10 حالات جنسية غير معتادة – الجزء الأول
كتبت: يارا كمال
فيلم “النوم في العسل” بدأ بقصة عريس انتحر والمباحث اكتشفت إن انتحاره كان بسبب فشله في ممارسة العلاقة الجنسية الكاملة مع مراته. ممكن قصة زي دي كانت تخلص بإن الراجل ده يروح يتعالج عند دكتور ويرجع لطبيعته والموضوع ينتهي، بس طبعًا احنا عندنا دي فضيحة، لدرجة إنه تجنبًا للفضيحة دي أصحاب بيفضلوا يعزموا عليه في فرحه بأقراص منشطات جنسية عشان يضمن إنه هينجح في تلك الليلة الميمونة.
حالات جنسية غير معتادة
مشكلة زي دي ممكن تكون شايعة ومعروفة، بس فيه مشاكل تانية وحالات جنسية نادرة، وممكن تكون عكس مشكلة العجز خالص بس في نفس الوقت أنيل. مش عارفة لو حد في مجتمعنا أتعرف إن عنده مشكلة من دول هتبقى فضيحة برضه ولا هيعتبروها قدرات زايدة وعادي؟
في الحالتين، هيكون عندنا مشكلة، لإنها في النهاية اضطرابات لا ينفع نتعامل معاها على إنها وصمة عار ولا إنها حاجة كويسة. خلونا نستعرضهم عشان نفهم أكتر وكمان عشان هما متباينين:
1. اضطراب الاستثارة الجنسية الدائمة (PGAD)
المصابين بالاضطراب ده بيحسوا بحالة استثارة جنسية بشكل دائم. أعراض الاضطراب ده بتختلف بس في الغالب المصابين بيه بيحسّوا بآثار الاستثارة على جسمهم زي احتقان الأعضاء التناسلية، بدون حتى التفكير في الجنس، وممكن كمان تكون من الأعراض دي إن الأعضاء التناسلية تكون حساسة جدًا لدرجة إن أنواع معينة من الأقمشة ممكن تسبب إثارة للمنطقة دي لو اتلبست عليها.
ممكن الناس المصابين بالاضطراب ده يحسوا بالنشوة الجنسية لعدد مرات ممكن يوصل لعشرات المرات كل يوم، أو ممكن يضطروا يثيروا نفسهم بنفسهم عشان يوصلوا لحالة الارتياح، بس للأسف حالة الارتياح دي ماتدومش لفترات طويلة، وبعدها يرجع الإحساس بالإثارة خلال ساعات أو دقايق أو حتى ثواني، وممكن الإثارة دي تستمر لمدة أيام أو أسابيع أو شهور في المرة الواحدة.
حاسس إن الموضوع لذيذ؟ لأ خالص على العكس بقى. الستات اللي بيصابوا بالاضطراب ده مابيبقوش مبسوطين لإنه بيتسبب في ضعفهم وبيحرمهم من النوم وبيعطلهم عن الشغل وممكن يمنعهم من الأكل مع أسرتهم حتى.
بعض الستات المصابين بالاضطراب ده بيقولوا إنه عندهم من وهما أطفال، وفيه اللي بييجي لهم أثناء الحمل أو في فترة بعد انقطاع الطمث.
الطب ما اتعرّفش على الاضطراب ده إلا في العشر سنين اللي فاتوا، والأطباء لسه مش متأكدين من سببه. بس المرجح يكون بسبب خلل أو تلف في الأعصاب الحسية.
بس الخبر الحلو إن الموضوع ده بيتعالج. فيه بعض المرضى اتعالجوا بأدوية مضادات الاكتئاب أو بعقار بيساعد المدخنين على التبطيل. طبعًا لو فيه ست في بلدنا صرّحت بإن جالها المرض ده، مش هيعملوا لها عملية ختان بس ده مش بعيد إنهم يلبسوها حزام العفة زي زمان، ده غير الفضيحة بقى.
هو صحيح الاضطراب ده بييجي للستات بس ولا إيه؟
عادةً الأطباء بيستخدموا مصطلح ”اضطراب الاستثارة الجنسية الدائمة“ مع الستات، وبيستخدموا ”القساح“ (priapism) مع الأعراض المشابهة في الرجالة.
مش كل الباحثين متفقين على الفرق ده، خصوصًا إن الستات ممكن يصابوا بالقساح برضه، ده غير إن العلم اتعرّف على القساح من مدة طويلة.
2. القساح
القساح بيتضمّن عَرَض أساسي وهو احتقان مؤلم في أنسجة الانتصاب بيستمر لأكتر من أربع ساعات، وده بيحصل نتيجة احتباس الدم في منطقة الأعضاء التناسلية ومابيرجعش يسري تاني عشان يرجع لبقية الجسم.
الستات كمان ممكن يجيلهم قساح، بس الاضطراب ده أكثر شيوعًا بين الرجالة، وعلى فكرة الستات بيحتاجوا علاجات مختلفة عن الرجالة في الحالة دي.
القساح ممكن يحصل لوحده، وممكن يحصل بسبب بعض الأدوية أو الأمراض. يعني أحيانًا بيكون أثر جانبي للأدوية اللي بتعالج عدم القدرة على الانتصاب، وبعض مضادات الاكتئاب وبعض المخدرات زي الكوكايين.
كمان الرجالة المصابين بفقر الدم المنجلي حوالي 40% منهم بيجيلهم قساح. وبعض السرطانات والإصابات في الصفن (كيس الخصيتين) والقضيب ممكن تسبب الحالة دي.
لو كمية الدم المحبوس في الأعضاء التناسلية كبيرة، القساح ممكن يبقى حاجة لازم تتلحق، لإن ممكن الحالة دي تسبب تلف الأوعية الدموية وظهور ندوب وفقدان الجزء ده قدرته على أداء وظيفته (يعني دي مش حاجة كويسة للرجولة، لو فاكرها حاجة حلوة) وممكن يسبب غرغرينا كمان لو ما اتعالجش.
كل ما الواحد خد باله من المشكلة بدري، كل ما كانت فرص الشفاء الكامل أكبر. ممكن حقن أدوية علاج الاحتقان في عيادة الدكتور أو في المستشفى ترجّع سريان الدم بشكل طبيعي مرة تانية.
ولو المريض فضل عنده انتصاب أكتر من 4 ساعات، ممكن يحتاج تحويلة جراحية عشان تعيد توجيه تيار الدم وممكن كمان يتخلصوا من الدم اللي في القضيب بإبرة وطبعًا الدكتور هو اللي بيقوم بده.
لكن بالنسبة للستات، فالحالة دي لا تمثل حالة طوارئ، بس ده لا يمنع إنها مؤلمة جدًا. ممكن العلاج يبقى كمادات تلج وممكن يبقى علاج للالتهاب، واللي في العادة بيخفف الحساسية للألم والتورم.
الحالة دي مرتبطة بأسطورة إغريقية. الحالة اسمها (priapism) واللي جاية من اسم الإله الإغريقي ”بريابس“، والمعروف بقضيبه الكبير واللي كان منتصب بشكل دائم.
”هيرا“ إله الزواج لعنت ”بريابس“ في رحم أمه ”أفروديت“، لإن ”هيرا“ كانت غيرانة من جمال ”أفروديت“ ومكانتش عايزة ابنها يورث منها جمالها. ”بريابس“ بيُعتبر إله الخصوبة وهو اللي بيحمي الماشية والمحاصيل.
3. فرط الرغبة الجنسية
فرط الرغبة الجنسية بيعتبر اضطراب عقلي وفقًا للدليل التشخيصي والإحصائي للاضطرابات النفسية (DSM). الناس المصابين بالاضطراب ده بيبقى الجنس مستحوذ عليهم وبيأثّر في حياتهم بشكل كبير. الناس دي ممكن يمارسوا الجنس مع أي حد، عاهرات بقى أو يعملوا ده مع أشخاص غرباء عنهم، وحتى مابيبقوش خايفين من إن يتنقل لهم أمراض، وحتى لو مرتبطين بشخص معين، مابيقدروش يكونوا مخلصين للشخص ده. طبعًا لو حضرتك منهم وبتشهّد مراتك دلوقتي، لأ روح اتعالج يا بابا.
المشكلة بقى إن الناس المصابين بالاضطراب ده مابيطلبوش المساعدة من حد ومش شايفين إن سلوكهم ده فيه مشكلة، لأ وكمان بيبقوا شايفين ده مصدر فخر، اللي هو ده أنا جامد جدًا.
اعرف أكتر| ما بين المرض النفسي والعقلي والعصبي
فرط الرغبة الجنسية ممكن يصاب بيه الناس المصابين باضطرابات تانية، زي الاضطراب ثنائي القطب واضطراب الفصام العاطفي، وكمان المصابين باضطرابات عصبية زي مرض ألزهايمر وإصابات المخ الرضية كجزء من اضطراباتهم دي.
وفيه بعض أدوية ممكن تسبب فرط الرغبة الجنسية زي الأدوية اللي بتعالج مرض الشلل الرعاش.
علاج اضطراب فرط الرغبة الجنسية بيختلف حسب الاضطراب التاني المرتبط بيه، بس مثلًا أدوية تثبيت المزاج زي الليثيوم بتقلل الدافع الجنسي عمومًا، وكمان العقاقير اللي بتقلل مستويات التستوستيرون بتبقى مفيدة لبعض المرضى.
كمان العلاج بالكلام ممكن يساعدهم يتعرّفوا على مشكلتهم ويشتغلوا على إنهم يمنعوا دافعهم الجنسي من إنه يسوقهم كده.
4– السكسمونيا أو الجنس النومي .. حلم ولا علم:
الاضطراب ده عبارة عن ممارسة الجنس أثناء النوم. طبعًا مفيش حاجة ممكن تيجي في دماغي في الوقت ده قد فيلم ”اعترافات زوج“، لما يوسف وهبي أقنع فؤاد المهندس إنه لما حلم إنه مارس الجنس مع هند رستم، إن ده كان حقيقة مش حلم.
فعلًا محدش من المصابين بالاضطراب ده بيبقى عنده أي فكرة عن اللي عمله وهو نايم، إلا لو حد عرّفه وقدّم له الدليل على كده كمان زي فؤاد المهندس كده بالظبط.
بيتراوح سلوك المصابين بالجنس النومي بين ممارسة العادة السرية والاتصال الجنسي مع حد أثناء النوم. يعني المصابين بيه بيمشوا وهما نايمين من بيوتهم ويمارسوا الجنس مع ناس أغراب عنهم، لأ وكمان ممكن يرتكبوا حوادث اغتصاب واعتداء جنسي.
الجنس النومي هو نوع من خطل نوم حركة العين غير السريعة (non-rapid-eye-moment (NREM) parasomnia)، وده اضطراب بيحصل في الفترات اللي ما بين النوم العميق والصحيان.
من ضمن الاضطرابات اللي بتندرج تحت الفئة دي: المشي أثناء النوم والأكل أثناء النوم والكلام أثناء النوم والذعر الليلي وطحن الأسنان، وعادةً الناس المصابين بالجنس النومي بيبقى عندهم نوع كمان أو أكتر من خطل النوم (parasomnia).
ممكن ناس ييجي لها الاضطراب ده لوحدها كده، وممكن العوامل اللي بتخلي النوم يضطرب تثير الاضطراب ده زي الضغط أو الحرمان من النوم أو انقطاع النفس أو تناول الكحول والمخدرات.
طبعًا الناس المصابين بالجنس النومي بيبقوا محرجين من سلوكهم، ده غير إنه ممكن يدمّر حياتهم زي فيلم ”اعترافات زوج“ كده. فيه رجالة كتير اُتهموا بالاغتصاب بسبب الجنس النومي، وبعد تشخيص حالتهم اتبرأوا.
علاج الجنس النومي بيعتمد على علاج الحالة الأساسية المتسببة فيه. يعني مثلًا، استخدام آلة الضغط الهوائي الإيجابي المستمر (CPAP) في علاج انقطاع التنفس أثناء النوم بيقلل أو يقضي على اضطراب الجنس النومي عند الناس اللي عندهم الحالتين.
وبرضه المصابين بالاضطراب ده بيتعالجوا بعقار اسمه كلونازيبام (كلونوبين) مضاد للقلق واللي بيُستخدم في علاج بقية أنواع خطل النوم.
في الجزء الجاي، هنتكلم عن ناس الجنس مابيمثلّهمش حاجة خالص، وناس تانية ليها طريقتها الخاصة في ممارسة الجنس أو الاستثارة واللي بتوصل لمراحل أجارك الله منها.
المصادر: howstuffworks webmd mayoclinic
