عن إدمان الكولا: مافيش تبطيل يا علي!
كتب: أحمد حسين
في السبعينات، بدأت شركات المياة الغازية في الانتشار بشكلٍ كبير في كل مكان في العالم. ومع تزايد كمية الإعلانات التجارية الموجودة في كل مكان، واللي بتحظى فيها شركات المياة الغازية بنصيب الأسد، زادت مبيعات المياة الغازية بشكل مهول. واحدة من شركات المياة الغازية وصلت مبيعاتها إلى 1.8 مليار زجاجة في اليوم الواحد بس!! ومهما كانت صناعة التسويق ذكية في خلق احتياج للسوق عشان تبيع منتجها، فلازم يكون في سبب ورا النسبة الرهيبة دي من المبيعات والاستهلاك
المياة الغازية إدمان ليه؟
لأنها تحتوي على نسبة عالية جدًا من السكر (46 جرام) بما يعادل 14 مكعب سكر. ولما بتشرب النوع ده من المشروبات، بتقوم المستقبلات الموجودة على لسانك بإرسال إشارات تحفز ”مراكز الاستمتاع – Pleasure center“ الموجودة في القشرة الدماغية في المخ، وده بيخلي المخ يرجع يطلبها تاني عشان تحس بنفس المتعة، وده اللي بيخلي استهلاك المشروبات الغازية بكميات السكر اللي فيها يوصل لدرجة الإدمان، وخليك عارف كل ما زاد استهلاكك هتزيد معاناتك حتى لو مش مدرك ده لحد دلوقتي.
مين اللي بيحاسب على المشاريب؟
بعد زيادة الاستهلاك، بتبدأ أسنانك في مواجهة أول مشكلة، وهي كمية الأحماض الكبيرة الموجودة في المياة الغازية، وكل ما زادت نسبة الأحماض، زاد التآكل في ”المينا – Enamel“، وهي الجزء الظاهر من الأسنان والأقوى فيها، والسبب في تآكل المينا هو إن الأحماض دي بتحفز البكتيريا الموجودة على سطح الأسنان، وده بيؤدي في النهاية لضعف المينا وزيادة احتمالات التسوّس.
بعض الأشخاص، ييوصل بيهم الأمر لتناول المشروبات الغازية مع الوجبات المختلفة على مدار اليوم، ومش بس كدة في ناس الموضوع معاهم بيكبر أكتر، وبيوصلوا لمرحلة تناول االمياه الغازية كل ما حسوا بالعطش، واستبدالها بالمياه، وطبعًا السبب معروف وراء التصرفات دي وهو الوصول للإدمان بأمر من المخ.
مهم جدًا للصحة غن الإنسان البالغ يشرب عدد معين من أكواب المياه على مدار اليوم واللي بتتراوح من 8 لـ10 أكواب يوميًا، ولذلك خلينا نتخيل إن حد ما قرر يشرب 8 أكواب من المياه الغازية بدل المياه، ده معناه إنه هيحصل على 5432 سعر حراري إضافي، وعلى الرغم من إن أول حاجة هتروح ليها دماغك هي السمنة وعلااقتها بالمشروبات الغازية، لكن خلينا نقول إن في مشاكل أخطر منها ممكن تحصل بسبب إدمان المشروبات الغازية.
بعض الأبحاث أشارت إلى إن زيادة الوزن في الولايات المتحدة الأمريكية في آخر عشرين سنة يمكن ربطها بزيادة استهلاك المشروبات الغازية. وبعض الأبحاث من جامعة ييل أشارت لإن الناس بيستهلكوا عدد كبير من السعرات الحرارية لأنهم مش بيحسبوا السعرات الحرارية الموجودة في مشروباتهم من الأساس. كمان أشارت بعض الأبحاث التانية إلى إن قلة استهلاك المياه الغازية ممكن تنقذ حياة مليون شخص من المصابين بالسمنة المفرطة.
بالإضافة لكدة، وجود شراب الذرة كمكوّن أساسي في المشروبات الغازية، بيزيد من الدهون المتراكمة على الكبد، وكمان تزيد خطورة الإصابة بأمراض القلب. شراب الذرة بيمنع تحفيز هرمونات الإنسولين واللبتين اللي بيساعدوا الجسم على إرسال إشارات للمخ عشان يبطل أكل عند الشعور بالشبع، ولذلك بيرتبط تناول المشروبات الغازية بزيادة خطر الإصابة بمرض السكر نتيجة لإضطراب مستويات الإنسولين في الدم.
مرض السكر بالأساس له علاقة وثيقة باستهلاك المياة الغازية، بحسب مدرسة الصحة العامة بجامعة هارفرد، فإن الأشخاص اللي بيتناولوا علبة أو اتنين من المياة الغازية في اليوم بيزيد من خطر إصابتهم بنوعي مرض السكر بنسبة 26%. كمان أجريت دراسة على 40 ألف شخص خلال 20 سنة، وأثبتت إن الل بيتناولوا علبة واحدة من المياة الغازية يوميًا بتزيد احتمالات اصابتهم بأزمة قلبية بنسبة 20% أكثر من اللي بيتناولوا المشروبات الغازية.
وفي دراسة تانية أُجريت على 80 ألف سيدة لمدة 22 سنة، تم إثبات إن النساء اللاتي تناولن المياة الغازية أصيبوا بالنقرس بنسبة 75% أكثر من اللي لا يتناولوا المياة الغازية. بعض الباحثون أشاروا لإن الخطر ده ممكن يهدد الرجال أيضًا. وأشار الدكتور ”فرانك هو“، أستاذ التغذية وعلم الأوبئة بمدرسة الصحة العامة بهارفرد، إلى أن التقليل من استهلاك المياة الغازية بيقلل من خطر إصابتك بالسمنة المفرطة والأمراض المرتبطة بالسمنة المفرطة، واللي لا تقل خطورة عنها برضة.
المشكلة إن بعض البشر اتجهوا إلى المشروبات الغازية الدايت باعتبارها بتحتوي على سكريات صناعية ولا تؤدي إلى السمنة المفرطة، لكن السكريات الصناعية تؤدي إلى زيادة الوزن برضة. وأظهرت الأبحاث إن السكريات الصناعية بتزيد من إحساسنا بالجوع وبتفتح شهيتنا على الأكل، غير أن بعض الناس ممكن تزود من كميات أكلها نتيجة لاعتقادهم بإنهم قللوا سعراتهم الحرارة من المشروبات الغازية ومكن يستبدلوها بالأكل.
31 سنة وفي المستشفى بسبب الكولا!
المياة الغازية مش بس هتتسبب في إصابتك بالسمنة المفرطة ولا التسوّس وضعف الأسنان، دي كمان ممكن تسرع عملية التقدم في العمر. إزاي؟
التيلومير أو القطعة النهائية الموجودة على أطراف الكروموسومات (الصبغيات)، وكل ما تقدمنا في العمر قل حجم التليومير ده بشكل طبيعي، لكن المشكلة، إن بعض الأبحاث وجدت رابط ما بين تناول المشروبات الغازية وسرعة تقدم عمر الشخص، فالبحث أثبت إن من يتناول 600 ملليليتر (عدد علبتين) من المياة الغازية يتقدم في العمر بنفس قدر تقدم المدخنين الشرهين.
والدليل على كدة، هو قصة السيدة الشابة اللي فضلت تتناول 2 لتر من المياة الغازية يوميًا لمدة 16 سنة متواصلة، لحد ما دخلت المستشفى وهي في سن الـ31 سنة وبتعاني من أمراض في القلب ومشاكل صحية مختلفة ومن غير ما يكون في تاريخ وراثي للأمراض في العائلة. وكشفت التحاليل إنها بتعاني من نقص شديد في البوتاسيوم بسبب حصولها على نسبة كبيرة من الفراكتوز والكافيين. لكن بسبب طبيعة أجسادنا، جسمها رجع استجاب للعلاج واستعادت صحتها بعد ما امتنعت تمامًا عن تناول المشروبات الغازية.
ومن المعروف كذلك عند كتير من الناس إن المياه الغازية بتسبب هشاشة العظام، ودي معلومة صحيحة في الأغلب، وعلى الرغم من عدم تأكد الخبراء من وجد رابط مباشر، واعتقادهم إن السبب يكمن في إن تناول المشروبات الغازية بشكل مفرط بيمنع البعض من تناول مشروبات تانية مغذية ومفيدة زي اللبن والعصاير الطبيعية وغيرهم، لكن الأبحاث الجديدة بتقول لأ العلاقة ما بينهم مباشرة.
أشارت بعض الأبحاث بجامعة تافتس إلى احتمالية وجود رابط ما بين استهلاك المياة الغازية وهشاشة العظام في بحث أجروه على حوالي 1000 شخص، واكتشفوا إن الأشخاص المستهلكين للمياة الغازية بكميات كبيرة كانوا أكثر عرضة للإصابة بهشاشة العظام من غيرهم. السبب في كدة إن حمض الفوسفوريك، واللي بيعتبر مكون أساسي في المياه الغازية بيؤثر على كثافة العظام، فعلى الرغم من أهمية الفوسفور للعظام، إلا إن تناوله بكميات كبيرة بالمقارنة بنسبة الكالسيوم بيضعف العظام، وبيؤثر عليها تأثير سلبي.
وعليه..
إذا كنت من مدمني المياة الغازية، وبتتناول أكثر من علبتين في اليوم الواحد، فحاول تقلل من عدد العلب اليومية إلى واحدة بس في اليوم، لحد ما تقدر تمتنع عنها تمامًا أو حتى تخفف استهلاكك لمرة واحدة كل شهر وده أضعف الإيمان. وعشان تقدر تخفف من إجمان الكولا حاول تعوضها بكميات كافية من المياه والمشروبات المفيدة زي اللبن والعصاير الطبيعية من غير سكر، وتبقى ضربت عصفورين بحجر، قللت أضرار الكولا وكسبت فوايد العصاير التانية.
المصادر: webmd youtube harvard
