”بوليستر“ القميص ده ولا قطن طبيعي؟!
كتبت: مها طــه
أكيد على الاقل مرة فى حياتك قابلت حد قالك الهدوم دى صناعي ”بوليستر“، يعنى إيه أصلًا هدوم صناعى ما كل الهدوم بتتصنع! وإيه هو البوليستر ده؟
بوليستر .. القميص ده؟!
الـ بوليستر(Polyester) : هو مجموعه من البوليمرات (جزيئات عضوية كبيرة تتكون بارتباط جزيئات صغيرة متشابهة)، وتحتوى على ”الإستر“ كمجموعة وظيفية (مجموعة تعطي المركب وظيفته وخصائصه). البوليستر ممكن يكون مادة طبيعية زي الكيوتين (الطبقه الشمعيه اللى بتغطى سطح النبات)، أو مادة مصنعة فى معامل ومختبرات. البوليستر الطبيعى وبعض الأنواع الصناعية ممكن تتحلل فى أجسام الكائنات الحية، إنما غالبا معظم البوليستر الصناعى لا يتحلل و لذلك يُستخدم بشكل كبير فى صناعة الملابس.(1)
يُصنع البوليستر عن طريق تفاعل حمض كربوكسيلى مع كحول، و بذلك تتكون مجموعة الإستر، و بإضافة بوليمرات جديدة خطوة بخطوة يزداد طول السلسلة و يزداد حجم البوليستر.
يتم تصنيف البوليستر إلى نوعين:
1 – بوليسترات مُشبعة: ودي بتكون قدرتها على الدخول فى التفاعلات الكيميائية أقل، وهي عبارة عن سوائل وزنها الجزيئي قليل. بيتم استخدامها فى صناعة المواد البلاستيكية لأنها بتكسبها المرونة وفي نفس الوقت بتقلل من الهشاشة، كمان بيتم استخدامها فى تكوين البوليمرات للحصول على بوليستر بوزن جزيئي كبير يدخل فى صناعة خيوط من اللدائن الحرارية (يعنى مواد تلين بالحرارة و تتصلب مرة أخرى عند تبريدها).
2 – بوليسترات غير مُشبعة: ودي بتكون قدرتها كبيرة على الدخول فى التفاعلات الكيميائية، وبتُستخدم فى صناعة البلاستيك المقوى، وبتعتبر أهميتها الاقتصادية كبيرة جدًا.(2)
إيه هى أهم مميزات البوليستر عشان يُستخدم فى كل الصناعات دي؟
1- وزنه خفيف وبيتحمل درجات الحرارة العالية (بينصهر عند درجة حرارة من 249 لـ288 مئوية).
2- بيتميز بقوة النسيج، مقاومته للتمدد والانكماش ولمعظم الكيماويات.
3- مقاوم للتجعُد (مش محتاج يتكوي)، مقاوم لتغير اللون وللخدش.
4- بيعتبر ماده طاردة للمياه، وبالتالي بيجف سريعا، ولذلك كمان يمكن استخدامه كمادة عازله ضد الماء.
5- ولإن البوليستر بيحتفظ بشكله غالبًا، بيتم استخدامه بشكل كبير فى صناعة الملابس وبالذات اللي بتُستخدم فى الأجواء الصعبة زي الأمطار الغزيرة أو الحرارة العالية.(3)
للبوليستر أنواع كتيرة بتدخل فى صناعات غير الملابس زي:
PET: بتدخل فى صناعة الزجاجات البلاستيكية، واللي بتعتبر من أكتر المنتجات استخدامًا فى العالم كله ومن أرخصها، ويكفي إن تجارة المشروبات كلها ممكن تتوقف إذا توقف تصنيع الزجاجات دي.
المايلر: نوع من البوليستر غير مشهور، بيُستخدم فى صناعة البالونات (مش اللي بنلعب بيها لكن البالونات الكبيرة اللى بتكون موجودة فى الأفراح) وبيتم تصنيعها باستخدام المايلر وورق الألومنيوم .
البوليستر المتنوع: يتم استخدامه فى صناعة الحبال والخيوط القوية، خراطيم المياه، أشرعة المراكب والكثير من الصناعات الأخرى.(4)
أما عن تصنيع البوليستر فهو ممكن يتم بطرق كتيرة، بتتوقف على الشكل النهائي المطلوب للبوليستر. فى أربع طرق رئيسية فى تصنيع خيوط البوليستر:
أولًا نوع بتكون الخيوط فيه طويلة، وتنتُج منها الأقمشة الناعمة، ثانيًا خيوط بيتم قصها عشان تبقى قصيرة، وبالتالي يبقى سهل استخدامها مع خيوط أخرى فى الصناعة (زي القطن)، ثالثًا بتكون الخيوط فيها طويلة وبيتم سحبها بشكل يجعلها فضفاضة، رابعًا شكل ضخم من الخيوط بيُستخدم فى صناعة اللحاف والمخدات وبعض انواع الملابس.(5)
غالبًا بيتم تصنيع البوليستر من البترول لوجود الأحماض والكحولات فى تركيبه، وبيتم التصنيع على 3 مراحل:
فى المرحلة الأولى: بيتم التفاعل بين الحمض والكحول فى درجة حرارة عالية بتساعد فى تكوين البوليمرات، بعد تكوين البوليمرات بيتم صبها فى أحواض مخصوصة للصب وبتكون على شكل شرائط، بمجرد ما تبرد الشرائط بيتم تقطيعها إلى شرائح.
في المرحلة الثانية: بيتم تجفيف الشرائح دي تمامًا، وبيتم حفظها فى خزانات حتى تنصهر بداخلها_ لإن البوليستر له ميزة فريدة فأليافه بتتحول إلى نسيج. بعد تسخين الشرائح بيتم لفها على المغازل وتركها لتبرد فى الهواء ثم يتم تجميعها على شكل أسطوانات.
فى المرحلة الثالثة: بعد أن تعرضت الخيوط للحرارة ازداد طولها حوالى 5 أضعاف وبالتالي قل عرضها وبذلك يكون الخيط جاهز للاستخدام، و يتم لفه فى شكل أقماع (بكرة خيط) ويتم تقطيعه إلى الأطوال المناسبة حسب الاستعمال.
البوليستر فى الطبيعه يعتبر ألياف لامعة، أما المُصنع فيكون نصف لامع أو باهت تمامًا، وبتغيير نوع المغزل يمكن تغيير شكل وقوة نسيج البوليستر، وبزيادة تجعيد البوليستر ممكن زيادة حجم النسيج، وبالتالى زيادة قدرته على عزل الحرارة و العوامل الأخرى، البوليستر قابل للصبغ و بالتالي يمكن أن تكتسب أليافه أي لون.(6)
المصادر:
