عصر ما بعد المضادات الحيوية: المقاومة التي تهدد البشرية
كتبت: مها طـه
تقدر تعد المرات اللي أخدت فيها مضاد حيوي في حياتك؟ طيب أخر مرة أخدت مضاد حيوي إمتى؟ غالبًا كده هتلاقي نفسك أو اللي حواليك من مدمني المضادات الحيوية، عندك صداع ..عندك دور برد.. عندك احتقان في الحلق، كله علاجه المضاد الحيوي!
في الأغلب لو إنت بتقرا المقال ده، هتكون سمعت عن الحالة اللي اكتشفوها في أمريكا لبكتريا مقاومة لكل أنواع المضادات الحيوية، هل فعلًا ممكن تكون في بكتريا مضادة لكل الأنواع؟ طب وإيه الخطر اللي هيحصل لو فعلًا موجود نوع مقاوم لكل المضادات؟ وإزاي نقدر نسيطر على عواقب ده؟
الموضوع بدأ بخبر في ”رويترز“، رصد أول بكتريا مقاومة لـ”كل“ أنواع المضادات الحيوية! الخبر طبعًا كان عبارة عن سبق أعلن عنه المسؤولين في القطاع الصحي في الولايات المتحدة، واللي عبروا عنه بقلق شديد وتخوف كبير، لأن البكتريا اللي اكتشفوها دي كانت مقاومة لنوع من المضادات الحيوية بيُطلق عليه ”مضادات الملاذ الأخير“، النوع ده من المضادات بيُستخدم في الحالات اللي بتبقى فيها البكتريا مقاومة للأنواع التانية من المضادات، والنوع ده بيتسمى بـ”البكتريا القاتلة“.
اعرف أكتر| البكتريا تحتل العالم.. بل تحتل حضرتك شخصيًا!
المضاد الحيوي اللي البكتريا قاومته اسمه ”الكوليستين“، واللي له درجة سُمّية عالية جدًا، والدكاترة بالفعل مش بيستعملوه إلا في حالات معينة، بيكون غالبًا متوقف عليها إنقاذ حياة المريض. طبعًا كل الكلام ده قلب الدنيا رأسًا على عقب، وبدأت التصريحات عن إننا داخلين على عصر ما بعد المضادات الحيوية، على حسب وصف ”توماس فريدن“، مدير المراكز الامريكية لمكافحة الأمراض والوقاية منها CCD، كتعقيب على إصابة سيدة أمريكية عندها 49 سنة بعدوى بالجهاز البولي، حالة الست دي تم اعتبارها كحالة للدراسة، وتم تسجيلها في دورية علمية تابعة للجمعية الامريكية لعلم الأحياء المجهري.
الحقيقة إنه بعد إعلان الخبر عن البكتريا المقاومة لكل أنواع المضادات الحيوية، رويترز نزلت تصحيح للخبر، بإن البكتريا مقاومة للنوع ده من المضادات الحيوية بس اللي ذكرناه (مضادات الملاذ الأخير)، مش لكل الأنواع ولا حاجة، وبعيدًا عن إننا مش هنتكلم هنا خالص عن المهنية ونقل الخبر الصحيح وتحري الدقة، فده لا يعني إن النوعية دي من الأخبار عادي تعدي مرور الكرام لأنه للأسف الموضوع فعلًا مش بالبساطة دي.
البكتريا ومقاومة المضاد الحيوي
بدراسة البكتريا المقاومة دي، العلماء لقوا إنها من النوع (E.coli)، البكتريا دي في الأصل وقبل ما تُصيب السيدة دي كانت مصابة بعدوى. ثانية واحدة كدة هي البكتريا بتُصاب بعدوى؟ أيوه، في الحقيقة البكتريا وأنواع كتير من الكائنات الميكروبية بتُصاب بالعدوى من كائنات ميكروبية أخرى، الكائنات اللي بتنقل العدوى دي، بتنقل جزء من البلازميد بتاعها للبكتريا المُصابة. وهنا لازم نسأل إيه هو البلازميد ده؟
البلازميد هو جزء حلقي من الـDNA البكتيري، بيبقى شايل المعلومات الوراثية (جينات) لكن بيحصل عليه طفرات جينية كتير، وهو السبب في تطور البكتريا أصلًا وقدرتها على التكيُف. بلازميد البكتريا اللي بنتكلم عنها أُصيب ببلازميد شايل جين إسمه ”mcr-1“، واللي بيُعتبر مقاوم للـ”كوليستين“.
المشكلة إن الحالة اللي اكتشفوها دي بتُنذر بوجود أنواع تانية من البكتريا تقدر تتطور ضد نفس النوع من المضاد الحيوي، عن طريق انتقال الجين ده ليهم، واللي لسوء الحظ قادر على إنه ينتشر بسرعة كبيرة في حالة إنه انتقل، حتى لو كان في بيئة مُعقمة زي المستشفيات، وده وفقًا لكلام دكتور ”جايل كاسيل“، عالم الميكروبيولوجي والمحاضر في كلية الطب بجامعة هارفرد.
حاليًا بيتصاعد بشدة الخوف من تطور البكتريا ومُسببات الأمراض ضد الأنواع المختلفة من المضادات الحيوية، وده طبعًا نتيجة طبيعية للاستخدام المُفرط للمضاد الحيوي لكل حاجة في الدنيا، فطبيعة البكتريا والكائنات الميكروبية إنها بتتطور بشكل مُستمر عشان تقدر تتكيف مع البيئة اللي عايشة فيها، يعني تخيل إنك تقريبًا قصاد كل خلية من خلايا جسمك، في 10 كائنات ميكروبية _مش شرط مُسببة للمرض_ عايشة جواك، وإنت مع كل دور برد أو أي التهاب بسيط بتعرضها لكميات من المضاد الحيوي، فحتى الكائنات اللي عايشة بشكل طبيعي جوة جسمك، هتبدأ تتطور ويمكن التطور ده يخليها تكون مؤذية أصلًا.
عصر ما بعد المضاد الحيوي
على فكرة التحذير من الاستخدام الخاطئ والمُفرط للمضادات الحيوية مش جديد، ”ألكسندر فليمنج“، مُكتشف البنسلين، كان من أوائل من حذروا في مقال ليه كتبه سنة 1945 من إن الشخص اللي بيتعامل من غير حذر مع البنسلين ممكن يتسبب فعليًا في وفاة شخص ما، كنتيجة لتكوّن بكتريا مضادة للمضاد الحيوي ده. ومن مطلع التسعينات ولحد دلوقتي كان كل الخبراء في المجال الصحي بيحذروا من المضاد الحيوي، وبيدعوا الأطباء إنهم يستعملوه مع الحالات اللي تتطلب فقط.
اعرف أكتر| اعرف إزاي تتعامل صح مع الدوا بتاعك في البيت
في الولايات المتحدة الأمريكية، كانت نتيجة مقاومة المضادات الحيوية هي حوالي 2 مليون شخص على الأقل أُصيبوا بأمراض فشلت فيها المضادات الحيوية، وحوالي 23 ألف حالة وفاة سنويًا، متخيلين الرقم؟! مش بس كدة خلينا نقول كمان إنه طبقًا لكلام د ”طاهر حجاب“، الأستاذ المساعد بجامعة كاليفورنيا للعلوم الصحية، والمتخصص في علم الصيدلة، إنه في تقرير إنجليزي بيتنبأ إن بحلول سنة 2050 هيكون في حالة وفاة بسبب الميكروبات المقاومة للمضادات الحيوية كل 3 ثواني على مستوى العالم. أفريقيا لوحدها هيكون فيها 4 مليون حالة وفاة سنويًا بسبب الميكروبات دي، مقابل حوالي 300 ألف في أوروبا وأمريكا!
عندنا بقى، المضاد الحيوي بالنسبة للمصريين هو الدواء السحري اللي بيتاخد لأي حاجة، يعني مثلًا ”الفلوموكس“ أحد أشهر أنواع المضادات الحيوية اللي بتتاخد لأي حاجة ومن غير ما الدكتور يقول، كان الموقف المتبع ”إنت تعبان وبتشتكي من أي حاجة، انزل على الصيدلية خد شريط فلوموكس على طول“، لحد ما بقى فعليًا الفلوموكس مش فعّال مع ناس كتير، وتم الإتجاه في الكام سنة اللي فاتوا للـ”أوجمنتين“، واللي من المُنتظر إنه هيحصّل الفلوموكس ويبقى مالوش لازمة كمان كام سنة.
في صورة تحليل صدمتني أنا شخصيًا، ممكن نشوفها مع بعض وهاحاول أشرحها، الصورة لتحليل مزرعة بول لمريض، التحليل بيظهر فيه نمو لنوع من البكتريا (Gram negative bacilli – E.coli)، التحليل بيوضح أنواع المضاد الحيوي اللي ممكن البكتريا تبقى حساسة تجاهها، وبالتالي تساعد الدكتور في وصف المضاد الحيوي المناسب.
على إيدك الشمال هتلاقي الأنواع اللي البكتريا حساسة تجاهها، وهي نوع واحد، وفي النص الأنواع اللي البكتريا متوسطة الحساسية تجاهها، وهي نوع واحد بس برضه، أما بقى المفاجأة فكانت في الأنواع اللي البكتريا بتقاومها وهي 20 نوع من المضادات الحيوية للأسف!
النهاية..؟
الحقيقة إننا لازم نقول إن تصاعد مقاومة البكتريا والميكروبات بشكل عام للمضادات الحيوية، سببه الرئيسي هو البشر واستخدامهم المبالغ فيه للمضاد الحيوي، وإنه حاليًا العالم كله خايف من خطر المقاومة دي لدرجة إن في شركات كبيرة للأدوية زي ”Pfizer – فايزر“ و”جونسون & جونسون“ و ”GSK – جلاكسوسميث كلاين“، وقعت على إعلان بيدعو الحكومات لدعم الاستثمار في مجال تطوير أدوية محاربة الميكروبات المقاومة للمضادات الحيوية.
تخيل وإنت جاي تاخد المضاد الحيوي دلوقتي، إنك ممكن في يوم من الأيام تحتاجه لمرض أهم وأخطر وللأسف مش هتلاقيه وقتها أو إنه هيخليك مش قادر على مقاومة مرض أهم وأخطر في المستقبل، لأنك بتستخدمه غلط، أو إن حتى استخدامك الغلط ليه ممكن يكون هو السبب في وفاة شخص أو أشخاص كتير في العالم كله.
مقاومة المضاد الحيوي خطر كبير بيهدد البشرية كلها تقريبًا، ربنا يوفق العلماء بقى إنهم يستغلوا العلم في الوصول لحل للمشكلة دي، لكن لحد ما يوصلوا على الأقل ماتبقاش سبب في زيادة الخطر والتسريع بحصول الكارثة، بلاش المضاد الحيوي غير بإشراف طبي، وللسادة الدكاترة، أرجوكم بلاش وصف المضاد الحيوي كعلاج سريع لمختلف أنواع الأمراض أيا كانت بقى سواء كانت محتاجة ده أو لأ، وأنتوا أهل الطب وأكيد أدرى بالعواقب.
المصادر: cdc.gov reuters aac.asm arstechnica taherhegab webmd who.int emerald
