الحيوانات المنوية تستعين بصديق!
كتبت: يارا كمال
فيه فريق من ألمانيا عمل لوالب آلية صغيرة جدًا في الحجم، عشان تساعد الحيوانات المنوية على التحرك، وده هيحل أحد أهم مشاكل العقم عند الرجال. فيه حيوانات منوية بتتحرّك أو بتعوم بصعوبة، وبالتالي مابتقدرش توصل للبويضة وتلقحها. لو قدر الفريق ده إنه يحقق النتايج اللي حققها معمليًا في جسم الإنسان، ده هيساعد ناس كتير فشلت في محاولات إنها تخلف وتجيب أولاد للسبب ده.
الابتكار بتاع الفريق الألماني عبارة عن لوالب معندية مصغرة بتلف حوالين ديل حيوان منوي، وتزقّه لحد البويضة. اللوالب دي اسمها (Spermbots)، بتشتغل بمساعدة مجال مغناطيسي بيتحكّم فيه العلماء. التجارب اللي اتعملت كانت على حيوان منوي لتور، بعد ما الحيون المنوي بيوصل هدفه، اللولب المعدني بيعكس اتجاهه عشان يفك نفسه من الحيوان المنوي.
الابتكار ده هيبقى بديل أحسن وأرخص من التلقيح الصناعي وأطفال الأنابيب. اللوالب دي طولها 50 ميكرون (واحد على مليون من المتر)، وقطرها 5 – 8 ميكرون، وبتتعمل من الجزيئات النانوية للحديد والتيتانيوم.
الابتكار ده ممكن يُستخدم في حاجات تانية تعتمد برضه على أنظمة آلية ميكروسكوبية، بس الفترة الجاية، الفريق هيشتغل على تحسين طريقة التحكم في إتجاه اللوالب دي وتطوير النظام بتاعها، والتأكد من كل الموانع المحتملة بالنسبة لمناعة الإنسان لإنه في الآخر جسم غريب هيخش الجسم.
المصدر
