل في الفترة دي، كنتيجة لانقطاع الطمث.

• الأورام الليفية ليست سرطان

الأورام الليفية في الأساس هي أورام حميدة (ليست سرطانية) لكنها ليها أعراض مشابهة لشكل نادر من السرطان يُسمى الورم اللحمي الرحمي (uterine sarcoma).للأسف العلماء والأطباء ماعندهمش وسيلة موثوقة لحد دلوقتي للكشف عن الورم اللحمي إلا بعد ما يقوموا بالعملية الجراحية اللازمة لإزالة الأورام الليفية الرحمية. عشان كده لما سيدة بتعرف إن عندها الأورام دي، الطبيب بينصحها بإنها تاخد بالها وتتابع بشكل دوري خوفًا من إصابتها بالورم اللحمي الرحمي، بالإضافة طبعا لتحليل عينة من الأورام الليفية اللي تمت إزالتها.

• احتمالية الإصابة بالأورام الليفية متفاوتة بين السيدات

الأورام الليفية ليها عوامل بتختلف من ست للتانية وبتلعب دور في إنها تخلي معدل الإصابة عند بعض الستات أو البنات أعلى من الستات التانية. يعني مثلًا السيدات الأمريكيات من أصل أفريقي هم الأكثر عرضة للإصابة بالأورام الليفية بمرتين أو تلاتة من غيرهن. للأسف كمان ممكن الأورام دي تتطور عندهن في سن مبكر وتنمو لأحجام أكبر وغالبًا بيكون السبب فيها جيني. كمان زيادة الوزن ممكن تكون من العوامل المؤدية للإصابة بالإضافة لعدم الحمل ولا مرة. وأخيرًا إن العائلة يكون ليها تاريخ مرضي مع الأورام الليفية.

• العديد من النساء لا تظهر عليهن أعراض ولا يحتاجن لعلاج

الأورام الليفية غالبًا لا تتطلب علاج إلا في حالة إنها بتتسبب في أعراض زي النزيف الغزير أو آلام الحوض والظهر أو زيادة الآلام المصاحبة للدورة الشهرية عن الطبيعي، وأحيانًا الانتفاخ في منطقة البطن.

“أنطونيو بيزارو”، طبيب أمراض النساء والمتخصص في طب منطقة الحوض عند السيدات وأستاذ الجراحة الترميمية، بيقول إن معظم السيدات المصابات بالأورام دي مش بيعانوا من أي أعراض، ولذلك بيكون العلاج مش ضروري، لكن الأطباء بيوصوا بالكشف الدوري والمتابعة خوفًا من خطر الورم اللحمي الرحمي زي ما قولنا.

•  السبب الرئيسي لعمليات استئصال الرحم

أكتر من 200 ألف عملية من عمليات استئصال الرحم بتتم سنويًا في الولايات المتحدة بسبب الأورام الليفية في الرحم. العملية دي بتُعتبر من العمليات الخطيرة مش بس لإنها بتخلي المرأة عقيمة، لكنها كمان بتنطوي على مخاطر تانية، ولذلك الدكاترة مش بيلجأوا للحل ده إلا في حالة إن الأورام الليفية كانت كبيرة للغاية وبتتسبب في ألم شديد، وبالتالي مالهاش أي حل إلا استئصال الرحم نفسه.

• استئصال الرحم مش الحل الوحيد

حاليًا بقى في أنواع مختلفة من العلاجات والخيارات الطبية المتاحة عشان تقلص أو تبطأ نمو الأورام الليفية بما فيها العلاج الهرموني والعلاج بالموجات فوق الصوتية أو استئصال الورم العضلي، وفي الحالة دي بيتم الحفاظ على الرحم سليم. والحقيقة إن عملية استئصال الورم بتتطلب مهارة من الطبيب، لكن كمان أحيانًا الأورام الليفية بيبقى مش من اللازم إزالتها أصلًا، فممكن اللجوء لمجموعة من الأدوية زي الإيبوبروفين وحبوب منع الحمل وغيرها وده اللي بيحدده الدكتور.

• أكثر الأعراض شيوعًا هو تدفق الحيض بشكل غزير

أشهر الأعراض المرتبطة بالأورام الليفية هي النزيف الدموي الغزير، لدرجة إن ممكن ينزل مع دم الحيض تجلطات دموية. الأورام الليفية كمان بتسبب نزيف بين الدورة الشهرية والدورة اللي بعدها، وبتزود من الحاجة للتبول ده غير آلام وتقلصات منطقة الحوض، والشعور بالانتفاخ والشعور بالألم في أثناء ممارسة الجنس.

• لايزال بإمكان المرأة الحمل لكن ربما تواجه بعض الصعوبات

معظم السيدات المصابات بأورام ليفية ممكن يحملوا عادي جدًا، لكن وجودها ممكن يتسبب في وجود بعض المضاعفات في أثناء الحمل لإن بعض أنواع الأورام الليفية ممكن تتسبب في تغيير شكل وحجم الرحم نفسه، ده طبعًا مرتبط بشكل وثيق بقدرة المرأة على الحمل.

وعلى الرغم من إن الخبراء في مجال الأورام الليفية بيقولوا إن نسبة تسبب الأورام الليفية في العقم لا تتعدى الواحد أو الاتنين في المية، إلا إنها على الجانب الآخر بتتسبب في زيادة احتمال الولادة القيصرية في مقابل الولادة الطبيعية بمعدل 6 مرات أكتر، مع احتمالية بيرة لحدوث نزيف غزير جدًا بعد الولادة.

• العلماء مازالوا لا يعرفون السبب الحقيقي للإصابة بها

لحد دلوقتي السبب الدقيق لحدوث الطفرات اللي بتتسبب في الأورام الليفية يعتبر مجهول على الرغم من الانتشار الكبير للأورام دي. لكن كتير من البحوث الجديدة بترجح إن السبب يكون له علاقة بالهرمونات زي الاستروجين والبروجيسترون، وده لأن الأورام دي نادرًا ما بتظهر قبل حدوث الطمث لأول مرة في حياة البنت، وبيرجع يظهر مع فترة انقطاع الطمث. كما إن بعض الدراسات التانية بتميل كمان لفكرة إن له علاقة بالنظام الغذائي والظروف البيئية المحيطة وكمان مستوى التوتر والقلق.

فأي واحدة منكم تلاحظ أي من الأعراض اللي ذكرناها في الموضوع أو الآلام دي، ما تكسلش وتروح لدكتور نسا تكشف عنده وتطمن.. ومع تمنياتنا بكل الصحة والعافية ليكم كلكم.

المصادر: womenshealth  webmd  healthline