”عاش يا وحش“ كل العضلة ما توجع أكتر .. تكبر أكتر!
كتبت : مها طه
لكل الشباب المهتمين بالعضلات والجيم والشكل الحلو ولكل واحد لسه مبتدئ وناوى يروح الجيم بما إن الصيف قرب وعاوزين نعمل فورمة الساحل بالإضافة طبعًا للطموحات الخاصة بالـ”سكس باكس“، طبعًا بعد أول يوم فى الجيم بتحس إنك محتاج حد يشيلك ويقومك ويوديك لأن فعلًا عضلاتك بتبقى وجعاك ومشدودة جدًا، وفجأة تلاقى حد جاي يقول لك فى تاني زيارة للجيم ”عاش يا وحش، كل ما العضلة توجع أكتر كل ما تكبر أكتر“!
الوجع اللي بتحسه فى عضلاتك تانى يوم بعد مجهود شاق أو تمرينة فى الجيم ما هو إلا مجموعة تمزقات صغيرة حصلت فى عضلاتك، التمزقات الصغيرة دي هي اللي بتسمح للعضلة بالتمدد لأنها بتتجدد لما بتتمزق وده اللي بيخليها تنمو لكن ده مش معناه إن كل ما كان الوجع أكبر، كل ما العضلة هتكبر أكتر.
ما تصدقش اللى يقولك شد على العضلة واتمرن 7 مرات فى الإسبوع لأنك للأسف لو شديت على نفسك أوى فى التمرين وحملت العضلة أكتر ما هى تحتمل، ده مش هيكبر العضلة، بالعكس هيؤذيها! المجهود الزيادة ممكن يسبب حالة اسمها ”microtrauma“، وده تحديدًا بيحصل لما تقوم بالتمارين بشكل عشوائي، فتبقى عضلاتك بتنقبض و تنبسط فى نفس الوقت، زي مثلًا لما بتمسك ”دامبل“ أو تشيل وزن تقيل على إيدك، وتفضل طالع نازل بيها بسرعة وعضلة دراعك توجعك بس تفضل مكمل، كل ده عشان خاطر عضلة ”الباي سيب“ تطلع وتبان حلوة من التيشيرت النص كوم.
”عضلة العضد أو الباي ستيب“ بتبقى نوعًا ما بطيئة فى الانبساط، وبالتالي مع تكرار الحركة وبشكل سريع وكمان وزن تقيل، بتبقى العضلة عاوزة ترتاح لكن إنت مش مديها فرصة، فالعضلة بتنقبض و تنبسط فى نفس الوقت. النوع ده من الحركة بيزود التوتر على البروتينات الموجودة فى العضلة، وبيسبب تمزقات صغيرة أوى، التمزقات دي بتحفز الالتهاب اللي بدوره بيعمل تورم بسبب التمزقات دي، وده بيحفز مُستقبلات الألم، يمكن بمرور الوقت عضلاتك هتتعافى والألم هيختفي لكن هل فعلًا عضلاتك دلوقتي بقت أقوى؟
بناء العضلات بيستلزم عمليات هدم وبناء صغيرة فى النسيج العضلي لكن الحقيقة العلماء لقوا إن مش شرط يكون الهدم اللي بيحصل فى العضلة مع المجهود الزايد مرتبط بكبر حجم العضلة ونموها، وإنه مش كل ما تتألم أكتر، عضلاتك هتكبر أكتر لأ للأسف.
طبعًا بعد كذا مرة في الجيم، هتلاقى التمرين بقى أسهل والوجع بقى أخف بسبب ”repeated bout effect“ أو أثر النوبات المتكررة، بمعنى تاني إن الألم اللي كان بيحصل نتيجة للمجهود الزيادة على العضلة واللي مش متعودة عليه، بعد فترة العضلة هتتكيف معاه والمجهود ده هيبقى عادي مش بينتج عنه ألم كبير زي الأول، وده ممكن نعتبره تشجيع من جسمك ليك عشان تروح الجيم وتهتم بلياقتك البدنية.
قوم خد الكوتشي واطلع على أقرب جيم، مارس رياضة وإجرى، خرج طاقتك السلبية واهتم برشاقتك وصحتك، جسمك ممكن يتعب أول مرة تانى مرة لكنه هيتعود ويتأقلم ويشجعك بعد كده، ولو عندك حلم الوصول للجسم المثالي _من وجهة نظرك طبعًا_ لازم تصبر شوية، ومتحملش على عضلاتك وتفتكر إنك لما تزود التمارين، هتوصل أسرع، وياريت وانت بتلعب رياضة، تبقى متابع مع متخصص عشان يبقى فاهم، ويتعامل مع احتياجات جسمك، ويوصل معاك لهدفك.
المصادر
