8 مصادر علمية مختلفة الآن متاحة مجانًا للجميع!
كتب: أحمد حسين
في الكلية لما كان بيتطلب مننا نعمل تكليف أو بحث علمي مثلًا، كنا بنتحط في مواقف محرجة لأننا مش عارفين هنجيب الكلام اللي هنكتبه في البحث منين، الكتب الورقية مش وسيلة عملية من حيث السرعة والمكتبة نفسها في الكلية مش وسيلة عملية من حيث التنظيم، وعليه ككل حاجة دلوقتي الحل كان الإنترنت. بس للأسف رغم إن كل حاجة بقت متاحة أونلاين إلا يظل بعض المصادر العلمية والمراجع الأكاديمية والصور المميزة النادرة مش مسموح للكل استخدامها والأسوأ مش متاح أصلًا!
في الموضوع ده هنتكلم عن 8 مصادر علمية مختلفة ما بين دراسات علمية أو صور خاصة من بعثات ناسا الفضائية أو محاضرات لعالم فيزياء بقيمة آلبرت آينشتاين وغيره كلها متاحة أونلاين حاليًا ومفتوجة المصدر للجمهور، وهو أمر لو تعلمون عظيم، تابعوا معانا:
– ملايين الأبحاث العلمية على موقع Sci-Hub
موقع (Sci-Hub) واللي بيعتبر أكبر موقع بحث علمي متاح مجانًا هو من بنات أفكار عالمة الأعصاب ”الكسندرا البكيان“، واللي أصبحت تُعرف على إنها ”روبين هود“ المواقع العلمية، بسبب دفعها لفلوس كتير علشان تقدر تحصل على قدر كبير من الأوراق البحثية دي، لأنك لو حاولت بس تقرأ ورقة بحثية من دول قبل كده ،كان عليك إنك تدفع حوالي 40 دولار. بفضل الكسندرا البكيان أصبحت الأوراق البحثية دي متاحة للجميع مجانًا.
– 16 ألف ورقة بحثية لداروين عن التطور
في العيد الـ155 لنظرية التطور تم طرح حوال 16 ألف ورقة بحثية عالية الجودة عن أصل الأشياء مجانًا على الانترنت. الموضوع ده أخد حوالي 7 سنين من المتحف الأمريكي لتاريخ الطبيعة للبحث في إرث داروين العلمي ومشاريعه وأوراقه البحثية علشان يقدروا يجمعوا كل ده، ويعملوا محتوى مفيد بالشكل ده. فلو أنت مهتم بدراسة التطور أو معرفة وجهة نظر داروين فيها _من باب العلم بالشيء يعني_ ممكن دلوقتي تطلع عليها مجانًا.
– جميع محاضرات العالم الفيزيائي (ريتشارد فاينمان)
لو أنت ماسمعت الاسم ده قبل كدة فغالبًا مش هتبقى عارف أهمية ريتشارد فاينمان إيه؟ باختصار، ريتشارد فاينمان هو واحد من نجوم الفيزياء في العالم كله، حصل على جائزة نوبل سنة 1965، وأفنى حياته كلها في تدريس الفيزياء بشكل مبسط ولطيف، ودلوقتي أصبحت كل محاضراته عن ميكانيكا الكم والفيزياء بشكل عام متاحة للجميع.
ريتشارد فاينمان كان له مقولة لطيفة بتقول: “لا أحد يعرف بالضبط ماهية الحياة، وهذا لا يهم. فكل ما عليك فقط هو أن تكتشف العالم، وستعلم أن كل شيء حولك سيكون مثيرًا للإعجاب لو تعمقت فيه بالشكل الكافي“.
– صور رحلة “أبولو” كلها وبجودة عالية
اللي منكم مهتم بالسينما هيبقى عارف _أو على الأقل سمع عن_ فيلم ”Apollo 13“ بطولة توم هانكس، واللي عمل فيه دور أحد رواد الفضاء اللي سافروا في رحلة سنة 1970 لاستطلاع القمر. الرحلة دي تم تجميع كل الصور اللي اتصورت خلالها وأصبحت متاحة دلوقتي مجانًا وبجودة عالية. الأرشيف مهم حقيقي وهيكون _من وجهة نظري_ لطيف جدًا زي الفيلم.. استمتعوا.
– حلقات ”NOVA science“ كلها مجانًا
عايز تعرف إزاي تزود قوة ذاكرتك؟ أو تشوف ماكينات قراءة العقل؟ كل ده أصبح متاح مجانًا دلوقتي بعد نشر 23 حلقة كاملة من حلقات المسلسل العلمي (Nova science now) اللي بيقدمه عالم الفيزياء الفلكية الشهير ”نيل ديجراس تايسون“ أصبحت متاحة كلها مجانًا.
– آلاف الأوراق البحثية اللي كتبها آينشتاين
تقريبًا مفيش حد مايعرفش قيمة آينشتاين العلمية، فبالطبع اللي عارف آينشتاين هيكون مدرك لقيمة أوراقه البحثية دي خاصةً اللي مهتمين بالفيزياء تحديدًا والعلم بشكل عام. سنة 2014 جامعة برينستون أطلقت مشروع اينشتاين الرقمي اللي جمعت فيه حوالي 80 ألف ورقة بحثية من إرث اينشتاين وأتاحته لكل الناس مجانًا.
يعني باختصار، لو كنت من محبي الفيزياء أو من محبي اينشتاين، أو حتى ليك مزاج تتعمّق أكتر في العلوم والفيزياء فالطريق دلوقتي بين إيديك.
– دعاية ناسا للسياحة الفضائية
من فترة، ناسا قررت تعمل دعاية للسياحة الفضائية وتعمل تسويق من نوع خاص لرحلات الفضاء من خلال بوسترات تشبه لحد كبير بوسترات الأفلام ونشرتهم لتوضيح رؤيتهم للمستقبل بشكل مميز. ناسا حاليًا قررت تتيح البوسترات دي كلها مجانًا للي حابب يتفرج على مجموعة من الصور العظيمة لازم تدخلوا تشوفوها!
– جميع أعداد مجلة (IF) للخيال العلمي
مجلة (IF science) للخيال العلمي مجلة أمريكية اتطبعت لأول مره سنة 1952، في الأول الناس ماكانوش حابينها أوي نظرًا لأنها حاجة غريبة عليهم، لكنها بعد فترة أصبحت من أشهر مجلّات الخيال العلمي الموجودة في العالم تقريبًا. المجلة اتطبعت آخر مرة سنة 1974. بعد العدد الـ 175 توقفت المجلة عن الإصدار، لكنها فضلت محتفظة بالقاعدة الجماهيرية اللي جمعتها خلال الـ 22 سنة اللي اتطبعت فيهم. ارشحها لكم شخصيًا حتى ممكن لو مش حابب تقرأ في المجلة نفسها، إنك بس تبص على الأغلفة الخارجية ليها لأنها بالفعل عظيمة.
المصدر: sciencealert
