بتطرقع يا حسب الله وأنا بفرقع!
كتبت: يارا كمال
بتحب تطرقع صوابعك وفجأة بتلاقي شخص طلع لك من تحت الأرض بيوعظك ويوبخك، ويقول لك إن الحركة دي غلط وممكن تبوّظ مفاصلك؟ طيب يا ترى فعلًا الشخص ده عنده حق، أقصد في الكلام اللي بيتقال إن المفاصل بتحتك ببعضها وتتآكل وتلتهب وبتاع؟!
الحقيقة إنك لما بتطرقع صوابعك أو رقبتك أو أيًا كان، المساحة اللي ما بين العضمتين بتزيد، وده بيخلي الغازات اللي دايبة في السائل الزلالي (اللي بيشحّم المفاصل) تعمل فقاقيع ميكروسكوبية. الفقاقيع دي بتندمج مع بعضها وتعمل فقاقيع كبيرة. المفروض بيكون فيه سائل زلالي إضافي بيملى المساحة اللي اتمددت، والسائل ده بيفرقع الفقاقيع الكبيرة دي. وصوت الطرقعة ده بيبقى يا إما بسبب تكوين الفقاقيع أو فرقعتها، فيه اختلاف في النقطة دي!
لما بتطرّقع مفاصلك، ماينفعش بقى تطرقع نفس المفصل تاني قبل 15 دقيقة، وده الوقت اللي بتاخده المساحة بتاعة المفصل عشان ترجع لحجمها الطبيعي، واللي بتدوب فيه غازات أكتر في السائل الزلالي، فالغازات دي اللي ممكن تعمل الفرقعة دي لما تطقطق صوابعك، يعني لو حاولت تطرقع الصباع في العادي مش هيطرقع أصلًا. فيه 25 – 54% من الناس بيطرقعوا مفاصلهم!
ده بقى غلط ولا لأ؟ طرقعة الصوابع نظريًا ممكن تتلف الغضروف اللي بيغطي المفصل (وده متعلّق بالتهاب المفاصل)، بس الأبحاث وصلت لحاجة تانية!
ففي سنة 2009، في دكتور اسمه ”دونالد أنجر“ أخد جايزة إيج نوبل ”Ig Nobel Prize“. الجايزة دي معمولة للناس اللي بيعملوا أبحاث بتخلي الناس تضحك وبعدين تفكر. الراجل ده قعد أكتر من 60 سنة، بيطرقع إيده الشمال مرتين في اليوم ومابيطرقعش اليمين. يعني الراجل ضيّع كل الوقت ده عشان يوصل لإجابة سؤال: هيحصل لإيده الشمال التهاب في المفاصل ولا لأ. واللي وصله في الأخر إن مفيش أي علامة لالتهاب المفاصل في أي إيد فيهم.
قبلها بشوية حلوين في سنة 1975، سألوا 28 ساكن في دار لرعاية المسنين اليهود في لوس أنجلوس إذا كانوا بيطرقعوا مفاصلهم عادةً ولا لأ. والغريب إن اللي كانوا بيطرقعوا مفاصلهم كانت احتمالية إصابتهم بالفصال العظمي (نوع من التهاب المفاصل) (Osteoarthritis) أقل.
كان في دراسة أكبر اتعملت سنة 1990، العلماء كشفوا على إيدين 300 شخص سنهم فوق الـ45. الناس اللي بيطرقعوا صوابعهم قبضتهم كانت أضعف، و84% منهم كان فيه علامات تورم في إيديهم، بس مفيش حاجة ليها علاقة بالفصال العظمي. وحتى الدراسة دي مفيش دراسات تانية بتدعمها.
بالنسبة لالتهاب المفاصل، فالاحتمال الأكبر إن طرقعة الصوابع تكون نتيجة ليه مش سبب، لإن الغضروف نفسه تالف من الأساس وده اللي بيسبب الطرقعة، لكن الالتهاب نفسه ممكن يحصل بسبب السن أو التاريخ المرضي في العيلة أو حوادث حصلت للإيد قبل كدة أو استخدام الإيد في العمل الشاق طول عمرك.
وفيه بعض التقارير عن إصابات للإبهام أو التواء في أربطة الصوابع بتحصل بسبب طرقعة الصوابع، بس الحالات دي بتكون نادرة.
يعني في الغالب، المشكلة الوحيدة اللي ممكن تحصل بسبب طرقعة الصوابع، إن اللي قاعد قدامك ممكن يتوتر بسببك ويتعصب ويخبطك بحاجة في نافوخك، بس كده!
المصدر
