والعيون “الزُرق” خدوني!
كتبت: يارا كمال
القاعدة بتقول محدش عاجبه حاله يا جماعة. يعني إحنا عينين أغلبنا سودا أو بني، ومع ذلك نحب العيون الزُرق، مع إننا طول الوقت بنغني للعيون السود. ماتفهمش بقى دي عقدة الخواجة ولا إيه بالظبط، ماعلينا. بس إيه اللي بيخلي لون العين أزرق من الأساس؟
العيون الزرقا بدأت تظهر في البشرية من وقت مايقلش عن 7000 سنة، ولحد دلوقتي مفيش تفسير أكيد لظهور العيون الزرقا. بس على العموم العيون الزرقا مش منتشرة أوي. خلونا نشوف مع بعض،ونبدأ بفرضية فيتامين د :
فرضية فيتامين د
العرف السائد في أفريقيا هو البشرة السمرة والشعر والعيون السود، أما في جنوب أوروبا، فالعيون الزُرق منتشرة أكتر، ومنتشرة أكتر وأكتر في شمال أوروبا لدرجة إن فيه 70% من الناس هناك عينيهم زرقا. الموضوع يوحي بإنه مرتبط بالشمس، صح؟
الفرضية دي بتقول إن الاحتياج لضوء الشمس عشان نكوّن فيتامين د في جسمنا هو اللي خلى بعض الناس عيونهم تبقى زرقا وبشرتهم تكون فاتحة. بمعنى إن الإنسان في بدايته لما بدأ يروح أماكن فترة النهار والصيف فيها بتبقى قصيرة ما يعني ضوء شمس أقل، ابتدت عيون بعض البشر وجلودهم تبقى فاتحة.
بس عالم الوراثة الجزيئية في جامعة كوينزلاند ”ريك سترام“ بيقول إن الفكرة دي فيها مشكلة لإن مفيش أي دليل بيقول إن العيون الفاتحة بيخشها ضوء أكتر مثلًا أو إنها بتشوف في الضوء الضعيف أحسن من العيون الغامقة. زائد بقى إن فيه دليل بيقول إن العيون الزرق ظهروا في البشرية قبل البشرة الفاتحة. في 2014، سترام وزمايله وصلوا لـ DNA من سِنّة عمرها 7000 سنة لشخص في شمال غرب أسبانيا. الراجل أسمر وشعره غامق وعينيه زرقا.
تأثير بول نيومان
فيه فرضيات كتير تانية عن إزاي العيون الزرق ظهرت، من ضمنها فكرة إن العيون الزرقا جذابة أكتر من العيون البُني، زي عيون بول نيومان كده (نيومان ممثل ومخرج أمريكي)، ولو بالنسبة لزماننا يبقى توم كروز مثلًا وناس كتير تانية.
فيه فرضية بتقول إن العيون الزرقا بتقدر تدرك الأجسام الثابتة أكتر من الأجسام المتحركة. بس ”سترام“ عنده فكرة تانية، إن العيون الزرقا مرتبطة بالناس اللي بتقدر تواجه الاضطرابات العاطفية الموسمية، وده نوع من الاكتئاب الشديد، بيكون فيه التواجد لفترات طويلة في ضوء قليل. وبيقول كمان إن العين بيبقى فيها خلايا عصبية خاصة في الشبكية، الخلايا دي بتقدر تكشف عن الضوء الأزرق وبكدة تقدر تظبط الإيقاع اليومي للجسم.
بول نيومان
إيه اللي بيحدد لون العين؟
طبعًا الجينات بتلعب دور في كمية صبغة الميلانين اللي بتتحكم في لون حدقة العين، والحدقة هي اللي بتتحكم في كم الضوء اللي هيدخل عينيك. كمان لون العين بيتأثر بالطريقة اللي الضوء بيتفاعل بيها مع الحدقة.
حوالي 74% من لون عينينا موجودين في جين اسمه (OCA2) على كروموسوم 15، والجين ده برضه بيأثّر في لون الشعر والبشرة بس بنسبة أقل بكتير. العيون الزرقا بتبقى صبغة الميلانين فيها قليلة في الطبقة الخارجية من الحدقة. يعني أصحاب العيون الغامقة عندهم أكتر. واخدة بالك معايا، يعني إنتِ حلوة كده من غير ما تلبسي لينسيز في فرح صاحبتك،أوكيه؟
المصدر
