.
حيّ يرزق

دورة حياة الفراشة: دخلت اليرقة الشرنقة .. هوب بقت فراشة

كتبت: يارا كمال

كلنا عارفين إن اليرقة بتعمل شرنقة حواليها، شوية وتتحوّل لفراشة. يمكن كمان نكون شفنا التحوّل من بره.

دورة حياة الفراشة

بس السؤال بقى اللي جه في بالي: هو إيه اللي بيحصل جوه؟ يعني ليه التحوّل ده مايحصلش في الهواء الطلق بدل الشرنقة والمرمطة؟

اليرقة          اليرقة                        اليرقة                    اليرقة                            اليرقة                    اليرقة

(ده تتابع لليرقة من ساعة ما كانت في البيضة وبعدين خرجت وابتدت تتخلص من جلدها مرة ورا التانية)

في البداية، البيضة بتفقس وبتطلع منها يرقة جعانة، فبتطلع الطلعة بتاعة حضرتك الساعة اتناشر بليل اللي بتاكل فيها كل حاجة في التلاجة: بتاكل ورق شجر لحد ما تحشي نفسها وتدملك كده وتقلبظ وتبقى أطول، بعد كده بتوقع جلدها من على جسمها على كذا مرحلة، يعني مرة ورا التانية.

وفي يوم من الأيام، اليرقة بتبطل أكل وبتعلق نفسها بالمشقلب على غصن صغير أو ورقة شجر، وبتلف نفسها بالشرنقة، واللي بعد كده بتبقى شرنقة بتلمع. وجوه الشرنقة بقى، اليرقة بتتحوّل عشان تبقى في الآخر فراشة أو عتة (الاتنين قريبين أوي من بعض).

 

اللي بيحصل بقى جوه الشرنقة إن اليرقة بتهضم نفسها _أيوه زي مانت قريت كده_ يعني اليرقة بتفرز إنزيمات عشان تدوّب كل أنسجتها، يعني لو مسكت الشرنقة وقطعتها في الوقت اللي دابت فيه كل أنسجة اليرقة، هتلاقيها بينزل منها ما يشبه السوائل كدة أو بمعنى آخر شوربة يرقة… يييع 😀

ده مش معناه إنها خلصت على كده. فيه مجموعات معينة من خلايا اليرقة منظمة جدًا اسمها ”imaginal discs“ والخلايا دي بتستحمل عملية الهضم وبتفضل موجودة. قبل ما البيضة تفقس، يعني واليرقة لسه بتنمو جوه البيضة، بينمو فيها مجموعة من الخلايا  دي لكل جزء من أجزاء الجسم البالغ للفراشة أو العتة، يعني قرص للعينين وقرص للأجنحة وقرص للرجلين وهكذا.

اليرقة (أهي قرون الاستشعار والأجنحة موجودة أهيه قبل مرحلة دخول الشرنقة، بس لسه مش مكتملين)

في بعض الأنواع، الـ”imaginal discs“ بتفضل ساكنة طول ما اليرقة يرقة، وفي أنواع تانية، مجموعات الخلايا دي بتبدأ تاخد شكل أجزاء الجسم البالغ بتاع الفراشة والعتة حتى قبل ما اليرقة تكوّن الشرنقة. يعني يعض اليرقات بتمشي بأجنحة بدائية دقيقة مدسوسة في جسمها ومش باينة، زي الصورة فوق.

بمجرد ما اليرقة تحلل كل أنسجة جسمها ما عدا الـ”imaginal discs”، الـ”discs“ دي بتستخدم السائل الغني بالبروتينات اللي حواليها الناتج عن تحلل الأنسجة، عشان تزوّد انقسام الخلايا السريع بالطاقة. الانقسام ده اللي بينتج عنه تكوّن الأجنحة وقرون الاستشعار والرجلين والعينين والأعضاء التناسلية وبقية أجزاء جسم الفراشة أو العتة البالغة.

يعني مثلًا الـ”imaginal disc“ بتاع جناح ذبابة الفاكهة ممكن يبدأ بخمسين خلية بس ويزيد لحد ما يوصل لأكتر من 50 ألف خلية على نهاية التحول.

اليرقة                         اليرقة
اليرقة(أهي الشرنقة اتعملت في أول صورة، وفي الصورة التانية بقت صلبة،
وفي الصورة التالتة، اتحولت اليرقة لعتة جميلة)

وحسب النوع، فيه عضلات معينة وأجزاء من الجهاز العصبي لليرقة بتفضل موجودة في جسم الفراشة البالغة. ده فيه دراسة بتقول إن العتة بتفتكر الحاجات اللي اتعلمتها في المراحل الأخيرة من حياتها وهي لسه يرقة.

هي الفكرة إن الشرنقة دي بيحصل فيها هوايل. تقدروا تقولوا إن اليرقة مش بتغزل الشرنقة بس، دي تعتبر بتغزل جسمها كمان.

اعرف أكتر| التروس الميكانيكية في الحشرات: الطبيعة دايمًا سبّاقة


المصادر:  scientificamerican  wormspit  iflscience  nationalgeographic
مصدر الصور: wormspit.com

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى