الصيد الجائر بيهدد 7 حيوانات بالانقراض خلال العشر السنين الجاية
كتب: أحمد حسين
كل شوية بنسمع عن حيوانات بتنقرض، سواء بسبب الصيد الجائر، اللي بيكون قائم على التجارة، زي صيد الفيلة علشان العاج بيتباع بالغالي، وصيد النمور علشان جلدها بيتعمل سجاد وحاجات شبه كده. أو الانقراض بسبب تغيّر المناخ في عدد كبير من المناطق الجليدية وغير الجليدية، ولنا في صور الدببة القطبية اللي أصبحت هزيلة جدًا مثلًا واضحًا، ده غير طبعًا تدمير الغابات، وإجبار الحيوانات على إنها تسيب مكانها وتشوف لها بيئة مختلفة تعيش فيها. وبسبب كل ده، هنتكلم عن 7 من الحيوانات اللي احتمال تنقرض خلال العشر سنوات القادمة وأسباب احتمالية الانقراض ده.
اعرف أكتر| أكبر 6 انقراضات في التاريخ!
إنسان الغاب
إنسان الغاب أو الـOrangutan حيوان من الرئيسيات، كان عندنا شبهه زمان في جنينة الحيوان، بس حاليًا أصبح مهدد بالانقراض في العالم كله، خصوصًا أنواع “Bornean Orangutan” و”Sumatran Orangutan”، اللي أعلن الاتحاد الدولي لحفظ الطبيعة (IUCN) إنهم أصبحوا في طريقهم للانقراض، لأننا خسرنا حوالي 80% منهم خلال الـ 75 سنة اللي فاتوا. وده بيحصل بسبب تدمير الغابات والصيد الجائر. الفكرة كمان إن الحفاظ على السُلالة مش سهل، أنثى إنسان الغاب مابتخلّفش غير لما بتوصل لسن تقريبًا 15 سنة، وبيستنّوا من 6 إلى 8 سنوات ما بين أول خِلفة والتانية، ودي فترة الانتظار الأطول بين الثدييات، لذلك الحفاظ عليهم مش سهل، لكن نسأل الله التساهيل.
نمر آمور
أحد أكثر أنواع النمور عُرضة للانقراض. سنة 2007 أعلن الاتحاد الدولي للحفاظ على البيئة إن فيه من 19 إلى 26 نمر آمور في العالم فقط، لكن الوضع تحسّن شوية في 2015 لما أصبح عددهم 60 نمر عايشين في جنوب روسيا وشمال الصين. من أسباب وضعه في دائرة الخطر الصيد الجائر وتدمير الغابات برضه. الفكرة إنه النمر ده بيُعتبر من أندر أنواع النمور، علشان كده الصيّادين بياخدو جلده ويبيعوه بالآلاف فيتعمل منه جزم وشنط وفرو للسهرات. طبعًا حاليًا الاتحاد الدولي للحفاظ على البيئة بيحاول يبعده عن الصيد ويوفر له بيئة مناسبة له يعيش فيها قدر المستطاع.
الوشق الأيبيري
الوشق الأيبيري (Iberian Lynx) أحد أكتر أنواع القطط البرية تهديدًا بالانقراض. كان منتشر زمان في إسبانيا، لحد ما أصبح في بداية الألفية الجديدة مهدد بالانقراض وبيعيش في أماكن محدودة جدًا. كل ده علشان جلده مبهر، فالصيادين قالوا يلا بينا نخلص عليه وناخد جلده نبيعه، والأسبان عملوا طرق قريبة من الغابات فالعربيات بقت بتخبطه، ده غير إن الغابات دي نفسها اتلوثت وبقت بتتقطّع وتنحصر شوية بشوية لحد ما قربت تختفي خالص، وكل ده أدّى لإن الوشق الأيبيري يبقى أحد أندر أنواع القطط البرية في العالم، واللي لو انقرض بالفعل هيبقى أول قط بري ينقرض من ساعة ما انقرض النمر السيفي من حوالي عشرة آلاف سنة.
وحيد القرن الأسود
تقريبًا ده أشهر حيوان مُهدد بالانقراض في القائمة. وأحد أشهر الحيوانات الإفريقية في العالم. حيوان مبهر فعلًا في صفاته وقوته. تقريبًا برضه وحيد القرن الأسود أحد أكثر الحيوانات اللي طمع فيها الصيّادين وأصحاب المصالح، لأنهم مش بس هيستفيدوا بالجلد اللي بيصنعوا منه ملابس، لأ دول كمان هيستفيدوا بالقرن، كونهم بيصنعوا منه حُلي وإكسسوارات وكوبّايات وأدوية (قديمًا) وغيره. والحفاظ على النوع من الانقراض أيضًا صعب، أولًا لأن دورة الحمل عند الأنثى بعد البلوغ بتكون من سنتين إلى 3 فرق بين المولود الأول والتاني، ثانيًا إن وحيد القرن بيصبح أكثر عُرضة للأمراض لو بيئته اتغيرت، ففكرة نقله لأماكن تانية غير البيئة الأصلية الخاصة بيه ممكن تكون خطر، لكن عمومًا العلماء بيحاولوا ونتمنى ينجحوا يحافظوا عليه أطول وقت ممكن.
غزال المُهر
تقريبًا معروفة إلى حدٍ ما للعرب والأفارقة. بتعيش في الصحراء الكبري ما بين الشمال في فصل الشتاء والجنوب في فصل الصيف. غزال المُهر بتواجه خطرين كُبار في حياتها، الخطر الأول هو الخطر البشري -للأسف- واللي منه قطع الأشجار اللي بتاخد منها الغذاء، وكمان صيدها علشان الجلد والقرون -كالعادة-، وده خلّاها أكثر عُرضه للخوف من البشر والهرب منهم، خصوصًا لما حد يحب يصورها أو يقرب منها، علشان كده بتضطر تغيّر البيئة الخاصة بيها وتبعد قدر المستطاع في الصحراء، وهي بتحتاج للميّه بشكل أكبر من معظم حيوانات الصحراء، والهروب ده بيمنعها من الحصول على الميّه فبتموت. عمومًا فيه جهود مبذولة حاليًا للحفاظ عليها لأطول فترة ممكنة.
الجمل الوحشي
بيُطلق عليه برضه اسم الجمل البري ذو السنامين (Wild Bactrian Camel)، أحد أكثر أنواع الجمال المُهددة بالإنقراض. بيعيش في آسيا، وتحديدًا في شمال الصين وجنوب منغوليا. كان موجود منه عدد كبير زمان، لكن بفضل جهود الصيادين أصبح عدد الجمال الوحشية الموجودين في العالم حوالي 1400 جمل فقط. اصطياد الجمال مش بيكون بهدف الحصول على الجلد بس مثلًا، لكن للحصول الأكل كمان. عمليات الصيد دي بتحصل بطريقة بشعة، عن طريق إنه يحطوا للجمل ألغام في ينابيع الميّه المالحة اللي بيشرب منها فيفجروه. عمومًا الـ1400 جمل الباقيين عايشين حاليًا في محمية طبيعية في الصين ونتمنى إنهم يزيدوا ويحافظوا عليهم بشكل جيد.
السلحفاة جلدية الظهر
أحد أكبر أنواع السلاحف البحرية، لكنها مختلفة عنهم في إن مفيش على ضهرها صدفة كبيرة زي أنواع السلاحف التانية. بدل الصدفة بتمتلك السلحفاة دي جلد سميك وقوي وشكله جميل فعلًا. أعلن الاتحاد الدولي للحفاظ على البيئة إن النوع ده مهدد بشدة للانقراض، بسبب الصيد الجائر علشان الجلد السميك الغالي ده، بالإضافة لتلوث البحر والشواطيء بالبلاستيك والقرف اللي بنرميه بلا اكتراث. لحد دلوقتي هي تُعتبر من أقل الحيوانات تهديدًا للانقراض في القائمة دي، ولكن مع زيادة نسب تلوث البحر وكمان اتجاه الصيادين إنهم يبيعوا جلدها لأن تمنه بيزيد، من المرجّح إنها للأسف تنضم لأخواتها وتبقى على حافة الانقراض. عمومًا نتمنى ده ما يحصلش، أو على الأقل تفضل في حماية أحد المنظمات والمحميات، علشان ما نسمعش عن خبر انقراضها قريبًا.
اعرف أكتر| التنوع البيولوجي: “كلنا متصلين في دايرة الحياة الكبيرة”
