هى الحيوانات بتنتحـر زينا ؟!
كتبت: شيرين الدرستاوي
هي الحيوانات بتنتحر زيّنا؟! سؤال ممكن تسأله لنفسك خصوصا لو قريت الكام حادثة الجايين دول معانا:
-
سنة 1845 فى لندن، أحد الصحف أشارت إلى كلب سليم ”وسيم وذو قيمة“ كان كل شوية بيغرق نفسه فى بركة وكل لما حد يشيله من المية يرجع يكرر نفس التصرف تانى لحد ما مات.
-
بعض الحيتان أثناء هجرتها بتموت نتيجة الكثافة العدادية.
-
حوت قاتل تم نقله من بيئته فى المحيط إلى تانك حجمه أصغر كتير من بيئته الأصلية، فده شكل ضغط عليه وبدأ يبقى عنيف ويخبط بجسمة فى التانك ومات.
-
دبة فى الصين خنقت ابنها وبعدين موتت نفسها والموضوع ده حصل بعد ما خدوا منها عينة عصارة صفراوية عن طريق قسطرة وفى احتمال إنها عملت كده علشان مايحصلهاش لا هى ولا ابنها كده تاني.
-
هو نوع من الطفيليات أُصِيب بيه فأر أدى إلى خلل في الدماغ و نتيجة لكده ماخفش من القطة لما شافها، وبالفعل هاجمته ومات Toxoplasma gondii.
-
نوع تانى من الفطريات اسمه ”Ophiocordyceps unilaterali“ بيصيب النمل بيخليه زي الزومبي وياكل فى بعضه ويتغذى على أقرانه من النمل.
-
مؤخرًا وجدوا نوع من إناث العناكب بتسمح لولادها ياكلوها حيه خوفًا من إنهم يجوعوا وهنا هي بتضحي بنفسها من أجل أبنائها -(الأم المثالية).
-
سيدة صينية شاهدت بجعة صغيرة عمالة تخبط بجناحها في الميه وجنبها بجعه أكبر، اكتشفوا بعدها إن البجعة الصغيرة هي بنت البجعة الكبيرة اللي ماتت والبجعة الصغيرة كانت بتعمل كده بعد موت مامتها.
حقيقة انتحار الحيوانات
بعد كل الموتات الغريبة دي نيجى بقى نتكلم فى الإجابة عن سؤالنا. أولًا تعريف الانتحار هو فعل قتل النفس عن عمد. ثانيًا إجابة سؤال هل الحيوانات بنتنحر؟! هي لأ مش بتنتحر.
رغم إن الحوادث الغريبة اللي سبق ذكرها ممكن تشككنا في الاحتمال ده، لكن أحد الباحثين في جامعة مانشيستر قال إن الحيوانات بتفتقر المقدرة على رؤية موتها أو تخيله وإنها بطبيعتها بتميل للحفاظ على حياتها.
في حين مجموعه تانية من العلماء شافت إن الرأى اللي فات بيقلل من قدر الحيوانات الفكرية، وقالوا إن الحيوانات قدرتها العقلية تسمح لها إنها تتخذ قرار زي ده، وإنهم مش عارفين لحد دلوقت إزاي ومين من الحيوان اللى يقدر يعمل كده، وقالوا إن الحيوانات عندها سلوك تدمير نفسي.
الحيوانات أصلا ماتعرفش الموت ومش بتخاف منه زي الإنسان لكن بتخاف من الحاجات اللى ممكن تؤدى للموت، يعنى تخاف لما الحيوانات التانية الأقوى منها تجوع لإن لو كانت الحيوانات مش بتخاف من الخطر عامة كانت الغزالة مشيت جنب الأسد ولا أى اندهاش لكن ده مش بيحصل لإنها عارفة إنه هياكلها لكنه مش خوف من الموت.
ثانيًا الحيوانات ماعندهاش خيال زي الإنسان. الانتحار بيتطلب إن الانسان يتخيل إنه مش هيكون موجود تاني. كمان الانتحار بيتطلب التخطيط وده طبعا أعلى من مستوى الحيوانات مهما بلغ ذكائها.
فملخص الموضوع إن الحيوان ميعرفش الموت لكن سلوك الحيوان ممكن يتغير نتيجة العوامل اللى سبق ذكرها فيؤدى لإنه يموت لكن هو مابييجيش فجأةً يقول أنا زهقت من الدنيا ولازم أنهي حياتي دلوقتي، بدليل إنه لو الحيوانات دى اختفى سبب تغير سلوكها، فبالتالى هترجع طبيعية وهتموت موتة طبيعية.
المراجع:
