التنوع البيولوجي: “كلنا متصلين في دايرة الحياة الكبيرة”

كتبت: مها طـه

فيلم الأسد الملك (Lion King) واحد من أهم الأفلام في تاريخ جيل التمانينات والتسعينات، يمكن يكون من أحلى الأفلام في تاريخ ديزني كله. فيلم مليان بالمشاعر وبكتير من القيم المهمة، وكفاية إنه اتكلم عن فكرة التنوع البيولوجي من قبل حتى ما نفهم يعني إيه تنوع بيولوجي.

في الحوار العظيم اللي بيدور بين الأب “موفاسا” وابنه “سيمبا”، بيقول له إن الحكم هو إنك تؤدي واجباتك مش بس تطيع رغباتك، وبيبدأ يشرح لسيمبا إن كل المخلوقات في الكون بتعيش في توازن دقيق، والحاكم المفروض يفهم التوازن ده ويحترم كل المخلوقات من أول النملة ولحد البقرة، وحتى ولو كان الأسد بياكل البقرة.

التنوع البيولوجي أصل الحياة وسبب استمرارها

التنوع البيولوجي يعني تنوع أشكال الحياة على الأرض من نباتات وحيوانات وكائنات دقيقة بشكل عام، ووفقًا لبرنامج الأمم المتحدة للبيئة، نقدر نقيس مدى التنوع البيولوجي عن طريق التنوع الجيني في الكائنات الحية، وتنوع البيئات اللي عايشة فيها الكائنات دي، ده غير انتشار الأنواع المختلفة من نفس الفصيلة.

أنواع التنوع البيولوجي
التنوع البيولوجي بينقسم لأنواع أرضية، وأنواع تانية مائية. الأنواع دي مش متوزعة بشكل متساوي، يعني مثلًا التنوع البيولوجي الأرضي بيكون أكتر بالقرب من خط الاستواء، وده نتيجة للمناخ الدافئ والبيئة الغنية بالعناصر الضرورية للحياة. المناطق المدارية بتكون دايمًا هي الأغنى، فرغم إن الغابات الاستوائية بتغطي حوالي 10% من سطح الأرض إلا إنها بتحتوي على حوالي 90% من الأنواع الموجودة في العالم.

أما عن التنوع البيولوجي البحري، فسواحل غرب المحيط الهادي هي أكثر مناطق العالم من حيث الغنى بالأنواع دي، لأن درجة حرارة سطح البحر في المناطق دي بتكون الأعلى، ده غير إنها في المنتصف من كل المحيطات. عمومًا مناطق التنوع البيولوجي غالبًا بتكون هي المناطق الدافئة والغنية بالغذاء.

التنوع البيولوجي وأثره في حياة الإنسان

الإنسان كائن مستكشف بطبيعته لكنه كمان للأسف كائن مُخرِب؛ بيحاول يستغل كل شئ لخدمة مصالحه، لكن بسبب ممارساته أغلب الوقت بيكون هو الطرف المجني عليه مع إن هو الجاني من الأساس. الإنسان بعدم إدراكه لأهمية البيئة اللي بيعيش فيها وعناصرها، ممكن يخربها في سبيل الحصول على شوية عاج، أو فرو أو حتى إشباع رغبات عدوانية تجاه النباتات والحيوانات الموجودة في بيئته.

التوازن البيئي هو سر استمرار الحياة على الأرض على مر ملايين السنين، ولأن البيئة دايما بتسعى للتوازن، فهي دايمًا بتعوض الفاقد فيها، وحتى لما بتهدد الأرض كوارث طبيعية أو أحداث انقراض ضخمة، كانت دايمًا البيئة بترجع للتوازن. ومهما كان الكائن صغير-من وجهة نظرنا- إلا إنه بيلعب دور مهم جدًا في حفظ التوازن ده.

التنوع البيولوجي هو اللي بيضمن استمرار هذا التوازن واستمرار الحياة ككل، بدون التنوع البيولوجي حرفيًا مش هنلاقي الأكل، لأننا لو تخيلنا موت الأنواع اللي بنتغذى عليها من النباتات والحيوانات وحتى الحشرات، فالبشرية كلها هالكة بدون شك، ونفس الكلام لو قولنا طب خلاص هنحافظ على الأنواع اللي بناكلها بس. ومش مهم الباقيين.

أحب أقولك إن التنوع البيولوجي هو اللي بيضمن كل الآتي:

• حماية الموارد المائية: عن طريق ضمان وجود واستمرار النظام البيئي البحري.
• تكوين التربة: بمختلف أنواعها وحمايتها (مثلًا البكتيريا اللي بتحلل الكائنات الميتة وتخرج العناصر المهمة للتربة منها، وتخزنها فيها بشكل يسمح باستخدامها عن طريق النباتات)
• تخزين المواد الغذائية وإعادة استخدامها: زي النباتات اللي بتحول طاقة الضوء والمغذيات لمواد غذائية بتستفيد منها وتستخدمها، ومنها تدخل لأجسام كائنات حية تانية.
• الحد من التلوث في البيئة: بوجود الكائنات المحللة اللي بتتخلص أول بأول من الفضلات وبقايا الكائنات الميتة وغيرها.
• المساهمة في استقرار المناخ: ولذلك حدوث خلل في التنوع البيولوجي بيعتبر واحد من أهم المشاكل المرتبطة بتغير المناخ.
• ضمان إعادة التوازن للبيئة: في حالة حدوث كوارث طبيعية غير متوقعة (زي انفجار البراكين أو الزلازل والتسونامي وغيرها)

كل ما فات ده بيعبر بس عن أهمية التنوع البيولوجي بالنسبة للبيئة، ودي الأهمية غير المباشرة، طب بالنسبة للأهمية المباشرة، فوجود تنوع بيولوجي بيوفر الآتي:

• الأكل طبعًا.
• بيساهم في تطور الطب وصناعة الأدوية (ماننساش فطر البنسليوم مثلًا اللي بيستخلص منه البنسلين).

  

• الحصول على المنتجات الخشبية.
• تربية الحيوانات بغرض المساعدة في الزراعة أو الاستثمار في الإنتاج الحيواني.

أما بقى على المستوى الاجتماعي، فالتنوع البيولوجي بيساهم في تطوير البحث والتعليم والرصد، غير دوره في جذب السياحة زي الشعاب المرجانية في البحر الأحمر، بالإضافة لقيمته الثقافية زي منطقة وادي الحيتان اللي انضمت لقائمة التراث العالمي كأثر شاهد على فترة زمنية وجيولوجية قديمة في عمر الأرض.

جهود الأمم المتحدة للحفاظ على التنوع البيولوجي

نظرًا للأهمية الكبيرة للتنوع البيولوجي وأثره على الحياة في كوكب الأرض، تم توقيع اتفاقية التنوع البيولوجي برعاية الأمم المتحدة، وهي معاهدة متعددة الأطراف، وبتضم عدد من الأهداف الرئيسية على رأسها حفظ التنوع البيولوجي، وتم فتح باب التوقيع على الاتفاقية دي في مؤتمر قمة الأرض في ريو دي جانيرو يوم 5 يونيو 1992، ودخلت حيز التنفيذ في ديسمبر 1993.

وكان أول انعقاد لمؤتمر الأطراف سنة 1994 في ناساو بجزر البهاما، وفي خلال الشهر ده، مصر هتستضيف النسخة الـ14 من المؤتمر في شرم الشيخ بمشاركة أكتر من 195 دولة من مختلف أنحاء العالم. مصر هي أول دولة عربية وأفريقية تستضيف المؤتمر، واللي بيحمل شعار “الاستثمار في التنوع البيولوجي من أجل رفاهية الإنسان وحماية الكوكب”.

نيون هيكون معاكم طول فترة المؤتمر عشان يغطي معظم الأحداث والفاعليات والتوصيات اللي هيخرج بيها المؤتمر، ونتمنى نقدم أحسن صورة لمصر، وينتج عن المؤتمر إجراءات وقوانين فعلية تتطبق على أرض الواقع للحفاظ على التنوع البيولوجي بشكل عام وفي البيئات المصرية بشكل خاص.. واستنونا في المقال اللي جاي عن التنوع البيولوجي في البيئات المصرية.

المصادر: cbd  globalissues  cop14-egypt  unesco