أسرار الفضاء: 7 ألغاز فضائية حيرت العلماء!
كتبت: مها طـه
الفضاء بالنسبة لي بيُعتبر من الأشياء المجهولة، بحس دايمًا إننا مهما حاولنا نفهمه، في الآخر مش هنقدر برضه نفهم إلا جزء ضئيل جدًا منه، وواضح إن في ناس كتير ومنهم علماء كمان شايفين نفس الحاجة. أسرار الفضاء تعتبر ألغاز محيرة جدًا مستنية اللي يحلها وتتكشف له.
الألغاز دي مش بس محيرة لكن دي كمان بتُمثل مناطق جدل بين العلماء في محاولاتهم لتفسيرها، لأننا ببساطة مهما عرفنا فهو أولًا وأخيرًا في حدود السفر داخل مجموعتنا الشمسية، أو من خلال التليسكوبات، اللي أحيانًا بتكون رؤيتها للأشياء مش ناقلة للحقيقة كلها، وممكن ناخد نظرية قنوات المريخ مثالا، واللي اتضح في النهاية إنها ما هي إلا مجرد ظلال على التليسكوب نفسه. في المقال ده هنتعرف على..
7 من ألغاز الفضاء اللي حيرت العلماء:
1. الثقوب السوداء:
الثقوب السوداء بالنسبة لي هي أحد أكتر الحاجات اللي عاملة ”خُرم“ في دماغ العلماء وعلى رأسهم طبعًا العالم ”ستيفن هوكينج“، وفي دماغ الناس العادية كمان خاصة اللي منهم شاف فيلم إنترستيلر 😀
بالنسبة للكون الثقوب السوداء تُعتبر بمثابة الرمال المتحركة، واللي بتتكون من انهيار نجم عملاق على نفسه، وبعدها بينطبق النجم ده على نفسه في مساحة صغيرة لكن جاذبيتها شديدة، لدرجة إنها بتمتص حتى الضوء المحيط بيها. ا
اعرف أكتر عن الثقب الأسود من هنا.
معنى الكلام ده إن العلماء كده عارفين هو بيتكون من إيه وبيعمل إيه بالظبط، لكنهم مع ذلك ولحد دلوقتي عمرهم ما شافوا واحد من الثقوب دي، اللي حتى غير مرئية بالنسبة للتليسكوبات اللي بتلتقط الإشعاع الكهرومغناطيسي أو الضوء أو حتى الأشعة السينية، العلماء بس بيخمنوا اللي بيحصل وكل اللي نعرفه عنه هو بالفعل بناءًا على تحليلات وتخمينات.
2. الفراغ العملاق:
على عكس الثقب الأسود، فالفراغ العملاق مش ثقب في الفضاء ولا حاجة، لكنه في الحقيقة فراغ خالي تمامًا من المادة أو المادة المظلمة حتى، وكمان بيختلف عن الثقب الأسود في إن الضوء يقدر يمر من خلاله، بالرغم من إن العلماء بيعتقدوا إنه بيحتوي على الطاقة المُظلمة. الفراغ العملاق مش هو الفراغ الوحيد في الفضاء، لكنه الأكبر، وبيُقدر قطره بحوالي 1.3 مليار سنة ضوئية.
3. المادة المُظلمة:
المادة المظلمة دي تُعتبر أصلأً من ألغاز الكون، لكن مع ذلك بيتم الاعتماد عليها للمساعدة في شرح بعض المجهولات في الكون. العلماء بيعتقدوا إن المادة المظلمة بتُقدر بحوالي 27% من الكون، بمعنى تاني إن اللي نعرفه فعليًا عن المادة المُظلمة أقل بكتير من اللي منعرفوش، فهي مثلًا مش مكونة من ثقوب سوداء، لكن في نظرية واحدة اللي بتفسرها وهي إنها مكونة من الثقوب السوداء البدائية. ممكن تعرف أكتر عنها من هنا.
وفاة «فيرا روبن» التي عثرت على دليل للمادة المظلمة
4. الطاقة المُظلمة:
بالإضافة للاعتقاد بإن 27% من الكون تمثله المادة المُظلمة، فأكتر من كده بكتير بيكون عبارة عن طاقة مُظلمة، فهي بتمثل حوالي 68% من كل حاجة حوالينا! وبكده فالمادة اللي إحنا نعرفها كلها كده على بعضها بكل اللي بنشوفه ونعرفه عبارة عن 5% بس من الكون.
الطاقة المُظلمة زيها زي المادة المٌظلمة اللي نعرفه عنها أقل بكتير من اللي مانعرفوش، لكن الفرضية الحالية بتقول إن هي السبب في ازدياد حجم الكون وتمدده المُستمر، وإن المادة المُظلمة هي اللي بتحاول تقلل من الأثر ده. معظم فهم العلماء للمادة والطاقة المُظلمة جاي من خلال المعرفة الكونية بالموجات الميكروية.
5. الجاذب العظيم:
اللي نعرفه إنه من ساعة الانفجار الكبير ولحد دلوقتي الكون بيتمدد باستمرار، وبكده فمن المنطقي إن مجرتنا تتحرك من مكانها، لكن الطبيعي إن الحركة دي مش هتكون في اتجاه واحد مُعين. بس في الواقع، على بُعد حوالي 220 مليون سنة ضوئية في شئ ما بالفعل بيجتذب مجرتنا كلها ناحيته وفي اتجاه واحد معين.
الشئ اللي بيجذب مجربتنا ده تم الاصطلاح عليه تحت مُسمى الجاذب العظيم، وسبب لمعانه هو جاذبيته غير العادية. بعض العلماء بيشيروا لإن المادة المُظلمة هي السبب في وجوده من الأساس، وبيدعي البعض الآخر، إن مجرتنا (درب التبانة) هي اللي حاجبة رؤيتنا لهذا الجاذب العظيم اللي بيجذبنا نحوه بسرعة 1,4 مليون ميل في الساعة!
6. لغز قمر زحل ”بيجي“:
كوكب زحل عنده قمر صغير غامض واسمه ”بيجي“. في سنة 2013، وكالة ناسا أخدت اللقطة دي لحلقات كوكب زحل، وظهرت فيها منطقة مضطربة بشكل خلى علماء الفلك يعتقدوا بوجود قمر جديد صغير بيتكون، وده اللي من وجهة نظر العلماء ممكن يفسر وجود 67 قمر لكوكب زحل.
لكن لحد هذه اللحظة، ووفقًا للي أعلنت عنه مختبرات الدفع النفاث التابعة لوكالة ناسا، فهما لا يتوقعوا إن القمر ده يكبر بأي شكل، ويمكن كمان ينهار، وبكدة ف”بيجي” يُعتبر لغز لسة مالوش حل.
7. KIC 8462852 أو ”النجم المنقط“:
النجم ده مش بس ليه إسم مُميز ويمكن لاذع، لكنه كمان يُعتبر لغز وحالة شاذة بتقع على مسافة 1500 سنة ضوئية. 20% من الضوء المُنبعث منه مش بيوصلنا أصلًا، غالبًا مش كوكب هو اللي يقدر يحجب كل الضوء ده عننا، لأن حتى لو كوكب بحجم المُشتري فهو مش هيحجب أكتر من 1% من حجم نجم زي ده.
في علماء بيعتقدوا إن اللي مغطيه ما هو إلا ”سراب دايسون“ وده نسخة غير مُكتملة من مجال دايسون اللي بيُحيط بالنجم، وبيخرج طاقة النجم لبره، وغالبًا النجم ده هنعرف عنه أكتر لما وكالة ناسا تُطلق تليسكوب جيمس ويب الفضائي في 2018، لكن ولحد اللحظة دي فهو بيُعتبر كلغز عجيب مالوش تفسير.
المصادر: science.nasa1 techinsider techinsider
