البيوت المايكرو اليابانية:إزاي تعيش في بيت مساحته 17 متر؟!
كتب: أحمد حسين
ماحدش ينسى مسرحية الهمجي لمحمد صبحي، والبيت الصغير ده اللي كان عايش فيه آدم وحورية في مظهر معبر عن البساطة. وطبعًا كان معمول بشكل كوميدي مقصود بيه أزمة السكن بالتحديد وشقق الإسكان اللي في مساحة علب الكبريت، لكن اللي حصل في اليابان لما بنوا البيوت المايكرو دي كان مختلف شوية.. أكيد يعني اليابان برضه.
البيوت المايكرو الإبداع في أضيق المساحات
في اليابان، في مهندس اسمه ”ياسوهيرو ياماشيتا“ من شركة اسمها أتيليه تاكاتو (Atelier Tekuto)، عمل بيوت مايكرو صغيرة جدًا أطلق عليها بالياباني (Kyosho Jutaku) أو البيت المايكرو. ياماشيتا بنى أكتر من 300 بيت، كل بيت له شكل مختلف من جوّه ومن برّه. بس عمومًا البيت كلها بتبدأ مساحتها من حوالي 17 متر مربع، أيوه 17 متر، يعني البيت كله قد أوضتك تقريبًا.
زيادة الطلب على البيوت المايكرو دي في اليابان، بسبب المساحات الأرضية القليلة في اليابان، لأن اليابان فيها 70% جبال وأراضي غير مستوية و30% بس أرض مستوية، لذلك كل ما كان البيت مساحته أقل كل ما كان أفضل.
زائد كمان إن أسعار العقارات والضرائب اللي بتدّفع عليها بتكون كبيرة، فضلًا عن الأخطار اللي بتداهمهم كل فترة زي الزلازل والأعاصير والكوارث الطبيعية دي.
عمومًا يعني، في ناس بتفضّل البيوت المايكرو الصغيرة دي، ومنهم المهندس اللي صممهم ياماشيتا، اللي قال إنه في اليابان في قول مأثور بيقول (Tatte hanjo nete ichijo’)، ومعناه إنك بتحتاج نص حصيرة علشان تقف، وحصيرة كاملة علشان تنام.
يعني من الأخر إنت محتاج حصيرة واحد تتنيها لو هتقف وتفردها لو هتنام. وأضاف كمان إن الفكرة جاية من الـ (Zen)، وده اعتقاد بوذي شبيه شوية بالصوفية، بيتكلم عن فكرة الاستغناء والاكتفاء بالأشياء الضرورية فقط.
اعتمد ياماشيتا على الغرابة، وتصميم بيوت بلا سيمترية واحدة لأن الأرض نفسها مش سيمترية. مثلًا، في بيت في وسط طوكيو أطلقوا عليه اسم ”قطرة الحظ“، كان عبارة عن خُردة مُهملة من الأرض، وكانت تكلفته قليلة جدًا بسبب شكله لأنه على شكل شبه منحرف غير منتظم. بحسب ياماشيتا، في مثل ياباني بيقول إن آخر قطرة من النبيد تعتبر محظوظة، وده اللي ألهمه إنه يُطلق على البيت قطرة الحظ.
البيت ده اشتراه زوجين بميزانية محدودة. وزي ما قولنا، البيت مبني على قطعة أرض غير منتظمة، عرض البيت صغير جدًا، يمكن أقل من متر، وده كان شيء صعب على الشركة اليابانية المتبنية للمشروع، بس هما في النهاية قدروا يحولوه لبيت متوازن.
ياماشيتا عمل أكتر من بيت تاني بنفس الفكرة، بس كل بيت كان له تصميم خاص بيه. مثلًا، عمل بيت مكعّب أشبه بالأشكال ثنائية الأبعاد، بس علشان البيت شكله مقفّل كده، عمل له شبابيك باصه للسما، لذلك أطلق عليه اسم ”إطار السماء“.
في بيت تاني، ياماشيتا قرر إنه يعمل كل الحوائط وكل شيء في البيت بنفس اللون، وقال إنه اللي إنت بتشوفه في البيت ده من براح ووسع، هو في الحقيقة خداع بصري، لأنه مفيش إنحناءات كتير في البيت، وكمان بما إن كل الحوائط بنفس اللون فإنت بتحس إن البيت كله وحدة واحدة كبيرة، مع إنه كمساحة صغير فعلًا.
ياماشيتا كمان في بعض البيوت استخدم ستانلس ستيل (فولاذ مضاد للصدأ) مصقول، بمعنى إنه متلمّع لدرجة إنه بيعكس الصورة زي المراية كده، وده بيخدع العين وبيخلينا نشوف إن المساحة أكبر.
كمان، ياماشيتا لعب على موضوع المساحات ده بشكل ذكي، وعمل أماكن كتير في البيوت دي ممكن الساكن يشيل فيها الأشياء اللي بيراكمها مع الوقت ومابيحتاجهاش إلا كل فين وفين، وده بيساعد الساكن إنه يتيح مساحة أكبر لنفسه لما يشيل الأشياء دي في مكان/بدروم مختفي ومش ظاهر.
ولأن معظم اليابانيين مُهتمين بفكرة الأصل والتاريخ، ياماشيتا قرر يبني بعض البيوت على الطراز الياباني القديم، ويستخدم فيها خامات زي خشب الأرز وأرضيات جرانيت. زائد كمان إن ياماشيتا مش بس ذكي لا ده مبدع كمان، ولما كان بيعتبر إن الخامات اللي هيستخدمها في البناء مش عجباه، كان بيعمل هو خامات تانية بنفسه، يعني ممكن يستبدل الأسمنت العادي بأسمنت يعمله هو بنفسه من الرماد البركاني.
ياماشيتا بيقول إنه في النهاية، بيعمل التصميم الأقرب للأشياء المُحيطة، وكمان بيراعي فكرة إزاي الضوء هيدخل البيت اعتمادًا على مكان وجود الشمس خلال اليوم. زائد إنه كمان بيراعي وجهة نظر الشخص اللي هيسكن البيت، لأنه في النهاية بيشوف إن البيت ده شيء خاص جدًا ولازم يكون شبيه لشخصية الساكن، كل اللي مطلوب من ياماشيتا إنه يستخدم المساحة الصغيرة الاستخدام الأمثل علشان يعمل أقرب تصميم لفكر الشخص اللي هيسكن البيت.
استمتعوا بباقي الصور:
مصدر الصور: Atelier Tekuto / Makoto Yoshida
