.
نوّرها

الألم الجنسي: عندما يعترض الألم طريق النشوة

كتبت: يارا كمال

الجنس من أكتر الحاجات اللي بتسبب نشوة للإنسان، لأ وحاجة ببلاش كده، في حد ذاتها يعني بغض النظر عن المصاريف اللي بيتطلبها الجواز عشان الناس اللي بتفضل مماسة الجنس في إطار شرعي والمصاريف الناتجة عنه اللي هي مصاريف الخلفة.

المشكلة بقى لما بيكون عند حد من الطرفين مشكلة، ومش لازم يبقى الطرف ده هو الراجل وعنده ضعف جنسي ومابيعرفش وجو النوم في العسل وكده.  فيه ستات كمان بيعانوا من عدم الرضا الجنسي، وأهم أعراض ده اضطرابات الألم الجنسي.

الألم الجنسي : الاضطرابان الأشهر

الاضطرابين الأكثر شيوعًا هما عسر الجماع ”Dyspareunia“ والتشنج المهبلي ”Vaginismus“.

عسر الجماع: هو ألم متكرر أو مستمر في المنطقة التناسلية مرتبط بمحاولة الإيلاج أو دخول القضيب في المهبل. الألم ممكن يكون في المهبل أو في عمق الحوض.

ممكن عسر الجماع يحصل بعد العدوى المهبلية أو جراحة في منطقة الفرج أو منطقة الحوض بشكل عام أو نتيجة ترقق المهبل (نقص في سمك جداره) في فترة ما بعد انقطاع الدورة الشهرية.

أما العدوى المهبلية، فدي بتسبب احمرار وحكة وحرقان في الفرج، والحالة دي بتتسمى التهاب الفرج أو ”vulvitis“. عسر الجماع ممكن كمان يحصل نتيجة عدوى زي مرض القلاع أو الكلاميديا أو السيلان أو الهربس التناسلي. كمان التشوهات الخلقية زي البكارة الرتقاء (اللي بتقفل فتحة المهبل تمامًا) أو عدم اكتمال تكون المهبل.

اعرف اكتر عن انواع غشاء البكارة من هنا 

بالنسبة بقى للـتشنج المهبلي: فده عبارة عن انقباضات لا إرادية مستمرة أو متكررة في عضلات التلت الخارجي من المهبل، وده طبعًا بيتعارض مع الإيلاج.

من الحاجات برضه اللي بتسبب الألم الجنسي، إن الست تكون مش مسترخية أو مش مستثارة كفاية، عشان كده إتاحة الوقت الكافي للمداعبة مهمة، لإن الإيلاج هيبقى مؤلم لو المهبل جاف ومش مهيأ للعملية الجنسية. وممكن في الحالات دي تستخدم مزلق (lubricant).

ممكن كمان نقص ترطيب المهبل طبيعيا لتخفيف الاحتكاك أثناء العملية الجنسية يكون بسبب انخفاض مستوى الإستروجين بعد انقطاع الطمث أو الدورة الشهرية، أو بعد الولادة وفي أثناء الرضاعة.

فيه كمان أدوية بتحجّم الرغبة والإثارة الجنسية وده بيقلل الترطيب وبيخلي الاتصال الجنسي مؤلم، زي مضادات الاكتئاب وأدوية الضغط العالي والمسكنات ومضادات الهستامين وبعض حبوب منع الحمل.ممكن كمان عدم الاسترخاء نتيجة الضغوط اليومية أو القلق يسبب الألم ده.

إيه العمل في الوقت ده يا صديق؟

لما نعرف السبب، نقدر نعالجه. لو واحدة مثلًا عندها عدوى مهبلية هي اللي مسببة الألم ده، لو اتعالجت، هتتحل المشكلة. لو المشكلة في الترطيب، فممكن يستخدموا استروجين موضعي كتعويض، وممكن زي ما قلنا يستخدموا مزلق.

ممكن كمان يبقى الموضوع  إن الست محتاجة مداعبة لمدة أطول. الكلام مع الزوج أو الشريك كمان مهم، عشان تشرحي إيه اللي بالنسبة لك لطيف وإيه لأ، وممكن تطلبي منه إن العملية تكون أبطأ.

كمان مفيش مانع من تغيير الوضعية أثناء العملية الجنسية، بمعنى إن لو الست هي اللي فوق، ده ممكن يخليها تقدر تتحكم أكتر، لإنها بتقدر ساعتها تتحكم في عمق الإيلاج المناسب بالنسبة لها واللي يخليها ما تتألمش، وكمان بيمنع الضغط على عضلات الحوض أو على عنق الرحم بشكل يؤلمها.

فيه كمان تمارين لمنطقة الحوض اسمها (تمارين كيجل)، ممكن تساعد في تقليل الألم. وفيه كمان تمارين لتمدد المهبل، من خلال اختراقه باستخدام الصباع أو موسّع (dilator)، لإنها لو استحملت دخول الجسم ده – طبعًا مش للآخر-  ممكن تستحمل الإيلاج، بس يستحسن ده يحصل باستشارة الطبيب طبعًا.

أما بقى لو الاستثارة الجنسية نفسها بتسبب رد فعل سلبي عندك، ممكن تروحي لاستشاري علاقات جنسية عشان يساعدك في حل المشكلة. على فكرة، الرجالة كمان ممكن تحس بالألم في بعض الحالات، زي الإصابة بمرض القلاع واللي ممكن يسبب ألم وحكة، أو بعض الأمراض المنقولة جنسيًا زي الهربس، وممكن برضه بسبب الالتهاب في البروستاتا.

كمان الاتصال الجنسي لأول مرة بيبقى مؤلم بالنسبة للست، بس بالنسبة للرجالة مابيبقاش مؤلم ولا حاجة، وبالتالي المداعبة لوقت كافي لحد ما المهبل يترطب بشكل كافي بتكون مهمة، وكمان الرفق والإيلاج ببطء هيكون شيء لطيف منعًا للجنس المؤلم.

المصادر:   howstuffworks  mayoclinic  hnhs.uk  nhs.uk2  mayoclinic2

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى