اضطرابات الأكل: حلم الجسم المثالي ينتهي بالموت المُحقق!
كتبت: مها طــه
قدام المراية، حالة من الهلع أول ما تشوف شكلك فيها، تجري على الميزان وتعيط، أنا إزاي لسه 47 كيلو زي ما أنا، لأ لأ لازم أشوف حل محتاج أفطر خيارة واحدة بدل اتنين، وياريت لو قللت شوية في الغدا كمان بلاش دبوس الفرخة، هقسمه على يومين، ومفيش عشا بعد كده خالص!
اضطرابات الأكل.. مش كل نقصان حلو
عمرك قابلت حد بيعاني من حاجة شبه دي، أو أنت شخصيًا عديت بالمشاعر دي، لو أه في الأغلب ده معناه إننا في حالة إصابة بواحد من اضطرابات الأكل. وعلى عكس الاعتقاد الشائع بإن اضطرابات الأكل ما هي إلا نتيجة لنمط الحياة اللي بيتبعه الشخص، بالعكس اضطرابات الأكل تعتبر أمراض خطيرة وفي أحوال كتير مميتة كمان، وبتتسبب في اضطرابات شديدة في سلوكيات الأكل عند المصاب بيها.
فكرة الهوس بالأكل والاهتمام المبالغ فيه بالوزن وشكل الجسم تعتبر من ضمن مؤشرات الإصابة باضطرابات الأكل، وعلى عكس الشائع برضة عن إن اضطرابات الأكل كلها متعلقة بفقدان الشهية، فهي كمان متعلقة بأنواع تانية من الاضطرابات زي الشره العصبي (الأكل بشراهة) و اضطراب الإفراط في تناول الطعام. وهنتكلم عن الأنواع دي بالتفصيل.
فقدان الشهية العصبي:
فقدان الشهية العصبي هو الاضطراب الأشهر بين الناس لما نتكلم عن اضطرابات الأكل، بالرغم من إنه مش الأكثر انتشارًا بين المصابين بيها. الأشخاص اللي بيعانوا من الاضطراب ده دايما شايفين وزنهم زايد، حتى لو كان وزنهم مظبوط أو أقل كمان من المظبوط، وأحيانًا بيفضل الاعتقاد ده عندهم حتى لو وصلوا لمرحلة بيعانوا فيها من حالة نحافة مفرطة.
الأشخاص المصابين بفقدان الشهية العصبي عادةً مهوسيين بفكرة الميزان، بعضهم بيوزن نفسه كل يوم وأحيانًا أكتر من مرة في اليوم، بينتبهوا بشدة لأي حاجة بياكلوها، بياكلوا نوعيات معينة من الأكل وبكميات محددة جدًا وقليلة جدًا، وده مش عشان بيحافظوا على وزن معين أو اتباعًا لنظام حياة صحي، بالعكس تمامًا ده بيحصل بشكل مرضي مش طبيعي.
فقدان الشهية العصبي صاحب أعلى معدل وفيات بين كل الاضطرابات العقلية، وده راجع إلى إن عدد كبير من الشباب والبنات المصابين بالاضطراب ده بيموتوا نتيجة للمضاعفات الخطيرة المرتبطة بالمرض ده منها دخول الجسم في حالة المجاعة، ده غير اللي بيموتوا كنتيجة للانتحار بسبب الضغط العصبي والنفسي الناتج عن الحالة دي. الغريب كمان إن الاصابة بفقدان الشهية العصبي في البنات يعتبر الأكثر شيوعًا بين كل مسببات الانتحار الناتجة عن أغلب الأمراض العقلية.
الأعراض:
زي ما قولنا بتكون عادةً الإصابة بفقدان الشهية مصحوبة بأعراض من نوعية تقليل كميات الأكل وتحديد نوعياته بشدة، والإصابة بالنحافة المفرطة والهزال والسعي الدؤوب لفكرة الحفاظ على الوزن مصاحب ليها خوف وهلع شديد من اكتساب الوزن، ده غير إحساس الشخص نفسه بإن وزنه زايد وصورته المشوهة في عين نفسه، وإنكاره لخطورة انخفاض وزنه بالشكل ده بالرغم من تحذيرات كل اللي حواليه.
بعض الأعراض دي بقى بيتطور لحاجات تانية كمان بمرور الوقت، هشاشة العظام والأنيميا وضعف العضلات وتساقط الشعر وضعف الأظافر ونمو شعر ناعم أشبه بالزغب بتاع الأطفال عشان يساعد في تدفئة الجسم بعد فقدان كتير من الدهون والعضلات اللي بتقوم بالدور ده، والموضوع مش واقف عند كدة كمان في الأغلب بيصاب الشخص بالإمساك الشديد.
الأمور لو ما تمش علاجها في المرحلة دي بتتطور أكتر لحد ما تسبب انخفاض ضغط الدم وضعف النبض، وبالتالي يبدأ القلب يتضرر بشدة وقد يمتد الأمر لتلف في المخ كمان، أو حدوث حالات فشل وظيفي متعددة في أعضاء مختلفة من الجسم، زي الفشل الكلوي والكبدي وغيرهم.
ده غير انخفاض درجة حرارة الجسم الداخلية نظرًا لعدم وجود أكل كفاية يولد طاقة كافية، وبالتالي شعورهم بالبرد طول الوقت تقريبًا، ده غير إن اللي المصابين بفقدان الشهية العصبي بيعانوا الخمول والشعور بالتعب والإرهاق طول الوقت.
الجدير بالذِكر إن معظم اضطرابات الأكل بتظهر خلال سنوات المراهقة وده راجع إلى إن المراهق نفسه بسبب بنيته النفسية والعصبية بيكون أكثر عرضة للإصابة بالأمراض النفسية والعقلية في السن ده، ده غير فكرة التقلبات الهرمونية في الفترة دي واللي أحيانًا بيكون ليها تأثير على الوزن وسلوكيات الأكل، وبالتالي ممكن ينشأ عند المراهق/ة خوف مرضي من فكر زيادة الوزن دي.
لكن برضه ده لا يمنع إنها ممكن تصيب حد في مرحلة الطفولة أو بعدها، وبتؤثر على الجنسين بنفس الدرجة، على الرغم طبعًا من إن معدلات الإصابة باضطرابات الأكل أعلى في الستات عنها في الرجالة، وزي ما الستات ممكن يكونوا أكثر عرضة لفقدان الشهية العصبي، كمان الرجال ممكن يصابوا بـ”الإحساس المشوه تجاه الجسم”، في صورة ما يعرف بالتشوه العضلي وهو نوع من الاضطرابات بيتسم بالقلق البالغ من فكرة وجود العضلات بشكل أوضح وأكبر في الرجال عنها في الستات.
اعرف أكتر| هي كيرفي، إذن هي سيكسي!
في النهاية، لو تعرف أي شخص أو أنت شخصيًا بتعاني من مشكلة مرتبطة بالأكل وعندك هلع أو خوف من فكرة اكتساب الوزن لازم تتوجه ضروري لطبيب متخصص، لأن اللي النهاردة يبدو تحت بند “خسينا واحلوينا” ممكن بكرة يقلب لكابوس فظيع قد لا ينتهي على خير إطلاقًا، ونوصل لما لا يحمد عقباه. استنونا في المقال اللي جاي عن الشره العصبي والإفراط في تناول الطعام.
المصادر: nhs eatingdisorderscoalition eatingdisorderhope nedc webmd
