8 علامات ترجح إنك ذكي ونبيه!
كتب: أحمد حسين
تقريبًا، كلنا عارفين إن الذكاء دة شيء فطري، وإنه بيظهر أكتر في الأعمال المتعلقة بالتحليل، والتخطيط، وحل المشاكل، وسرعة الاستنتاجات، وتنسيق الأفكار وغيره، وإنه غالبًا بيتم تحديد نسبة الذكاء عن طريق اختبارات الـ (IQ). لكن الباحثين قدروا يحددوا بعض الأنماط الغريبة اللي ممكن يتم التعامل معاها على إنها ”علامة“ على الذكاء والنباهة من خلال كونها مشتركة بين مجموعة ممن اتسموا بالذكاء، عندك مثلًا:
– أنت الطفلُ الكبير: سنة 2007 أجريت دراسة حول ذكاء الطفل الأكبر بالمقارنة بأفراد عائلته الأصغر منه، واكتشفوا عن طريق الدراسة دي إن الطفل الأكبر بيكون غالبًا أذكى بفرق بسيط شوية عن أخواته الأصغر منه، باختصار يعني “البِكري أذكي أخواته”.
– درس موسيقى: في سنة 2011، أجريت دراسة كانت نتائجها إن الذكاء الذكاء اللفظي لأطفال من سن 4 لسن 6 ارتفع بعد شهر من الدروس الموسيقية.
– أنت لا تُدخّن: في 2010 أجريت دراسة اسرائيلية _نعمل إيه؟ متقدمين في العلم للأسف لازم نذكرهم_ على 20 ألف شاب سنهم من 18 إلى 21، واكتشفوا إن اللي بيدخنوا كان الـ IQ بتاعهم 94، في حين إن غير المدخنين كان الـ IQ بتاعهم 101، والـ7 درجات الفرق دول راحوا في الدُخّان.
– معظمهم رُفيعين _للأسف_: دراسة فرنسية أجريت سنة 2006 قالت إن العقل السليم ”غالبًا“ في الجسم السليم والعكس صحيح. الدراسة اكتشفت إن الناس ذوي الأوزان المرتفعة استطاعوا إنهم يفتكروا 44% من الكلمات في اختبارات المفردات (Vocabulary)، بالمقارنة بنظائرهم الأكثر نحافة واللي افتكروا 56% من الكلمات.
– أشول.. أيسر: بعض الدراسات الأخيرة قالت إنه الشخص الأشول (الأيسر) غالبًا بيكون تفكيره مختلف وأفكاره مبتكرة وجديدة، الموضوع له علاقة أكتر بالإبداع يعني مش بالذكاء من كل جوانبه، بس ماحدش فينا يقدر ينكر برضه إن الشول بيبقوا حريفة في الكورة.
– ”ضربت مخدرات؟“ : دراسة تمت سنة 2012 ربطت ما بين نسبة الذكاء العالية في الصغر وبين تعاطي المخدرات في مرحلة من مراحل الشباب. الدراسة دي ربطت برضه بين نسبة الذكاء العالية في الصغر وبين السلوكيات الضارّة.
– ”عندك قطة؟“ : في 2014، أجريت دراسة على اللي بيمتلكوا حيوانات أليفية وكانت النتيجة إن الناس اللي بيمتلكوا كلب كانوا بيحبوا الخروج وكده. أما بقى اللي بيمتلكوا قطط فدول غالبًا بيكونوا أكثر ذكاءًا وأكثر انطوائية، فغالبًا بيكون ليهم هوايات متعلقة بالذكاء أكتر.
– الطول طلع هيبة: دراسة أجريت في جامعة برينستون قال إن الأطفال قبل سنة 3 سنوات اللي بيكونوا أطول من غيرهم بيكونوا غالبًا أذكى وبيأدوا بشكل أحسن في الاختبارات الخاصة الذكاء.
هو الحقيقة إنه في النهاية مفيش صفات بعينها بتقدر تحدد الذكاء، لأنه الذكاء أنواع وغالبًا ماحدش بيكون عنده كل أنواع الذكاء دي. يعني حتى شيرلوك هولمز كان بيعاني من نقص في الذكاء الاجتماعي بشكل كبير. لو يعني عندك صفة من دول دة بس معناه إنك ممكن على أقل تقدير يكون عندك نسبة ذكاء عالية في نوع من أنواع الذكاء.
المصدر
